ପୁରୀ ଅଫିସ,୧୫।୭: ଜାଲ୍ ପ୍ରମାଣପତ୍ର ଦେଇ ସାମନ୍ତ ଚନ୍ଦ୍ରଶେଖର (ଏସ୍ସିଏସ୍) ମହାବିଦ୍ୟାଳୟରେ ଆଡ୍ମିଶନ କରିଥିବା ୧୧ଜଣ ଛାତ୍ରୀଛାତ୍ରଙ୍କ ଆଡ୍ମିଶନକୁ ଉଚ୍ଚଶିକ୍ଷା ବିଭାଗ ଅବୈଧ ଘୋଷଣା କରିବା ପରେ କଲେଜ କର୍ତ୍ତୃପକ୍ଷଙ୍କ ଭୂମିକାକୁ ନେଇ ସନ୍ଦେହ ବଢ଼ିବାରେ ଲାଗିଛି। ସମ୍ପୃକ୍ତ ଛାତ୍ରୀଛାତ୍ରମାନେ ଜାଲ୍ ପ୍ରମାଣପତ୍ର ଦେଇ ଆଡ୍ମିଶନ କରିଥିବାରୁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି ହେଉଛି। ସେହିଭଳି ଠିକ ଭାବେ କାହିଁକି ଯାଞ୍ଚ କରାଗଲା ନାହିଁ ତାହାକୁ ନେଇ ଛାତ୍ର କଂଗ୍ରେସ ପ୍ରଶ୍ନ ଉଠାଇଛି। ପୁରୀ ଜିଲା ଛାତ୍ର କଂଗ୍ରେସ ସଭାପତି ଆଶୁତୋଷ ମିଶ୍ର କହିଛନ୍ତି, ଜଣେ ଆବେଦନକାରୀ ପ୍ରମାଣପତ୍ର ଦାଖଲ କରିବା ବେଳେ ତାହାକୁ ଠିକ୍ ଭାବେ ଯାଞ୍ଚ କରିବା କଲେଜ କର୍ତ୍ତୃପକ୍ଷଙ୍କ ଦାୟିତ୍ୱ । ଭିନ୍ନକ୍ଷମ ପ୍ରମାଣପତ୍ରର ବିଶ୍ୱସନୀୟତା ଜାଣିବା ପାଇଁ ପୁରୀ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଚିଠି କରାଯିବା କଥା। ଫଳରେ କେଉଁ ଆବେଦନକାରୀ ମିଛ ପ୍ରମାଣପତ୍ର ଦାଖଲ କଲେ ତାହା ତଦନ୍ତ ଦ୍ୱାରା ସହଜରେ ଜଣାପଡ଼ିଥାନ୍ତା। ମାତ୍ର କଲେଜ ସେଭଳି କରୁନାହିଁ। ଏହାଦ୍ୱାରା ଛାତ୍ରୀଛାତ୍ରଙ୍କୁ ମିଛ ପ୍ରମାଣପତ୍ର ଦାଖଲ ପାଇଁ ପରୋକ୍ଷରେ ପ୍ରୋତ୍ସାହିତ କରାଯାଉଛି। ତେବେ ଏସ୍ସିଏସ୍ କଲେଜରେ ଏଭଳି ପରମ୍ପରା ବହୁ ପୁରୁଣା। କେତେଜଣ ରାଜନୈତିକ ଦଲାଲ ପିଲାଙ୍କଠାରୁ ପ୍ରତିବର୍ଷ ଟଙ୍କା ନେଇ ଏଭଳି ଆଡ୍ମିଶନ କରାଉଛନ୍ତି। ଏଭଳି ବ୍ୟବସ୍ଥାର ମୂଳୋତ୍ପୋଟନ ପାଇଁ ମିଛ ପ୍ରମାଣପତ୍ର ଦାଖଲ କରିଥିବା ପିଲାଙ୍କୁ କଲେଜ ତରଫରୁ କାରଣ ଦର୍ଶାଅ ନୋଟିସ କରାଯିବା ଦରକାର। ଫଳରେ ଆବେଦନକାରୀଙ୍କ ପ୍ରଚ୍ଛଦପଟରେ ଥିବା ଦଲାଲମାନଙ୍କୁ ଧରିବା ସମ୍ଭବପର ହୋଇପାରିବ। ଅନ୍ୟପକ୍ଷରେ ପୁରୀ ଜିଲା ମୁଖ୍ୟ ଚିକିତ୍ସାଧିକାରୀ ସୁଜାତା ମିଶ୍ର ଏସମ୍ପର୍କରେ କହିଛନ୍ତି, ଭିନ୍ନକ୍ଷମ ପ୍ରମାଣପତ୍ର ଯାଞ୍ଚ ପାଇଁ କଲେଜ ତରଫରୁ ଆବେଦନ ଆସିବା ପରେ ଯାଞ୍ଚ କରିଥିଲୁ। ତେବେ ଯାଞ୍ଚରେ ଅତି ସହଜରେ ନକଲି ପ୍ରମାଣପତ୍ର ଚିହ୍ନଟ କରିହୋଇଥିଲା। ସବୁ ଭିନ୍ନକ୍ଷମଙ୍କର ଏକ ସ୍ବତନ୍ତ୍ର ୟୁଡିଆଇଡି ନମ୍ବର ରହିଛି। ନକଲି ପ୍ରମାଣପତ୍ରରେ ଥିବା ନମ୍ବର ସରକାରୀ ତଥ୍ୟ ସହ ମେଳ ନ ଖାଇଲେ ତାହା ନକଲି ବୋଲି ଧରାପଡ଼ିଥାଏ। ସଂପୃକ୍ତ ଘଟଣାରେ ୪୦ରୁ ଊର୍ଦ୍ଧ୍ୱ ଭିନ୍ନକ୍ଷମ ଆବେଦନକାରୀଙ୍କ ପ୍ରମାଣପତ୍ର ହସ୍ତଗତ ହୋଇଥିଲା ଓ ୧୧ ଜଣଙ୍କ ପ୍ରମାଣପତ୍ର ନକଲି ବୋଲି ଜଣାପଡ଼ିଥିଲା। ସେହିଭଳି ପ୍ରତିବର୍ଷ ଆଡ୍ମିଶନ ବେଳେ ପ୍ରମାଣପତ୍ର ଯାଞ୍ଚ ପାଇଁ ସିଡିଏମ୍ଓଙ୍କ କାର୍ଯ୍ୟାଳୟକୁ ଦିଆଯାଏ ନାହିଁ। ଚଳିତ ବର୍ଷ ଯାଞ୍ଚ ପାଇଁ ଦେବା ବ୍ୟତିକ୍ରମ ବୋଲି ସେ ସ୍ପଷ୍ଟ କରିଛନ୍ତି। ତେବେ ଏଠାରେ ପ୍ରଶ୍ନ ଉଠୁଛି, ଆଡ୍ମିଶନ ବେଳେ ସିଡିଏମ୍ଓଙ୍କ କାର୍ଯ୍ୟାଳୟକୁ ପ୍ରମାଣପତ୍ର ସମ୍ପର୍କିତ ତଥ୍ୟ ନ ଦେଇ ନିଜ ମନଇଚ୍ଛା କିପରି କାର୍ଯ୍ୟ କରାଗଲା। ସେହିଭଳି କଂଗ୍ରେସ ଯୁବନେତା ଆଲୋକ କୁମାର ଦାଶ କହିଛନ୍ତି, ତଦନ୍ତ ସହ କାର୍ଯ୍ୟାନୁଷ୍ଠାନ ଲାଗି ପୁରୀ ଜିଲାପାଳଙ୍କୁ ଦାବିପତ୍ର ଦିଆଯିବ। ଏଭଳି ଅବ୍ୟବସ୍ଥାରେ ସୁଧାର ଆଣିବା ଲାଗି ପଦକ୍ଷେପ ନେବାକୁ ଦାବି କରାଯିବ।
