ନୟାଗଡ଼ ଅଫିସ,୪ା୧୨:ଏସ୍ଆଇଟି (ସ୍ପେଶାଲ ଇନ୍ଭେଷ୍ଟିଗେଶନ୍ ଟିମ୍) ଦ୍ୱାରା ପରୀ ହତ୍ୟା ଘଟଣାର ତଦନ୍ତ ଚାଲୁରହିଛି। ଏପରିସ୍ଥଳେ ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ତଦନ୍ତ ପାଇଁ ଗୁରୁବାର ଯଦୁପୁରରେ ପହଞ୍ଚତ୍ଥିଲେ। ସେ ପରୀର ମୃତଦେହ ଉଦ୍ଧାର ହୋଇଥିବା ସ୍ଥାନ, ଗଁାର କେତେଜଣ ଲୋକ ଓ ବାବୁଲା ନାୟକଙ୍କୁ ପୃଥକ୍ ଭାବେ ପଚରାଉଚୁରା କରି ଫେରିଛନ୍ତି। ପ୍ରଧାନ ତାଙ୍କ ପ୍ରତିକ୍ରିୟାରେ ପରୀକୁ ବଳିଦିଆଯାଇଥିବା ସନ୍ଦେହ କରାଯାଉଛି ବୋଲି ପ୍ରକାଶ କରିଛନ୍ତି। ଅନ୍ୟପକ୍ଷେ ହତ୍ୟା ପୂର୍ବରୁ ପରୀ ଗାଇଥିବା ଗୀତ, ହସ୍ତାକ୍ଷର ଓ ଅଙ୍କକଷାର ଭିଡିଓ ଭାଇରାଲ ହେବାରେ ଲାଗିଛି। ଏ ନେଇ ପରୀର ମା’ କୁହନ୍ତି, ଜାନୁୟାରୀ ୨୬ ପୂର୍ବରୁ ଝିଅ ସ୍କୁଲରେ ଜାତୀୟ ସଙ୍ଗୀତ ଜନ-ଗଣ-ମନ ଅଧିନାୟକ ଗୀତ ଗାଇବା ପାଇଁ ଘରେ ପ୍ରସ୍ତୁତ ହେଉଥିଲା। ସେ ଏହାର ଭିଡିଓ ବି କରିଥିଲା। ଏବେ ଭିଡିଓକୁ ଦେଖିଲେ ପରୀ ମରିଥିବା ପରି ଲାଗୁନି। ସେ ଭଲ ପାଠ ପଢୁଥିଲା, ହେଲେ ବେଶି ଖେଳେ। ଏହି ଖେଳ ତା’ ପାଇଁ କାଳ ହେଲା ବୋଲି କହି କାନ୍ଦି ପକାଇଥିଲେ। ସେହିଭଳି ଘଟଣାର ମୁଖ୍ୟ ଅଭିଯୁକ୍ତ କୁହାଯାଉଥିବା ବାବୁଲି ନାୟକ ଗଣମାଧ୍ୟମ ସମ୍ମୁଖରେ ମୁହଁ ଖୋଲିଛନ୍ତି। ସେ କହିଛନ୍ତି, ମୁଁ ନିର୍ଦ୍ଦୋଷ। ମୁଁ ଗଞ୍ଜେଇ, ବ୍ରାଉନସୁଗାର ବ୍ୟବସାୟ କରେନି କି ମନୁଷ୍ୟର ଅଙ୍ଗପ୍ରତ୍ୟଙ୍ଗ ବିକ୍ରିରେ ସାମିଲ ନାହିଁ। ପରୀ ହତ୍ୟାକାଣ୍ଡରେ ମୁଁ ସାମିଲ ନାହିଁ। ମନ୍ତ୍ରୀ କିଛି ଜାଣିନାହାନ୍ତି। ତାଙ୍କୁ ଅଯଥାରେ ବିବାଦକୁ ଟଣାଯାଉଛି। ଘଟଣାର ତଦନ୍ତ କରାଯାଇ ଦୋଷୀକୁ଼ ଉପଯୁକ୍ତ ଦଣ୍ଡ ଦିଆଯାଉ। ମୁଁ ସବୁ ପ୍ରକାର ତଦନ୍ତକୁ ସ୍ବାଗତ କରୁଛି। ମୋର ଯଦି ଭୁଲ୍ ଅଛି ମୋତେ ଗିରଫ କରାଯାଉ। ମୁଁ ଗଁାରେ ଅଛି। ଦୋଷୀ ସାବ୍ୟସ୍ତ ହେଲେ ମୁଁ ସରେଣ୍ଡର କରିବି। ଆୟୋଗ ଅଧ୍ୟକ୍ଷା ପ୍ରଧାନ କୁହନ୍ତି, ପରୀ ହତ୍ୟାକାଣ୍ଡ ଏକ ଦୁଃଖଦ ଓ ଚାଞ୍ଚଲ୍ୟକର ଘଟଣା। ଆମେ ଏ ନେଇ ଏସ୍ଆଇଟି ସହ ଆଲୋଚନା କରିବୁ। ଏସ୍ଆଇଟିକୁ ମଧ୍ୟ ପକ୍ଷ କରିବୁ। ସେ ଆମକୁ ରିପୋର୍ଟ ଦେବେ। ଆମେ ଏକ ରିପୋର୍ଟ ପ୍ରସ୍ତୁତ କରି ସରକାରଙ୍କୁ ଦେବୁ। ପରୀକୁ ବଳି କିମ୍ବା ଅନ୍ୟ କାରଣରୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ଏଭଳି ଘଟଣା ସହର ନୁହେଁ, ଗଁାରେ ଘଟିଛି। ଏଣୁ ବାହାରେ ଶିଶୁଙ୍କ ସୁରକ୍ଷା ଉପରେ ପ୍ରଶ୍ନ ଉଠିଛି। ଏ ଦିଗରେ ଅଧିକ ସଚେନତା ଦରକାର। ଯଦି କିଛି ଶିଶୁ ନିଖୋଜ ଥିବେ ତେବେ ତଦନ୍ତର ଅଗ୍ରଗତି ପାଇଁ ସେମାନଙ୍କ ସମ୍ପର୍କରେ ପୋଲିସ ଓ ଜିଲା ପ୍ରଶାସନକୁ ପରାମର୍ଶ ଦେବୁ।
