ମୁମ୍ବାଇ: ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଘଟଣା ବର୍ତ୍ତମାନ ରାଷ୍ଟ୍ରୀୟ ପ୍ରସଙ୍ଗ ହୋଇସାରିଛି। ଯାହାର ସତ୍ୟତା ଜାଣିବା ପାଇଁ ସମସ୍ତେ ଚାହିଁ ବସିଛନ୍ତି। ଏହି ଘଟଣାରେ ପ୍ରତିଦିନ କିଛି ନା କିଛି ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ସୁଶାନ୍ତଙ୍କ ମୃତ୍ୟୁ ଗତ ଜୁନ୍ ୧୪ରେ ହୋଇଥିଲା। ଏହି ଦିନ ତାଙ୍କ ବିଲ୍ଡିଂ ତଳେ ୨ଟି ଆମ୍ବୁଲାନ୍ସ ରହିଥିଲା। ଯାହାକୁ ନେଇ ସନ୍ଦେହ ସୃଷ୍ଟି ହୋଇଥିଲା। ଏବେ ଏହି ତଥ୍ୟ ପଦାକୁ ଆସିଛି।
ପ୍ରଥମ ଆମ୍ବୁଲାନ୍ସ ଚାଳକ ଏକ ସାକ୍ଷାତକାରରେ କହିଛନ୍ତି, ଜୁନ୍ ୧୪ରେ ସୁଶାନ୍ତଙ୍କ ବିଲ୍ଡିଂ ତଳେ ଦୁଇଟି ଆମ୍ବୁଲାନ୍ସ ରହିଥିଲା। ଯାହାକୁ ନେଇ ସୋସିଆଲ ମିଡିଆରେ ଅନେକ କଳ୍ପନାଜଳ୍ପନା ପ୍ରକାଶ ପାଇଥିଲା। ବର୍ତ୍ତମାନ ଆମ୍ବୁଲାନ୍ସ ଚାଳକ ସାହିଲ ଏହି କଥା ସ୍ପଷ୍ଟ କରିଛନ୍ତି।
ସେ କହିଛନ୍ତି, ପ୍ରଥମ ଆମ୍ବୁଲାନ୍ସ ଖରାପ ଥିଲା। ତେଣୁ ଦ୍ୱିତୀୟ ଆମ୍ବୁଲାନ୍ସ ଡକାଯାଇଥିଲା। ଏଥିସହିତ ଦ୍ୱିତୀୟ ଆମ୍ବୁଲାନ୍ସ ଚାଳକ ଅକ୍ଷୟଙ୍କୁ ମୁମ୍ବାଇ ପୋଲିସ ଫୋନ୍ରେ କହିଥିଲା ପ୍ରଥମ ଆମ୍ବୁଲାନ୍ସର ଯାନ୍ତ୍ରିକ ତ୍ରୁଟି ରହିଛି। ତୁମେ ଏଠାକୁ ଆସ।
ଏହା ବ୍ୟତୀତ ଅକ୍ଷୟ ଲିକ୍ ହୋଇଥିବା ଫୋନ୍ କଲ ରେକର୍ଡରେ ତାଙ୍କ ନାମ ଉପରେ ସ୍ପଷ୍ଟୀକରଣ ମଧ୍ୟ ଦେଇଛନ୍ତି। ସେ କହିଛନ୍ତି, ମୁମ୍ବାଇ ପୋଲିସ ତାଙ୍କୁ ଫିଲ୍ମ ନିର୍ମାତା ସନ୍ଦୀପ ସିଂଙ୍କୁ ଡାକିବାକୁ କହିଥିଲା। ପୋଲିସ କହିଥିଲା ସନ୍ଦୀପ ଆମ୍ବୁଲାନ୍ସ ସନ୍ଦୀପ ଦେବେ ତାଙ୍କ ସହ ଯୋଗାଯୋଗ କରନ୍ତୁ।
ସୂଚନାଯୋଗ୍ୟ, ସୁଶାନ୍ତଙ୍କ ପିତା କେ.କେ. ସିଂ ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ବିରୋଧରେ ଏଫ୍ଆଇଆର ଦାଖଲ କରିଛନ୍ତି। ଏଥିରେ ସେ ଦର୍ଶାଇଛନ୍ତି ସୁଶାନ୍ତଙ୍କ ଟଙ୍କାକୁ ରିୟା ଅପବ୍ୟବହାର କରି ଆତ୍ମହତ୍ୟା ପାଇଁ ବାଧ୍ୟ କରିଛନ୍ତି। ଅନ୍ୟପକ୍ଷରେ ଏହି ଘଟଣାରେ ସିବିଆଇ, ଇଡି ଏବଂ ଏନ୍ସିବି ବିଭିନ୍ନ ଦିଗରୁ ଭିନ୍ନ ଭିନ୍ନ ଅନୁସନ୍ଧାନ ଜାରି ରଖିଛନ୍ତି।
