ନୂଆଦିଲ୍ଲୀ,୧୩।୧୧: ରାଜଧାନୀ ଦିଲ୍ଲୀର ବାୟୁ ପ୍ରଦୂଷଣକୁ ଦୃଷ୍ଟିରେ ରଖି ସୁପ୍ରିମ୍କୋର୍ଟଙ୍କ ପକ୍ଷରୁ ଚିନ୍ତା ବ୍ୟକ୍ତ କରାଯାଇଛି। ପ୍ରଧାନ ବିଚାରପତି ଏନ୍.ଭି. ରମନା ପରାମର୍ଶ ଦେଇଛନ୍ତି ଯେ, କେନ୍ଦ୍ର ସରକାର ରାଜଧାନୀ ଦିଲ୍ଲୀରେ ୨ ଦିନିଆ ଲକଡାଉନ୍ ଘୋଷଣା ପାଇଁ ବିଚାର କରିବା ଆବଶ୍ୟକ। ଏକ ବାୟୁ ପ୍ରଦୂଷଣ ମାମଲାର ବିଚାର ସମୟରେ ରମନା ଏଭଳି କହିଛନ୍ତି।
କେନ୍ଦ୍ର ସରକାର ଶୀଘ୍ର ସ୍ଥିତି ଅନୁଧ୍ୟାନ କରିବା ସହିତ ଦୃଢ଼ ପଦକ୍ଷେପ ଗ୍ରହଣ କରିବା ଲାଗି ପ୍ରଧାନବିଚାରପତି ରମନା ଏବଂ ବିଚାରପତି ଡି.ଓ୍ବାଇ. ଚନ୍ଦଚୂଡ଼ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି।
ପ୍ରଧାନ ବିଚାରପତି ଏନ.ଭି ରମନା ଶନିବାର କହିଛନ୍ତି ଯେ ଏଭଳି ପରିସ୍ଥିତିରେ ଘରେ ମଧ୍ୟ ମାସ୍କ ପିନ୍ଧି ବସିବାକୁ ପଡିବ। ବାୟୁ ପ୍ରଦୂଷଣର ମୁକାବିଲା ପାଇଁ ଏକ ଉପାୟ ବାହାର କରିବାକୁ କୋର୍ଟ କେନ୍ଦ୍ର ସରକାରଙ୍କୁ କହିଛନ୍ତି। ଏହି ମାମଲାର ଶୁଣାଣି ସମୟରେ ଖଣ୍ଡପୀଠ ସିଧାସଳଖ ସରକାରଙ୍କୁ ପ୍ରଶ୍ନ ପଚାରିଥିଲେ। ପରିସ୍ଥିତି କେତେ ବିପଜ୍ଜନକ ସେ ନେଇ ଅବଗତ କରାଇଥିଲେ। ଲୋକଙ୍କୁ ମାସ୍କ ପିନ୍ଧି ଘରେ ବସିବାକୁ ପଡିବ। ସରକାରଙ୍କ ପକ୍ଷରୁ କେଉଁ ପଦକ୍ଷେପ ନିଆଯାଉଛି? ଖଣ୍ଡପୀଠଙ୍କ ସମ୍ମୁଖରେ କେନ୍ଦ୍ର ସରକାରଙ୍କ ପକ୍ଷରୁ ହାଜର ହୋଇଥିବା ସୋଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ, ବାୟୁ ପ୍ରଦୂଷଣର ପ୍ରଥମ କାରଣ ହେଉଛି ଚାଷୀମାନେ ନଡ଼ା ଜାଳିବା। ସୋଲିସିଟର ଜେନେରାଲ କହିଛନ୍ତି, ଚାଷୀଙ୍କୁ ନଡ଼ା ଜାଳିବା ପାଇଁ କିଛି ନିୟମ ରହିବା ଉଚିତ, ଯାହା ଦ୍ୱାରା ରାଜ୍ୟ ସରକାର ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ।
ତେବେ ସୋଲିସିଟର ଜେନେରାଲଙ୍କ ଏହି ମନ୍ତବ୍ୟ ଉପରେ ପ୍ରଧାନ ବିଚାରପତି ପ୍ରଶ୍ନ ଉଠାଇ କହିଥିଲେ, ଆପଣ କହୁଛନ୍ତି ଯେ ସମସ୍ତ ପ୍ରଦୂଷଣ ପାଇଁ କୃଷକମାନେ ଦାୟୀ। ଏହାକୁ ରୋକିବାର କୌଣସି ବ୍ୟବସ୍ଥା ଅଛି କି ନାହିଁ ତାହା ଖଣ୍ଡପୀଠ ପ୍ରଶ୍ନ କରିଛନ୍ତି।
ଖଣ୍ଡପୀଠ କହିଛନ୍ତି, ସରକାରଙ୍କ ସହ ଆମର କୌଣସି ସମ୍ପର୍କ ନାହିଁ। ପ୍ରଶ୍ନ ହେଉଛି ଏହି ସମସ୍ୟାର ମୁକାବିଲା କିପରି ହେବ। କୌଣସି ଜରୁରୀକାଳୀନ ପଦକ୍ଷେପ, କିଛି ସ୍ବଳ୍ପକାଳୀନ ଯୋଜନା, ଏହାକୁ କିପରି ନିୟନ୍ତ୍ରଣ କରାଯିବା ସେ ନେଇ କାର୍ଯ୍ୟକାରୀ ହେବା ଉଚିତ।
ପ୍ରଧାନ ବିଚାରପତି କହିଛନ୍ତି ଯେ ପ୍ରଦୂଷଣର କିଛି ଅଂଶ ନଡ଼ା ଜଳିବା କାରଣରୁ ହୋଇପାରେ, କିନ୍ତୁ ଦିଲ୍ଲୀର ବୃଦ୍ଧି ପାଉଥିବା ପ୍ରଦୂଷଣ ପାଇଁ ବାଣଫୁଟା, ଶିଳ୍ପ ଏବଂ ଧୂଳି ଓ ଧୂଆଁ ମଧ୍ୟ ଦାୟୀ। ନିୟନ୍ତ୍ରଣ ପାଇଁ ତୁରନ୍ତ ପଦକ୍ଷେପ ନେବାକୁ ପଡିବ। ଯଦି ଆବଶ୍ୟକ ହୁଏ ତେବେ ଦୁଇ ଦିନିଆ ଲକଡାଉନ୍ କିମ୍ବା ଅନ୍ୟ କିଛି ପଦକ୍ଷେପ ନିଅନ୍ତୁ। ଲୋକମାନେ ଏଭଳି ପରିସ୍ଥିତିରେ କିପରି ରହିବେ ବୋଲି ସେ ପ୍ରଶ୍ନ କରିଛନ୍ତି।
ବିଚାରପତି ଚନ୍ଦ୍ରଚୂଡ଼ କହିଛନ୍ତି ଯେ, କରୋନା ମହାମାରୀ ପରେ ସ୍କୁଲ ମଧ୍ୟ ଖୋଲାଯାଇଛି। ଏହି ପରିସ୍ଥିତିରେ ଆମେ ଆମ ପିଲାମାନଙ୍କୁ ଖୋଲା ଛାଡିଛୁ। ଡାକ୍ତର ଗୁଲେରିଆ କହିଛନ୍ତି ଯେ ଯେଉଁଠାରେ ପ୍ରଦୂଷଣ ଅଛି, ସେଠାରେ ଏହି ମହାମାରୀ ଅଛି।” ତେବେ ଏହା ଉପରେ ସୋଲିସିଟର ଜେନେରାଲ କହିଛନ୍ତି ଯେ ଆଜି ସରକାରଙ୍କ ପକ୍ଷରୁ ଏକ ବୈଠକ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି। ଏହି ପ୍ରସଙ୍ଗରେ ସରକାର ବେଶ୍ ସଜାଗ ଅଛନ୍ତି ବୋଲି ସେ କହିଛନ୍ତି।