ନୂଆଦିଲ୍ଲୀ, ୧୦।୯: ସିବିଏସ୍ଇର ତ୍ରିଭାଷା ନୀତିକୁ ନେଇ ଚାଲିଥିବା ମାମଲାରେ ସୁପ୍ରିମକୋର୍ଟ ଚଳିତ ଶିକ୍ଷାବର୍ଷ ପାଇଁ ୬ଷ୍ଠ ଶ୍ରେଣୀ ଛାତ୍ରୀଛାତ୍ରଙ୍କୁ ଏହି ନୀତିରୁ ବାଦ୍ ଦେବାକୁ ବିଚାର କରିବାକୁ କହିଛନ୍ତି। ଭାରତର ପ୍ରଧାନ ବିଚାରପତି ସୂର୍ଯ୍ୟ କାନ୍ତଙ୍କ ନେତୃତ୍ୱରେ ଗଠିତ ଏକ ୩ଜଣିଆ ଖଣ୍ଡପୀଠ, ସିବିଏସ୍ଇର ତ୍ରିଭାଷା ନୀତିକୁ ଚ୍ୟାଲେଞ୍ଜ କରୁଥିବା ଏକାଧିକ ଆବେଦନର ଶୁଣାଣିକୁ ସେପ୍ଟେମ୍ୱର ୧୭କୁ ଘୁଞ୍ଚାଇବା ସହିତ ଚଳିତ ଶିକ୍ଷାବର୍ଷରେ ୬ଷ୍ଠ ଶ୍ରେଣୀର ଛାତ୍ରୀଛାତ୍ରଙ୍କୁ କିପରି କୋହଳ କରାଯାଇପାରିବ, ସେନେଇ ବୋର୍ଡକୁ ବିଚାର କରିବାକୁ କହିଛନ୍ତି। ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭାଟି ଉପଲବ୍ଧ ନଥିବାରୁ ଏସ୍ଜି ମେହଟ୍ଟା କୋର୍ଟଙ୍କୁ ଏହି ଆବେଦନଗୁଡ଼ିକୁ ସ୍ଥଗିତ ରଖିବାକୁ ଅନୁରୋଧ କରିଥିଲେ। ତଥାପି ସଂପୃକ୍ତ ଅଧିକାରୀମାନେ ଖଣ୍ଡପୀଠର ପରାମର୍ଶ ଉପରେ ବିଚାର କରିବେ ବୋଲି ଆଶ୍ୱାସନା ଦେଇଛନ୍ତି। ଜଣେ ଆବେଦନକାରୀଙ୍କ ବରିଷ୍ଠ ଓକିଲ କହିଛନ୍ତି ଯେ, ଅଧିକ ସମୟ ସ୍ଥଗିତ ରଖିବା ଦ୍ୱାରା ମାମଲା ବିଳମ୍ୱିତ ହେବା ଉଚିତ ନୁହେଁ, କାରଣ ଛାତ୍ରୀଛାତ୍ରମାନଙ୍କୁ ଶେଷରେ ପରୀକ୍ଷା ଦେବାକୁ ପଡ଼ିବ ଏବଂ ଏହା ସେମାନଙ୍କ ଅଭିଭାବକଙ୍କ ମଧ୍ୟରେ ଚିନ୍ତା ବଢ଼ାଉଛି।
୨୦ରେ ସୁପ୍ରିମକୋର୍ଟ ୯ମ ଶ୍ରେଣୀ ଛାତ୍ରୀଛାତ୍ରଙ୍କ ଦ୍ୱାରା ୩ଟି ଭାଷା ପଢ଼ିବାକୁ ବାଧ୍ୟତାମୂଳକ କରୁଥିବା ସିବିଏସ୍ଇ ନୀତିରୁ ଉପତ୍ନ୍ନ ସମସ୍ୟାଗୁଡ଼ିକର ସମାଧାନ ସନ୍ଧାନ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରି ମତ ଦେଇଥିଲେ ଯେ, ପିଲାମାନେ କୌଣସି ପ୍ରକାର ଚାପର ସମ୍ମୁଖୀନ ହେବା ଉଚିତ ନୁହେଁ। ଖଣ୍ଡପୀଠ ଦର୍ଶାଇଥିଲେ ଯେ ଉପଲବ୍ଧ ଭାଷା ବିକଳ୍ପଗୁଡ଼ିକ ସମ୍ୱନ୍ଧରେ ଯଥେଷ୍ଟ ମାନବ ସମ୍ୱଳ ଭିତ୍ତିଭୂମି କିପରି ନିର୍ମାଣ କରାଯିବ, ତାହାକୁ ବିଚାରକୁ ନେବାକୁ ପଡ଼ିବ। ଜଣେ ଆବେଦନକାରୀ ଯୁକ୍ତି ଦର୍ଶାଇଛନ୍ତି ଯେ, ୬ଷ୍ଠରୁ ୮ମ ଶ୍ରେଣୀ ପାଇଁ ପାଠ୍ୟକ୍ରମ ପ୍ରଣୟନ କରିବାରେ ସିବିଏସ୍ଇର କୌଣସି କ୍ଷେତ୍ରାଧିକାର ନାହିଁ, କାରଣ ଏହା ଏନ୍ସିଇଆର୍ଟି ଦ୍ୱାରା କରାଯିବା ଉଚିତ। ମେ ୨୭ରେ ଏହି ନୀତିକୁ ଚ୍ୟାଲେଞ୍ଜ କରୁଥିବା ଏକ ଆବେଦନର ପରୀକ୍ଷା କରିବାକୁ ଶୀର୍ଷ କୋର୍ଟ ରାଜି ହୋଇଥିଲେ ଏବଂ କେନ୍ଦ୍ର, ସିବିଏସ୍ଇ ଏବଂ ଏନ୍ସିଇଆରଟିକୁ ସେମାନଙ୍କର ଜବାବ ଦାଖଲ କରିବାକୁ ନୋଟିସ୍ ଜାରି କରିଥିଲେ। ସିବିଏସ୍ଇ ଦ୍ୱାରା ଜାରି ଏକ ସର୍କୁଲାର ଅନୁଯାୟୀ ଜୁଲାଇ ୧ ରୁ ୯ମ ଶ୍ରେଣୀ ଛାତ୍ରଛାତ୍ରଙ୍କ ପାଇଁ ଅନୂ୍ୟନ୍ୟ ୨ଟି ଭାରତୀୟ ସ୍ଥାନୀୟ ଭାଷା ସମେତ ୩ଟି ଭାଷା ଅଧ୍ୟୟନକୁ ବାଧ୍ୟତାମୂଳକ କରାଯାଇଛି।