ନୂଆଦିଲ୍ଲୀ,୧୫।୧୦: ପ୍ରଯୋଜିକା ଏକତା କପୁରଙ୍କ ଓ୍ବେବ୍ ସିରିଜ୍ ‘XXX’ ରେ ଆପତ୍ତିଜନକ କଣ୍ଟେଣ୍ଟକୁ ନେଇ ଶୁକ୍ରବାର ସୁପ୍ରିମକୋର୍ଟ ତାଙ୍କୁ ଭର୍ତ୍ସନା କରିଛନ୍ତି। ଏକତା ଭାରତର ଯୁବପିଢ଼ିଙ୍କ ମସ୍ତିଷ୍କକୁ ପ୍ରଦୂଷିତ କରୁଥିବା ଶୀର୍ଷ ଅଦାଲତ କହିଛନ୍ତି। ଏକତାଙ୍କ ଓଭର୍ ଦି ଟପ୍ (ଓଟିଟି) ପ୍ଲାଟ୍ଫର୍ମ ଅଲ୍ଟ ବାଲାଜୀରେ ପ୍ରସାରିତ ଉକ୍ତ ଓ୍ବେବ୍ ସିରିଜର ସିଜନ୍-୨ରେ ଯବାନମାନଙ୍କୁ ଅପମାନିତ ଓ ସେମାନଙ୍କ ପରିବାରର ଭାବାବେଗକୁ କୁଠାରାଘାତ କରାଯାଇଥିବା ଅଭିଯୋଗ ଆଣି ବିହାରର ବେଗୁସରାଇସ୍ଥିତ ଏକ କୋର୍ଟରେ ପିଟିଶନ ଦାଖଲ କରାଯାଇଛି। ପୂର୍ବତନ ସୈନିକ ଶମ୍ଭୁ କୁମାରଙ୍କ ଆବେଦନକ୍ରମେ ବେଗୁସରାଇ କୋର୍ଟ ଏକତାଙ୍କ ବିରୋଧରେ ଗିରଫ ପରଓ୍ବାନା ଜାରି କରିଛନ୍ତି।
କପୁରଙ୍କ ବିରୋଧରେ ଗିରଫ ପରଓ୍ବାନା ଜାରି ହେବା ପରେ ସେ ପାଟନା ହାଇକୋର୍ଟରେ ଏକ ପିଟିଶନ ଦାଖଲ କରିଛନ୍ତି। ଏହାର ଶୁଣାଣି ହେଉ ନ ଥିବାରୁ ଏକତା ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ପାଟନା ହାଇକୋର୍ଟରେ ଦାଖଲ ପିଟିଶନର ଶୁଣାଣି ଏତେ ଶୀଘ୍ର ହେବାକୁ ଯାଉନାହିଁ ବୋଲି ଏକତାଙ୍କ ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ମୁକୁଲ ରୋହତଗୀ ସୁପ୍ରିମକୋର୍ଟଙ୍କୁ କହିଥିଲେ। ଜଷ୍ଟିସ୍ ଅଜୟ ରୋହତଗୀ ଏବଂ ସି.ଟି. ରବିକୁମାରଙ୍କୁ ନେଇ ଗଠିତ ଖଣ୍ଡପୀଠ ଏହା ଉପରେ କହିଛନ୍ତି, କିଛି ଗୋଟେ କରିବାକୁ ପଡ଼ିବ। ତୁମେ ଭାରତୀୟ ଯୁବପିଢ଼ିଙ୍କ ମୁଣ୍ଡ ଖରାପ କରୁଛ। ଓଟିଟି କଣ୍ଟେଣ୍ଟ ସମସ୍ତଙ୍କ ପାଇଁ ଉପଲବ୍ଧ। ତୁମେ ଲୋକଙ୍କୁ କିପରି ଜିନିଷ ଦେଖିବାକୁ ଦେଉଛ? ଉତ୍ତରରେ ମୁକୁଲ ରୋହତଗୀ କହିଥିଲେ, ଏକତାଙ୍କ ଓ୍ବେବ୍ ସିରିଜ୍ର କଣ୍ଟେଣ୍ଟ ହେଉଛି ସବ୍ସ୍କ୍ରିପ୍ଶନଭିତ୍ତିକ। ଦେଶରେ କିଏ କ’ଣ ଦେଖିବେ ତାହା ସମ୍ପୃକ୍ତ ଦର୍ଶକଙ୍କ ସ୍ବାଧୀନତା। ଖଣ୍ଡପୀଠ କହିଥିଲେ, ଯେଉଁମାନେ ସ୍ବର ଉତ୍ତୋଳନ କରିପାରନ୍ତି ସେମାନଙ୍କ ପାଇଁ ଏହି ଅଦାଲତ ଉଦ୍ଦିଷ୍ଟ ନୁହେଁ। ପାଟନାର ଜଣେ ଓକିଲଙ୍କ ଜରିଆରେ ହାଇକୋର୍ଟରେ ବିଚାରାଧୀନ ମାମଲାର ସ୍ଥିତି ସମ୍ପର୍କରେ ଜାଣିବାକୁ ଏକତାଙ୍କ ଉଦ୍ଦେଶ୍ୟରେ ଖଣ୍ଡପୀଠ ରୋହତଗୀଙ୍କୁ ପରାମର୍ଶ ଦେଇଛନ୍ତି।
