ନୂଆଦିଲ୍ଲୀ,୨୩।୧(ଆଇଏଏନ୍ଏସ୍): ବିଚାରପତି ନିଯୁକ୍ତିକୁ ନେଇ କେନ୍ଦ୍ର ଏବଂ ନ୍ୟାୟପାଳିକା ମଧ୍ୟରେ ବିବାଦ ଲାଗିରହିଥିବାବେଳେ ଆଇନ ମନ୍ତ୍ରୀ କିରେନ୍ ରିଜିଜୁ ରବିବାର ଦିଲ୍ଲୀ ହାଇକୋର୍ଟର ଅବସରପ୍ରାପ୍ତ ବିଚାରପତି ଆର୍.ଏସ୍. ସୋଧିଙ୍କ ସାକ୍ଷାତ୍କାରର ଭିଡିଓ ଶେୟାର କରିଛନ୍ତି। ସୁପ୍ରିମକୋର୍ଟ ନିଜେ ବିଚାରପତି ନିଯୁକ୍ତି ସମ୍ପର୍କରେ ନିଷ୍ପତ୍ତି ନେଇ ସମ୍ବିଧାନକୁ ଅପହରଣ କରିଛନ୍ତି ବୋଲି ଜଷ୍ଟିସ୍ ସୋଧି କହିଥିଲେ। ଆଇନ ପ୍ରଣୟନ କରିବା ଅଧିକାର ପାର୍ଲାମେଣ୍ଟର ରହିଛି। ସୁପ୍ରିମକୋର୍ଟ ଆଇନ ପ୍ରଣୟନ କରିପାରିବ ନାହିଁ ବୋଲି ଜଷ୍ଟିସ ସୋଧି କହିଥିଲେ। କେବଳ ପାର୍ଲାମେଣ୍ଟ ହିଁ ସମ୍ବିଧାନ ସଂଶୋଧନ କରିବ।
ତେବେ ସୁପ୍ରିମକୋର୍ଟ ସମ୍ବିଧାନକୁ ହାଇଜାକ୍ କରୁଥିବା ସେ ପ୍ରଥମ ଥର ପାଇଁ ଅନୁଭବ କରୁଛନ୍ତି ବୋଲି ସୋଧି କହିଥିଲେ। ହାଇଜାକ ପରେ ସେମାନେ କହିବେ ଆମେ ବିଚାରପତି ନିଯୁକ୍ତି ଦେବୁ, ଏଥିରେ କେନ୍ଦ୍ରର କିଛି ଭୂମିକା ନାହିଁ। ହାଇକୋର୍ଟଗୁଡ଼ିକ ଶୀର୍ଷ ଅଦାଲତଙ୍କ ଆଜ୍ଞାକାରୀ ନୁହନ୍ତି, କିନ୍ତୁ ହାଇକୋର୍ଟ ବିଚାରପତିମାନେ ସୁପ୍ରିମକୋର୍ଟଙ୍କୁ ଚାହିଁ ରହିବା ସହ ଆଜ୍ଞାକାରୀ ପାଲିଟିଗଲେଣି ବୋଲି ଜଷ୍ଟିସ ସୋଧି କହିଥିଲେ।
ପୂର୍ବତନ ବିଚାରପତିଙ୍କ ମତାମତ ବିବେକପୂର୍ଣ୍ଣ ବିବେଚନା କରୁଛି ବୋଲି ମନ୍ତ୍ରୀ ରିଜିଜୁ କହିଛନ୍ତି। ଅଧିକାଂଶ ଲୋକଙ୍କର ସମାନ ମତାମତ ରହିଛି। ଜନସାଧାରଣ ସେମାନଙ୍କ ପ୍ରତିନିଧି ମାଧ୍ୟମରେ ନିଜକୁ ଶାସନ କରିଥାନ୍ତି। ନିର୍ବାଚିତ ଜନପ୍ରତିନିଧିମାନେ ଲୋକଙ୍କ ସ୍ବାର୍ଥକୁ ଉପସ୍ଥାପନ କରିବା ସହ ଆଇନ ପ୍ରଣୟନ କରିଥାନ୍ତି। ଆମ ନ୍ୟାୟପାଳିକା ସ୍ବାଧୀନ ଏବଂ ସମ୍ବିଧାନ ସର୍ବୋଚ୍ଚ ବୋଲି ରିଜିଜୁ ଟୁଇଟ୍ କରିଛନ୍ତି।
