ନୂଆଦିଲ୍ଲୀ,୨୩।୧୧: ନଭେମ୍ବର ୨୫ରେ ହେବାକୁ ଥିବା ନଗରପାଳିକା ମତଦାନ ପୂର୍ବରୁ ତ୍ରିପୁରାରେ ହିଂସା ତଥା ର୍ନିବାଚନ ପ୍ରଚାର ଉପରେ ପ୍ରତିବନ୍ଧକ ଲଗାଯାଇଥିବା ନେଇ ମଙ୍ଗଳବାର ସୁପ୍ରିମକୋର୍ଟରେ ଶୁଣାଣି ହୋଇଥିଲା। ଭାଜପା-ଟିଏମସି ବିବାଦ ମଧ୍ୟରେ ସୁପ୍ରିମକୋର୍ଟ ତ୍ରିପୁରା ସରକାରଙ୍କୁ ପ୍ରଶ୍ନ କରିଛନ୍ତି ଯେ ନିରପେକ୍ଷ ନିର୍ବାଚନକୁ ସୁନିଶ୍ଚିତ କରିବା ପାଇଁ କେଉଁ ପଦକ୍ଷେପ ଗ୍ରହଣ କରାଯାଇଛି?
ଟିଏମସି ଏବଂ ତ୍ରିପୁରା ସରକାର ସେମାନଙ୍କର ପ୍ରଥମ ଯୁକ୍ତି ଉପସ୍ଥାପନ କରିବା ପରେ ବିଚାରପତି ଡି.ଓ୍ବାଇ ଚନ୍ଦ୍ରଚୂଡ଼ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏଭଳି ପ୍ରଶ୍ନ କରିଛନ୍ତି। ଏହାପୂର୍ବରୁ ରାଜ୍ୟରେ ହୋଇଥିବା ହିଂସା ତଥା ରାଜନୈତିକ ତିକ୍ତତା କାରଣରୁ ନଗରପାଳିକା ମତଦାନ ନେଇ ଉପଯୁକ୍ତ ପଦକ୍ଷେପ ଗ୍ରହଣ ଉପରେ ଉତ୍ତର ଲୋଡାଯାଇଥିଲା। ଟିଏମସିର ଆଇନଜୀବୀ ତ୍ରିପୁରାରେ ଘଟିଥିବା ଅନେକ ହିଂସା ଘଟଣାକୁ ଦର୍ଶାଇଥିଲେ। ତାରିଖ ଏବଂ ସ୍ଥାନ ମଧ୍ୟ କୋର୍ଟକୁ କହିଥିଲେ।
ଟିଏମସିର ଆଇନଜୀବୀ କହିଛନ୍ତି, ସ୍କ୍ରିନଶଟରେ ଆପଣ ଦେଖିପାରିବେ ଯେ ଯେତେବେଳେ ହିଂସା ଘଟୁଛି, ପୋଲିସ ଠିଆ ହୋଇଛି ଏବଂ ନୀରବ ଦ୍ରଷ୍ଟା ପାଲଟିଛି। ସେ କହିଛନ୍ତି, ରାଜନୈତିକ କର୍ମୀଙ୍କୁ ବାହାର କରି ଦିଆଯାଇଛି। ଶିଶୁ ଓ ମହିଳାଙ୍କୁ ଘରୁ ଟାଣି ବାହାର କରାଯାଇଛି। ଯାନବାହନ ଭଙ୍ଗାରୁଜା କରାଯାଇଛି। ଏହା ମୁକ୍ତ ଏବଂ ନିରପେକ୍ଷ ନିର୍ବାଚନ ନୁହେଁ। ଏଭଳି ସ୍ଥିତିରେ ଭୋଟର ମତଦାନ ପାଇଁ ବାହାରକୁ ଆସିବେ ନାହିଁ ବୋଲି ସେ କହିଛନ୍ତି। ତ୍ରିପୁରା ସରକାରଙ୍କ ପକ୍ଷରୁ ଆଇନଜୀବୀ ମହେଶ ଜେଠମାଲାନି କହିଛନ୍ତି,ଏହା ଏକ ରାଜନୈତିକ ଆବେଦନ। ମଙ୍ଗଳବାର ପ୍ରଚାରର ଶେଷ ଦିନ। ହଠାତ୍ ହିଂସା ଘଟଣାର ବିଚାର ସୁପ୍ରିମକୋର୍ଟରେ ଚାଲିଛି। ମାମଲା ରୁଜୁ ହୋଇଛି ଏବଂ ତଦନ୍ତ ଜାରି ରହିଛି।
ତ୍ରିପୁରା ସରକାରଙ୍କ ଆଇନଜୀବୀ କହିଛନ୍ତି ନିର୍ବାଚନ ସମ୍ପର୍କରେ ଏକ ରିପୋର୍ଟ ଦାଖଲ କରିବାକୁ ସୁପ୍ରିମକୋର୍ଟ କହିଛନ୍ତି ଏବଂ ଆସନ୍ତାକାଲି ଏହାକୁ ଉପସ୍ଥାପନ କରାଯିବ।
