ଯୋଡ଼ା,୨୦ା୩(ଡି.ଏନ.ଏ):କେନ୍ଦୁଝର ଜିଲା ଯୋଡ଼ା ପୌରପାଳିକା ଅନ୍ତର୍ଗତ ପୁରୁଣା କାରଖାନାରୁ ମୁସଲିମ ବସ୍ତିକୁ ସଂଯୋଗ କରୁଥିବା ସୁନାନଦୀ ଉପରେ ପୋଲ ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ନିର୍ମାଣ ନିମନ୍ତେ ଡିଏମ୍ଏଫ ପାଣ୍ଠିରୁ ପ୍ରାୟ ୪ କୋଟି ୫୦ ଲକ୍ଷ ବ୍ୟୟ ଅଟକଳ ରହିଥିବା କନିଷ୍ଠ ଯନ୍ତ୍ରୀ ପ୍ରଦୀପ ଚକ୍ରବର୍ତ୍ତୀ ସୁଚନା ଦେଇଛନ୍ତି। କାମ ଆସନ୍ତା ଜୁଲାଇ ସୁଦ୍ଧା ଶେଷ ନେଇ ସମୟ ଧାର୍ଯ୍ୟ ହୋଇଛି। କେନ୍ଦୁଝର ପିଡବ୍ଲ୍ୟୁଡି ବିଭାଗ ପକ୍ଷରୁ ତଦାରଖ କରାଯାଉଛି।
ପ୍ରକାଶ ଯେ, ସତୁରୀ ଦଶକରେ ସୁନା ନଦୀ ଉପରେ ଏକ କାଠପୋଲ ଥିଲା। ୧୯୯୯ ମହାବାତ୍ୟାରେ ପୋଲଟି ଭାଙ୍ଗି ଯାଇଥିଲା। ଫଳରେ ଯୋଡ଼ାର ୱାର୍ଡ ନଂ. ୩, ୪, ୯ ଓ ୧୦ର ଜନସାଧାରଣ ବହୁ ଅସୁବିଧାର ସମ୍ମୁଖୀନ ହେଉଥିଲେ। ଏହାକୁ ଦୃଷ୍ଟିରେ ରଖି ଜନସାଧାରଣ ପୋଲ ନିର୍ମାଣ କରିବାକୁ ପୌରପାଳିକା, ବିଧାୟକ, ଏମ୍ପିଙ୍କୁ ଜଣାଇ ନିରାଶ ହୋଇଥିଲେ। ପରେ ପୁରୁଣା ଲୁହା ପ୍ଲେଟ୍ ନଦୀ ଉପରେ ପକାଇ ଚଲାପଥ ନିର୍ମାଣ କରିଥିଲେ ବୋଲି ସ୍ଥାନୀୟ ବାସିନ୍ଦା ମହମ୍ମଦ ସିରାଜ କହିଥିଲେ। ଏଥିସହ ସ୍ଥାନୀୟ ଲୋକ ଓ ବୁଦ୍ଧିଜୀବୀଙ୍କ ଦସ୍ତଖତ ସମ୍ବଳିତ ଦାବିପତ୍ର ୨୦୦୦ଠାରୁ ବିଭିନ୍ନ ସରକାରୀ ବିଭାଗକୁ ଦେଇଥିଲେ। ଲୋକଙ୍କ ଅସୁବିଧାକୁ ଦୃଷ୍ଟିରେ ରଖି ଜିଲାପାଳ ଆଶୀଷ ଠାକ୍ରେ ପୋଲପାଇଁ ଡିଏମଏଫ ଅର୍ଥ ଅନୁମୋଦନ କରିଥିଲେ। ଗତ ଡିସେମ୍ବରରେ ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ ପୋଲର ଭୂମିପୂଜା କରିଥିଲେ। ଦୀର୍ଘ ୨୫ବର୍ଷ ପରେ ଏକ ସ୍ଥାୟୀ ପୋଲ ନିର୍ମାଣ କରାଯାଉଥିବାରୁ ସ୍ଥାନୀୟବାସିନ୍ଦା ଶରତ ଘଟ ୱାରୀ, ସଞ୍ଜୟ ସାହୁ, ସମୀର ରାଣା, ହରିହର ରାଉତ, ରାମ ଶଙ୍କର ଦାସ ପ୍ରମୁଖ ପ୍ରଶାସନକୁ କୃତଜ୍ଞତା ଜ୍ଞାପନ କରିଛନ୍ତି।
