ନୂଆଦିଲ୍ଲୀ,୫।୮: ଭାରତୀୟ ସୁପର ଲିଗ୍ (ଆଇଏସଏଲ) କ୍ଲବ ବେଙ୍ଗାଲୁରୁ ଏଫସି ଘରୋଇ ସିଜନର ଅନିଶ୍ଚିତତାକୁ ଦୃଷ୍ଟିରେ ରଖି ଖେଳାଳି ଏବଂ ସହାୟକ କର୍ମଚାରୀଙ୍କ ଦରମା ସ୍ଥଗିତ ରଖିବାକୁ ନିଷ୍ପତ୍ତି ନେଇଛି। ବେଙ୍ଗାଲୁରୁ ଏଫସି ସୋସିଆଲ ମିଡିଆ ଜରିଆରେ ଘୋଷଣା କରିଛି ଯେ, ଆଇଏସଏଲର ଭବିଷ୍ୟତ ଅନିଶ୍ଚିତ ଥିବାରୁ ସେମାନେ ତାଙ୍କ ଖେଳାଳି ଓ କର୍ମଚାରୀଙ୍କୁ ଅନିର୍ଦ୍ଦିଷ୍ଟ କାଳ ପାଇଁ ଦରମା ଦେବା ବନ୍ଦ କରୁଛନ୍ତି।
ଚଳିତ ବର୍ଷ ଆଇଏସଏଲ ଫୁଟବଲ ସ୍ପୋର୍ଟସ ଡେଭଲପମେଣ୍ଟ ଲିମିଟେଡ (ଏଫଏସଡିଏଲ) ଏବଂ ଅଲ ଇଣ୍ଡିଆ ଫୁଟବଲ ଫେଡେରେସନ (ଏଆଇଏଫଏଫ) ମଧ୍ୟରେ ମତଭେଦ ଯୋଗୁଁ ବନ୍ଦ ହୋଇଛି। ତେବେ, ଆଇଏଫଏଫ ଆଠଟି କ୍ଲବର ସିଇଓଙ୍କ ସହ ଏକ ବୈଠକ କରିବ, କାରଣ ଏହି କ୍ଲବଗୁଡ଼ିକ ଭାରତୀୟ ଫୁଟବଲର “ବର୍ତ୍ତମାନ ସ୍ଥିତି ଏବଂ ଦିଗ” ନେଇ ଚିନ୍ତା ପ୍ରକାଶ କରିଛନ୍ତି।
ବେଙ୍ଗାଲୁରୁ ଏଫସି ଏକ ବିବୃତିରେ କହିଛି, “ଭାରତୀୟ ସୁପର ଲିଗ୍ ସିଜନର ଭବିଷ୍ୟତ ଅନିଶ୍ଚିତତାକୁ ଦୃଷ୍ଟିରେ ରଖି ବେଙ୍ଗାଲୁରୁ ଫୁଟବଲ କ୍ଲବ ଏକ କଠିନ ନିଷ୍ପତ୍ତି ନେଇଛି ଯେ, ପ୍ରଥମ ଦଳର ଖେଳାଳି ଏବଂ କର୍ମଚାରୀଙ୍କ ଦରମା ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରହିବ। ଭାରତରେ ଏକ ଫୁଟବଲ କ୍ଲବ ଚଳାଇବା ଓ ବଞ୍ଚାଇ ରଖିବା ସବୁବେଳେ ଏକ କଠିନ ଆହ୍ୱାନ ରହିଛି, ଯାହାକୁ ଆମେ ପ୍ରତି ସିଜନରେ ଅତିକ୍ରମ କରିଛୁ।”
ସେମାନେ ଆହୁରି କହିଛନ୍ତି, “ଲିଗର ଭବିଷ୍ୟତ ଅନିଶ୍ଚିତତା ଯୋଗୁଁ ଆମେ ଏହି ପଦକ୍ଷେପ ନେବାକୁ ବାଧ୍ୟ ହେଉଛୁ। ଆମ ଖେଳାଳି, କର୍ମଚାରୀ ଏବଂ ସେମାନଙ୍କ ପରିବାରର ଭବିଷ୍ୟତ ଓ କଲ୍ୟାଣ ଆମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ, ଏବଂ ଆମେ ଏକ ସମାଧାନ ଅପେକ୍ଷା କରୁଥିବା ବେଳେ ସେମାନଙ୍କ ସହ ଯୋଗାଯୋଗରେ ଅଛୁ।”
ବର୍ତ୍ତମାନ ସମସ୍ତ ଖେଳାଳି, ଯେଉଁମାନଙ୍କ ମଧ୍ୟରେ ପୂର୍ବତନ ଭାରତୀୟ ଅଧିନାୟକ ସୁନୀଲ ଛେତ୍ରୀ ମଧ୍ୟ ଅଛନ୍ତି, ସେମାନେ ଦରମା ପାଇବେ ନାହିଁ, କିନ୍ତୁ କ୍ଲବ କହିଛି ଯେ ସେମାନଙ୍କ ଯୁବ ଦଳ ଏବଂ ଅନ୍ୟାନ୍ୟ କାର୍ଯ୍ୟକ୍ରମ ଏହି ନିଷ୍ପତ୍ତିରେ ପ୍ରଭାବିତ ହେବ ନାହିଁ।
ବେଙ୍ଗାଲୁରୁ ଏଫସି କହିଛି, “କ୍ଲବ ଖେଳର ବିକାଶ ଏବଂ ଉନ୍ନତି ପାଇଁ ପ୍ରତିବଦ୍ଧ ରହିଛି। ଆମର ଯୁବ ଦଳ – ପୁରୁଷ ଓ ମହିଳା – ଏବଂ ବିଏଫସି ସକର ସ୍କୁଲଗୁଡ଼ିକ ଏହି ନିଷ୍ପତ୍ତିରେ ଅପ୍ରଭାବିତ ରହିବ। ଆମେ ଏଆଇଏଫଏଫ ଏବଂ ଏଫଏସଡିଏଲକୁ ଏହି ଗତିରୋଧ ଶୀଘ୍ର ସମାଧାନ କରିବାକୁ ଅନୁରୋଧ କରୁଛୁ। ଏହି ଅନିଶ୍ଚିତତା କାହା ପାଇଁ ଲାଭଦାୟକ ନୁହେ, ଏବଂ ଭାରତୀୟ ଫୁଟବଲର ଭବିଷ୍ୟତ ପାଇଁ ତୁରନ୍ତ ସମାଧାନ ଅତ୍ୟନ୍ତ ଜରୁରୀ।”
