ଭବାନୀପାଟଣା,୧୮ା୭(ଉତ୍ତମ କୁମାର ଦାଶ): ବିଶ୍ୱର ସର୍ବଶ୍ରେଷ୍ଠ ଫ୍ୟାଶନ ଶୋ ‘ଲଣ୍ଡନ ଫ୍ୟାଶନ ୱିକ୍’ ପାଇଁ ଡିଜାଇନ ଚୟନ ପ୍ରକ୍ରିୟା ଆରମ୍ଭ ହୋଇଛି। ଏଥିରେ ବିଭିନ୍ନ ଦେଶର ବଡ଼ ବଡ଼ ଡିଜାଇନରଙ୍କ ପ୍ରସ୍ତୁତ ଡିଜାଇନ ସାମିଲ ହେବ। ସେଥିମଧ୍ୟରୁ କଳାହାଣ୍ଡି ଜିଲା ଜୁନାଗଡ଼ ବ୍ଲକ ଚିଚୈଗୁଡା ଗ୍ରାମର ଅନ୍ତର୍ଜାତୀୟ ଫ୍ୟାଶନ ଡିଜାଇନର୍ ସୁଜିତ ମେହେରଙ୍କ ହାବସପୁରୀ ପାଟ ଶାଢିକୁ ପ୍ରଦର୍ଶନ ପାଇଁ ଚୟନ କରାଯାଇଛି। ଆସନ୍ତା ନଭେମ୍ବର ୨୧ ଓ ୨୨ରେ ନୋଭୋଟେଲ ଲଣ୍ଡନ ହାମର୍ସ୍ମିଥଠାରେ ଏହି ଫ୍ୟାଶନ ୱିକ୍ ଅନୁଷ୍ଠିତ ହେବ। ଏଥିରେ ଭାରତ ପକ୍ଷରୁ ସୁଜିତ ପ୍ରତିନିଧିତ୍ୱ କରି ଓଡ଼ିଶାର ପ୍ରଥମ ହସ୍ତତନ୍ତ ଭାବରେ ନିଜର ସ୍ପେଶାଲ କଲେକ୍ସନ ହାବସପୁରୀ ଶାଢ଼ି ପ୍ରଦର୍ଶନ କରିବେ।
ସୁଜିତ ପାରମ୍ପରିକ ଭାରତୀୟ ହସ୍ତତନ୍ତକୁ ଆଧୁନିକ ବିଳାସପୂର୍ଣ୍ଣ ଫ୍ୟାଶନରେ ରୂପାନ୍ତରିତ କରିବା ପାଇଁ ଅନ୍ତର୍ଜାତୀୟ ସ୍ତରରେ ସ୍ବୀକୃତି ଲାଭ କରିଛନ୍ତି। ସେ ନିଜର ଲେବଲ ‘ତିଳୋତ୍ତମା’ ମାଧ୍ୟମରେ ସମ୍ବଲପୁରୀ ଏବଂ ହାବସପୁରୀ ବସ୍ତ୍ରର ପୁନରୁଦ୍ଧାର ପାଇଁ କାର୍ଯ୍ୟ କରିବା ସହ ଶତାଧିକ କାରିଗର ଓ ବୁଣାକାରଙ୍କ ପାଇଁ ସ୍ଥାୟୀ ନିଯୁକ୍ତି ସୁଯୋଗ ସୃଷ୍ଟି କରିଛନ୍ତି। ଲଣ୍ଡନ ଫ୍ୟାଶନ ୱିକ୍ ଭାରତୀୟ ଡିଜାଇନର ଶ୍ରେଷ୍ଠତାକୁ ଉତ୍ସବ ଭାବେ ପାଳନ କରୁଥିବା ଏକ ପ୍ରମୁଖ ଅନ୍ତର୍ଜାତୀୟ ପ୍ଲାଟଫର୍ମ ଭାବେ ନିଜର ସୁନାମ ଅର୍ଜନ କରିଛି। ଏହା ବିଶ୍ୱସ୍ତରୀୟ କ୍ରେତା, ଗଣମାଧ୍ୟମ, ସେଲିବ୍ରିଟି ଏବଂ ଫ୍ୟାଶନ ପ୍ରେମୀମାନଙ୍କୁ ଏକାଠି କରିବା ସହ ଭାରତର ଫ୍ୟାଶନ ଶିଳ୍ପର ସୃଜନଶୀଳତା, କାରିଗରି ଏବଂ ସାଂସ୍କୃତିକ ସମୃଦ୍ଧତାକୁ ପ୍ରଦର୍ଶନ କରିଥାଏ। ଡିଜାଇନର ସୁଜିତଙ୍କୁ ପଚାରିବାରୁ ବିଶ୍ୱର ସର୍ବଶ୍ରେଷ୍ଠ ଫ୍ୟାଶନ ଶୋ ‘ଲଣ୍ଡନ ଫ୍ୟାଶନ ୱିକ’ରେ ଓଡ଼ିଶାରୁ ପ୍ରଥମ ହସ୍ତତନ୍ତ ଭାବରେ ହାବସପୁରୀ ପାଟ ଶାଢି ପ୍ରଦର୍ଶିତ ହେବ। ଏହା ଜିଲା ତଥା ରାଜ୍ୟ ପାଇଁ ଗୌରବର ବିଷୟ ବୋଲି ସେ ପ୍ରକାଶ କରିଛନ୍ତି।
