ପୁରୀ ଅଫିସ,୩୦। ୮: ପ୍ରତିବର୍ଷ ବର୍ଷାଦିନେ ସୁଜାତାନଗର ଏବଂ ମାଟିତୋଟା ଅଞ୍ଚଳବାସୀଙ୍କ ଦୁଃଖ ବଢିଯାଏ। ମାସାଧିକ କାଳ ସେମାନେ ଜଳବନ୍ଦୀ ଜୀବନ ବିତାଇଥାନ୍ତି। ଏଥର ମଧ୍ୟ ସମ୍ପୃକ୍ତ ଅଞ୍ଚଳରେ ସମାନ ଦୁର୍ଦ୍ଦଶା ଦେଖିବାକୁ ମିଳିଛି। ଦୁଇଦିନ ପୂର୍ବରୁ ହୋଇଥିବା ବର୍ଷା ଯୋଗୁ ସୁଜାତା ନଗର ଓ ମାଟିତୋଟା ଅଞ୍ଚଳରେ ପାଣି ଜମି ରହିଛି। ଗୋଟିଏ ପଟେ ବାଇପାସ୍ ରୋଡ୍ ଯାଇଥିବା ଏବଂ ଅନ୍ୟପଟେ ଏହା ଖାଲୁଆ ଅଞ୍ଚଳ ହୋଇଥିବାରୁ ବର୍ଷାପାଣି ନିଷ୍କାସନ ହୋଇପାରୁ ନାହିିଁ। ଗତ ୩/୪ ବର୍ଷ ହେଲା ଏହି ସମସ୍ୟା ଉତ୍କଟ ରୂପ ଧାରଣ କରୁଛି। ଏ ନେଇ ଅଞ୍ଚଳବାସୀ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ କରୁଥିଲେ ମଧ୍ୟ କୌଣସି ସ୍ଥାୟୀ ପଦକ୍ଷେପ ନିଆଯାଉ ନାହିିଁ। ବାଇପାସ୍ ନିର୍ମାଣ ନ ହେବା ପୂର୍ବରୁ ପାଣି ନିଷ୍କାସନ ହୋଇ ଯାଉଥିଲା। ମାତ୍ର ଏବେ ଦୀର୍ଘଦିନ ଧରି ପାଣି ଜମି ରହୁଥିବାରୁ ସମ୍ପୃ୍କ୍ତ ଅଞ୍ଚଳବାସୀ ଦୁର୍ଦ୍ଦଶାରେ ଦିନ କାଟୁଛନ୍ତି। ସୁଜାତାନନଗର, ମାଟିତୋଟା ପଞ୍ଚମ ଲେନ୍ ରାସ୍ତାରେ ଅଣ୍ଟାଏ ଉଚ୍ଚର ପାଣି ଜମିଛି। ଫଳରେ ଲୋକେ ବାହାରକୁ ବାହାରି ପାରୁନାହାନ୍ତି। ଅତ୍ୟାବଶ୍ୟକ କାମରେ ବାହାରିଲେ ବି ବିଭିନ୍ନ ପ୍ରକାର ସଂକ୍ରାମକ ରୋଗର ଭୟ ରହୁଛି। କେତେକ ଲୋକଙ୍କଠାରେ ଚର୍ମରୋଗ ଦେଖାଦେଲାଣି ବୋଲି ମାଟିତୋଟା ପଞ୍ଚମ ଲେନ୍ର ପ୍ରବୀର ରାୟ କହିଛନ୍ତି। ଏ ନେଇ ସେମାନେ ଜିଲା ପ୍ରଶାସନ ଏପରି କି ଏସ୍ଆର୍ସିଙ୍କୁ ମଧ୍ୟ ଟୁଇଟ୍ କରି ଜଣାଇଛନ୍ତି। କିନ୍ତୁ କୌଣସି ପଦକ୍ଷେପ ନିଆଯାଇ ନ ଥିବା ରାୟ କହିଛନ୍ତି।
