ଢେଙ୍କାନାଳ ଅଫିସ୍, ୨୧।୪: କନଷ୍ଟେବଳ ସ୍ବାମୀଙ୍କ ନିର୍ଯାତନାରେ ଅତିଷ୍ଠ ହୋଇ ଜଣେ ମହିଳା ଦେହରେ ପେଟ୍ରୋଲ ଢାଳିହୋଇ ଆତ୍ମାହୁତି ଉଦ୍ୟମ କରିଛନ୍ତି। ଢେଙ୍କାନାଳ ଏସ୍ପିଙ୍କ କାର୍ଯ୍ୟାଳୟ ଆଗରେ ବୁଧବାର ମଧ୍ୟାହ୍ନରେ ଘଟିଛି ଏଭଳି ଅଭାବନୀୟ ଘଟଣା, ଯାହା ଖାକିକୁ କରିଛି ବଦନାମ।
ଆତ୍ମାହୁତି ଉଦ୍ୟମ କରିଥିବା ହିନ୍ଦୋଳ ବ୍ଲକ ବାଲିମୀ ଥାନା ଦୁଦୁରାକୋଟ ଗ୍ରାମର ଶୈଳବାଳା ସାମଲଙ୍କ ଅଭିଯୋଗ ଅନୁଯାୟୀ, ତାଙ୍କ ସ୍ବାମୀ ପବିତ୍ର ନାୟକ ଢେଙ୍କାନାଳ ରିଜର୍ଭ ପୋଲିସ ଲାଇନ୍ରେ କନଷ୍ଟେବଳ ଭାବେ କାର୍ଯ୍ୟ କରନ୍ତି। ସ୍ବାମୀ ବେଆଇନ ଭାବେ ଦ୍ୱିତୀୟ ବିବାହ କରିଛନ୍ତି। ଅଧିକାଂଶ ସମୟରେ ଶାରୀରିକ ଏବଂ ମାନସିକ ନିର୍ଯାତନା ଦେଉଛନ୍ତି। ଗତ ଡିସେମ୍ବର ୨୧ରେ ଶୈଳବାଳାଙ୍କୁ ପବିତ୍ର ମରଣାନ୍ତକ ଆକ୍ରମଣ କରିଥିଲେ। ସୂଚନା ପାଇ ବାଲିମୀ ଥାନାଧିକାରୀ ପହଞ୍ଚତ୍ ଏକ ଖଣ୍ଡା ଜବତ କରିବା ସହ ସ୍ବାମୀଙ୍କୁ ଥାନାକୁ ନେଇଯାଇଥିଲେ। ହେଲେ ପରେ ତାଙ୍କୁ ଛାଡ଼ି ଦେଇଥିଲେ। ଏହାପରେ ତାଙ୍କ ଉପରେ ନିର୍ଯାତନା ଆହୁରି ବଢ଼ିଯାଇଛି। ପୋଲିସ ଅଭିଯୁକ୍ତ ସ୍ବାମୀଙ୍କୁ ଗିରଫ କରୁ ନ ଥିବାରୁ ସେ ଆତ୍ମାହୁତି ଉଦ୍ୟମ କରିଥିବା କହିଛନ୍ତି।
ପେଟ୍ରୋଲ ଢାଳିହୋଇ ଶରୀରରେ ନିଅଁା ଲଗାଇବାକୁ ଉଦ୍ୟମ କରୁଥିବାବେଳେ ଏସ୍ପିଙ୍କ କାର୍ଯ୍ୟାଳୟରେ ଉପସ୍ଥିତ ମହିଳା କନଷ୍ଟେବଳମାନେ ଦୌଡ଼ି ଆସି ଶୈଳବାଳାଙ୍କୁ ଏଥିରୁ ନିବୃତ୍ତ କରାଇଥିଲେ। କାର୍ଯ୍ୟାଳୟରେ ପୋଲିସ ଅଧିକାରୀମାନେ ତାଙ୍କ ଅଭିଯୋଗ ଶୁଣିବା ସହ ବୁଝାଶୁଝା କରିଥିଲେ। ଏ ସଂକ୍ରାନ୍ତରେ ଅତିରିକ୍ତ ଏସ୍ପି ଶିଶୁରଞ୍ଜନ ମହାପାତ୍ର କୁହନ୍ତି, ମହିଳାଙ୍କ ଅଭିଯୋଗ ମିଳିଛି ା ଘଟଣାର ତଦନ୍ତ କରି ଆଇନ ଅନୁଯାୟୀ ପଦକ୍ଷେପ ଗ୍ରହଣ କରାଯିବ।
ଭରଣପୋଷଣ ପାଇଁ ୬୦୦୦ ଟଙ୍କା ଦେବେ
ନିର୍ଯାତନାର ଶିକାର ହୋଇଥିବା ଶୈଳବାଳାଙ୍କୁ ଭରଣପୋଷଣ ବାବଦକୁ ମାସିକ ୬୦୦୦ ଟଙ୍କା ପ୍ରଦାନ କରିବାକୁ ସ୍ବାମୀ ପବିତ୍ର ସହମତି ଜଣାଇଛନ୍ତି। ପ୍ରତି ମାସ ୩ ତାରିଖ ସୁଦ୍ଧା ସେ ଏହି ଟଙ୍କା ଦେବେ। ଏସ୍ପିଙ୍କ କାର୍ଯ୍ୟାଳୟରେ ମହିଳାଙ୍କୁ ବୁଝାଶୁଝା ପରେ ଟାଉନ ଥାନାକୁ ନିଆଯାଇଥିଲା। ସେଠାକୁ ସ୍ବାମୀ ପବିତ୍ରଙ୍କୁ ଡକାଯାଇ ଆପୋସ ଆଲୋଚନା କରାଯାଇଥିଲା। ମହିଳାଙ୍କ ପକ୍ଷରୁ କୋର୍ଟରେ ଭରଣପୋଷଣ ମାମଲା ଚାଲିଛି। ରାୟ ପ୍ରକାଶ ପାଇବା ଯାଏ ତାଙ୍କୁ ମାସିକ ୬୦୦୦ ଟଙ୍କା ପ୍ରଦାନ କରିବାକୁ ପୋଲିସ କହିଥିଲା, ଯାହାକୁ ପବିତ୍ର ମାନିନେଇଛନ୍ତି। ଅଦାଲତ ରାୟକୁ ଉଭୟେ ସମ୍ମାନ ଜଣାଇବେ ବୋଲି ପ୍ରତିଶ୍ରୁତି ଦେଇଥିବା ଟାଉନ ଥାନାଧିକାରୀ ରାଜେନ୍ଦ୍ର ମହାପାତ୍ର ସୂଚନା ଦେଇଛନ୍ତି।
