ଇନ୍ଦୋର,୨୬।୧: ମଧ୍ୟପ୍ରଦେଶର ଇନ୍ଦୋରରେ ଏକ ବଡ଼ ଅଘଟଣ ଘଟିଛି। ଅନ୍ନପୂର୍ଣ୍ଣା ଅଞ୍ଚଳ ସ୍ଥିତ ଏକ ସ୍କୁଲରେ ଜଣେ ଛାତ୍ରୀ ଖେଳୁ ଖେଳୁ ପଡ଼ିଯିବାରୁ ତାଙ୍କର ମୃତ୍ୟୁ ଘଟିଛି। ପୋଲିସ ଘଟଣାସ୍ଥଳରେ ପହଞ୍ଚି ମାମଲା ରୁଜୁ କରିବା ସହ ମୃତଦେହ ବ୍ୟବଚ୍ଛେଦ ପାଇଁ ପଠାଇଛି। ସବୁଠାରୁ ବଡ଼ କଥା ହେଉଛି ସାଧାରଣତନ୍ତ୍ର ଦିବସ ଅବସରରେ ସ୍କୁଲରେ ଛାତ୍ରୀଙ୍କୁ ଆକରିଂ କରିବାର ଥିଲା ହେଲେ ଏହା ପୂର୍ବରୁ ତାଙ୍କର ହଠାତ୍ ମୃତ୍ୟୁ ହୋଇଛି। ସୂଚନାଯୋଗ୍ୟ, ଇନ୍ଦୋର ସ୍ଥିତ ଏକ ସ୍କୁଲରେ ଏକାଦଶ ଶ୍ରେଣୀରେ ପଢ଼ୁଥିବା ୧୬ବର୍ଷର ଛାତ୍ରୀ ବୃନ୍ଦା ତ୍ରିପାଠୀ ନିଜ ସାଙ୍ଗମାନଙ୍କ ସହ ଖେଳୁଥିବା ବେଳେ ପଡ଼ିଯାଇଥିଲେ। ଏହାପରେ ସ୍କୁଲ କର୍ତ୍ତୃପକ୍ଷ ତାଙ୍କୁ ସଙ୍ଗେ ସଙ୍ଗେ ହସ୍ପିଟାଲକୁ ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତେବେ ପ୍ରାଥମିକ ତଦନ୍ତରୁ ପୋଲିସ ଅନୁମାନ କରୁଛି ଯେ, ହୃଦ୍ଘାତ ହେବାରୁ ବୃନ୍ଦାଙ୍କ ମୃତ୍ୟୁ ହୋଇପାରେ। ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣାପଡ଼ିବ ବୋଲି ପୋଲିସ କହିଛି।
