ବିରିଡି,୨୨।୧(ଡି.ଏନ୍.ଏ.): ଇଞ୍ଜିନିୟରରୁ ସଫଳ ଚାଷୀ ପାଲଟିଛନ୍ତି ଚିନ୍ମୟ ଦାଶ। ଅଣ ପାରମ୍ପରିକ ଚାଷକରି ସେ ଯୁବପିଢିଙ୍କ ପାଇଁ ପ୍ରେରଣା ସାଜିଛନ୍ତି। ବିରିଡି ବ୍ଲକ ୨୨ ମୌଜାର ଚାଷିଖଣ୍ଡ ଗ୍ରାମରେ ତାଙ୍କ ଘର। ପିତା ଚିତ୍ତରଞ୍ଜନ ଦାଶ ଜଣେ ଅବସରପ୍ରାପ୍ତ ଶିକ୍ଷକ। ଚିନ୍ମୟ ହାଇଦ୍ରାବାଦସ୍ଥିତ ଏକ ଅନୁଷ୍ଠାନରୁ ୨୦୦୦ ମସିହାରେ ଇଞ୍ଜିନିୟରିଂ ଡିଗ୍ରି ହାସଲ କରିବା ପରେ ସେଠାକାର ଏକ ଘରୋଇ କମ୍ପାନୀରେ କାର୍ଯ୍ୟ କରୁଥିଲେ। ମାତ୍ର ଚାକରିରେ ମନ ନ ଲାଗିବାରୁ ସେ ଘରକୁ ଫେରି ଆସିଥିଲେ। କରୋନା ସମୟରେ ସେ ବଗିଚାରେ ଚାଷ କରିବାକୁ ମନ ବଳାଇଲେ। ଏବେ ବଗିଚାରେ ପୋଖରୀ ଖୋଳି ମାଛ ଚାଷ କରିବା ସହ ଆମ୍ବ, କଦଳୀ, ଲେମ୍ବୁ, ସପୁରି, ନଡ଼ିଆ, ଷ୍ଟ୍ରବେରି ଓ ନାଲି ହଳଦୀ ରଙ୍ଗର କ୍ୟାପସିକମ୍ ଆଦି ଚାଷ କରି ଭଲ ରୋଜଗାର କରୁଛନ୍ତି। ଘର ଛାତ ଉପରେ ୧୦୦ଟି ଲେଖାଏ କୁଣ୍ଡରେ କରିଥିବା ଷ୍ଟ୍ରବେରି ଓ କ୍ୟାପ୍ସିକମ୍ ଚାଷକୁ ଦେଖିବାକୁ ବିଭିନ୍ନ ଅଞ୍ଚଳରୁ ଲୋକେ ଆସୁଛନ୍ତି। ବ୍ଲକ ସହକାରୀ କୃଷି ଅଧିକାରୀ ପ୍ରଦୀପ୍ତ ବେହେରା ଓ ତାଙ୍କ ସହକର୍ମୀମାନେ ତାଙ୍କ କ୍ଷେତ୍ର ପରିଦର୍ଶନ କରି ଚିନ୍ମୟଙ୍କୁ ପ୍ରଶଂସା କରିବାସହ ଅଧିକ ବୈଷୟିକ ଜ୍ଞାନ ମଧ୍ୟ ଦେଇଛନ୍ତି। ଯୁବପିଢ଼ି ଚାଷ ପ୍ରତି ଆକୃଷ୍ଟ ହେଲେ ସ୍ବପ୍ନ ପୂରଣ ହେବ ବୋଲି ଚିନ୍ମୟ କୁହନ୍ତି। ଚାଷକୁ ଅଧିକ ପ୍ରୋତ୍ସାହନ ଦେବା ପାଇଁ ଜ୍ଞାନ କୌଶଳ ଓ ମାର୍କେଟିଂ ବ୍ୟବସ୍ଥା କରିବାକୁ ସେ ସରକାରଙ୍କୁ ଅନୁରୋଧ କରିଛନ୍ତି। ଏ ସମ୍ପର୍କରେ ସହକାରୀ କୃଷି ଅଧିକାରୀ ବେହେରା କୁହନ୍ତି, ଚିନ୍ମୟ ନିଜ ଉଦ୍ୟମରେ ଅଣପାରମ୍ପରିକ ଚାଷ କରି ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି।
