୨୦% ବଢ଼ିଛି ସବ୍‌ସିଡି ଏଲ୍‌ପିଜି ଦର
9:13 amJune 27, 2020 / 21

ନୂଆଦିଲ୍ଲୀ,୨୭।୬: ଗତ ଗୋଟିଏ ବର୍ଷ ମଧ୍ୟରେ ସବ୍‌ସିଡି ଏଲ୍‌ପିଜି ଦର ୨୦% ବଢ଼ିଛି। ସମାନ ସମୟ ଅବଧି ମଧ୍ୟରେ ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦର ପ୍ରାୟ ୪୦% ଖସିଥିଲେ ମଧ୍ୟ ସବ୍‌ସିଡି ଏଲ୍‌ପିଜି ଦରରେ ଏଭଳି ବୃଦ୍ଧି ଘଟିଥିବା ଜଣାପଡିଛି। ଏଲ୍‌ପିଜିର ଚୂଡାନ୍ତ ଦର ସ୍ଥାନୀୟ ପରିବହନ ଖର୍ଚ୍ଚ ପରେ ହିଁ ନିର୍ଦ୍ଧାରିତ ହୋଇଥାଏ। ଏହାକୁ ବିଚାର କଲେ ଗ୍ରାହକ ମାମୁଲି ସବ୍‌ସିଡି କିମ୍ବା କେତେକ କ୍ଷେତ୍ରରେ ଜିରୋ ସବ୍‌ସିଡି ଲାଭ କରୁଥିବା ଜଣାପଡିଛି। ଦିଲ୍ଲୀରେ ୧୪ ଲିଟର ବିଶିଷ୍ଟ ସବ୍‌ସିଡିଯୁକ୍ତ ଏଲ୍‌ପିଜି ସିଲିଣ୍ଡରର ମୂଲ୍ୟ ଗତ ବର୍ଷ ଜୁନ୍‌ରେ ୪୯୭ ଟଙ୍କା ରହିଥିଲା। ଏହା ବର୍ତ୍ତମାନ ୫୯୩ ଟଙ୍କାକୁ ବଢିଛି। ଦିଲ୍ଲୀରେ ରହୁଥିବା ଲୋକଙ୍କର ଏଲ୍‌ପିଜି ଗ୍ୟାସ୍‌ ସବ୍‌ସିଡି ୨୪୦ ଟଙ୍କାରୁ ହ୍ରାସ ଘଟି ଶୂନ ପର୍ଯ୍ୟନ୍ତ ଆସିଯାଇଛି। ମେ ଏବଂ ଜୁନ୍‌ ଲାଗି କୌଣସି ସବ୍‌ସିଡି ରହିବ ନାହିଁ ବୋଲି ପେଟ୍ରୋଲିୟମ ମନ୍ତ୍ରଣାଳୟର ଏକ ଟୁଇଟର ହ୍ୟାଣ୍ଡେଲରେ କୁହାଯାଇଛି। ତେବେ ବର୍ତ୍ତମାନ ସବୁ ଗ୍ରାହକଙ୍କ ଲାଗି ସବ୍‌ସିଡି ଜିରୋ ହୋଇ ନ ଥିବା କୁହାଯାଇଛି। ଅପର ପକ୍ଷରେ ୧.୫ କୋଟି ଗ୍ରାହକ ସବ୍‌ସିଡି ନେଉ ନ ଥିବା ଜଣାପଡିଛି।