ନୂଆଦିଲ୍ଲୀ,୧୦ା୯: ଭାଜପାର ରାଜ୍ୟ ସଭା ସଦସ୍ୟ ସୁବ୍ରମଣ୍ୟମ ସ୍ବାମୀ ନିଜ ଦଳକୁ ମହଲତ ଦେଇଛନ୍ତି। ଭାଜପାର ସୂଚନା ଓ ପ୍ରଯୁକ୍ତିବିଦ୍ୟା (ଆଇଟି) ସେଲ ମୁଖ୍ୟ ଅମିତ ମାଲବ୍ୟଙ୍କୁ ଗୁରୁବାର ସୁଦ୍ଧା ଦଳରୁ ବହିଷ୍କାର କରା ନ ଗଲେ ସେ ନିଜ କଥା ନିଜେ ବୁଝିବେ ବୋଲି କହିଛନ୍ତି।
ସୁବ୍ରମଣ୍ୟମ ସ୍ବାମୀ କହିଛନ୍ତି, ଅମିତ ମାଲବ୍ୟ ତାଙ୍କ ବିରୋଧରେ ମିଥ୍ୟା ଟୁଇଟ୍ ବ୍ୟବହାର କରି କ୍ୟାମ୍ପେନ ଚଳାଉଛନ୍ତି। ତେଣୁ ତାଙ୍କୁ ଦଳରୁ ବାହାର କରାଯାଉ। ଏହା ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କୁ ଦିଆଯାଇଥିବା ୫ଟି ଗ୍ରାମର ଏକ ‘ବୁଝାମଣା ପ୍ରସ୍ତାବ’। ନଡ୍ଡା ଯଦି ଅମିତ ମାଲବ୍ୟଙ୍କୁ ଦଳରୁ ବହିଷ୍କାର ନ କରନ୍ତି ତେବେ ଭାଜପା ମୋ ଯୁକ୍ତିକୁ ସମର୍ଥନ କରୁନାହିଁ ବୋଲି ବୁଝିବାକୁ ହେବ। ସୁବ୍ରମଣ୍ୟମ ଆହୁରି କହିଛନ୍ତି, ଦଳରେ ଏପରି କୌଣସି ମଞ୍ଚ ନାହିଁ, ଯେଉଁଠି ସେ କ୍ୟାଡରମାନଙ୍କ ମତାମତ ଲୋଡ଼ିପାରିବେ। ତେଣୁ ତାଙ୍କୁ ନିଜ ଯୁକ୍ତିର ଯଥାର୍ଥତା ପ୍ରମାଣିତ କରିବାକୁ ପଡ଼ିବ ବୋଲି ସ୍ବାମୀ ବୁଧବାର ଟୁଇଟ୍ କରିଛନ୍ତି।
ପ୍ରକାଶ ଯେ, ସୁବ୍ରମଣ୍ୟମ ସ୍ବାମୀ ସୋମବାର ଅମିତଙ୍କ ବିରୋଧରେ ଅଭିଯୋଗ ଆଣିଥିଲେ। ଅମିତ ତାଙ୍କ ବିରୋଧରେ ଫେକ୍ ଟୁଇଟ୍ ବ୍ୟବହାର କରୁଥିବା ସେ କହିଥିଲେ। ଏହା ପୂର୍ବରୁ ଅର୍ଥନୀତି ସମେତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ସୁବ୍ରମଣ୍ୟମ ମୋଦି ସରକାରଙ୍କୁ ଟାର୍ଗେଟ କରିଆସିଛନ୍ତି। ନିକଟରେ ଜେଇଇ-ଏନ୍ଇଇଟି ପରୀକ୍ଷା ସ୍ଥଗିତ ରଖିବା ଦାବିରେ ଛାତ୍ରୀଛାତ୍ର ବିକ୍ଷୋଭ ପ୍ରଦର୍ଶନ କରୁଥିବାବେଳେ ତାକୁ ମଧ୍ୟ ସୁବ୍ରମଣ୍ୟମ ସ୍ବାମୀ ସମର୍ଥନ କରି ଭାଜପା ସରକାର ପାଇଁ ଅଡ଼ୁଆ ସ୍ଥିତି ସୃଷ୍ଟି କରିଥିଲେ।
