ପୁରୀ ଅଫିସ,୧୭।୧୦: ୫ବର୍ଷରେ ଶୁକ୍ରବାର ବହୁ ଚର୍ଚ୍ଚିତ ପୁରୀ ଟ୍ରେନ୍ ପୋଡ଼ି ମାମଲାର ରାୟ ପ୍ରକାଶ ପାଇଛି। ପୁରୀର ଆସିଷ୍ଟାଣ୍ଟ ସେସନ୍ସ ଜଜ୍ କମ୍ ସିଜେଏମ୍ ଇନ୍ଦୁ ଶର୍ମା ଏହି ମାମଲାରେ ଅଭିଯୁକ୍ତ ସୁବାସ ରାମଚନ୍ଦ୍ରଙ୍କୁ ଦୋଷୀ ସାବ୍ୟସ୍ତ କରିବା ସହ ଦଣ୍ଡ ବିଧାନ କରିଛନ୍ତି। ୪୦ ଜଣଙ୍କ ସାକ୍ଷ୍ୟ ପ୍ରମାଣକୁ ଭିତ୍ତିକରି ସୁବାସଙ୍କୁ ଧାରା ୪୩୫ ପ୍ରିଭେନ୍ଶନ ଅଫ୍ ଡ୍ୟାମେଜ ଅଫ୍ ପବ୍ଲିକ ପ୍ରପର୍ଟି ଆକ୍ଟ, ରେଲ୍ୱେ ଆକ୍ଟ ୧୪୫, ୧୪୭, ୧୫୦, ୧୫୧, ୧୫୩ ଅନୁଯାୟୀ ଦୋଷୀ ସାବ୍ୟସ୍ତ କରାଯାଇଛି। ଧାରା ୪୩୫ରେ ୫ବର୍ଷ ଜେଲଦଣ୍ଡ ସହ ୫୦ହଜାର ଟଙ୍କା ଜରିମାନା ଆଦେଶ ଦିଆଯାଇଛି। ଜରିମାନା ଅନାଦାୟ ଅଧିକ ୬ମାସ ଜେଲଦଣ୍ଡ ଭୋଗିବାକୁ ପଡ଼ିବ ବୋଲି ରାୟରେ ଉଲ୍ଲେଖ ରହିଛି।
ସୂଚନାଯୋଗ୍ୟ, ୨୦୧୫ ନଭେମ୍ବର ୧୨ରେ ପୁରୀ ଷ୍ଟେଶନରେ ଟ୍ରେନ୍ ପୋଡ଼ି ଘଟିଥିଲା। ପ୍ଲାଟଫର୍ମ ନଂ. ୨, ୪ ଓ ୬ରେ ଥିବା ୩ଟି ଟ୍ରେନ (ନନ୍ଦନକାନନ ସୁପରଫାଷ୍ଟ ଏକ୍ସପ୍ରେସ, ତିରୁପତି ଏକ୍ସପ୍ରେସ୍ ଏବଂ ପୁରୀ-ହାୱଡା ଏକ୍ସପ୍ରେସ୍)ରେ ଏକକାଳୀନ ନିଅଁା ଲାଗିଥିଲା। ଏଥିରେ ପ୍ରାୟ ୧ କୋଟି ୫ ଲକ୍ଷ ଟଙ୍କାର ସମ୍ପତ୍ତି ନଷ୍ଟ ହୋଇଥିଲା। ତତ୍କାଳୀନ ରେଲୱ ସୁପରିଣ୍ଟେଣ୍ଡେଣ୍ଟ ଖୋର୍ଦ୍ଧା ଜିଆର୍ପି ଥାନାରେ ଏକ ମାମଲା (ନଂ.୮୩/୧୫) ରୁଜୁ କରିଥିଲେ। ପରଦିନ ଅର୍ଥାତ୍ ୧୩ ତାରିଖରେ ଆରପିଏଫ୍ର ୨ଜଣ କନଷ୍ଟେବଳ ଷ୍ଟେଶନରେ ସନ୍ଦିଗ୍ଧ ଭାବେ ବୁଲୁଥିବା ତାମିଲନାଡୁର ସୁବାସ ରାମଚନ୍ଦ୍ରନଙ୍କୁ ଧରିଥିଲେ। ତାଙ୍କ ନିକଟରୁ ଗୋଟିଏ ଛୁରି, ବ୍ଲେଡ ଓ ଦିଆସିଲ ଜବତ ହୋଇଥିଲା। ଜିଆର୍ପିରେ ତଦନ୍ତ ଚାଲିଥିବାବେଳେ ନ୍ୟାଶନାଲ ଇନ୍ଭେଷ୍ଟିଗେଶନ ଏଜେନ୍ସି (ଏନ୍ଆଇଏ) ଏଥିରେ ଆତଙ୍କବାଦୀଙ୍କ ହାତ ଥିବା ସନ୍ଦେହ କରି କେସ୍କୁ ଗ୍ରହଣ କରିଥିଲେ। ତେବେ ଏଥିରେ ଆତଙ୍କବାଦୀ କାର୍ଯ୍ୟକଳାପର ସମ୍ପୃକ୍ତି ନ ଥିବା ସ୍ପଷ୍ଟ ହୋଇଥିଲା। ଏହାପରେ ପୁଣି ଏହି ମାମଲାକୁ ଜିଆର୍ପିକୁ ହସ୍ତାନ୍ତର କରାଯାଇଥିଲା। ଘଟଣାକୁ ୫ ବର୍ଷ ପୂରିବାକୁ ମାସେଠୁ କମ୍ ସମୟ ଥିବାବେଳେ ଏହାର ରାୟ ପ୍ରକାଶ ପାଇଛି। ସରକାରୀ ଓକିଲ ରାଜଶେଖର ପାଢୀ ଏହି ମକଦ୍ଦମା ପରିଚାଳନା କରୁଥିଲେ।
