ଉମରକୋଟ,୨୬।୮(ସ୍ବ.ପ୍ର.): ନବରଙ୍ଗପୁର ଜିଲା ଉମରକୋଟ ବ୍ଲକ ଅଧୀନ ସାନଭରଣ୍ଡି ଗ୍ରାମରେ ଥିବା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀ ଗୀତାଞ୍ଜଳି ଦାସଙ୍କୁ ବିଇଓ ବିକାଶ ଚନ୍ଦ୍ର ସରକାର ବଦଳି କରିଛନ୍ତି। ଗୋଷ୍ଠୀ ଶିକ୍ଷା ଅଧିକାରୀଙ୍କ ପତ୍ର ସଂଖ୍ୟା ୨୮୩୪/ ୨୪/୮/୨୨ ଅନୁଯାୟୀ ଗୀତାଞ୍ଜଳି ଦାସଙ୍କୁ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ବଡ଼କୁମାରୀକୁ ପ୍ରଧାନ ଶିକ୍ଷୟିତ୍ରୀ ଭାବେ ବଦଳି କରାଯାଇଛି। ସାନଭରଣ୍ଡି ବିଦ୍ୟାଳୟରେ ବର୍ତ୍ତମାନ କୌଣସି ପ୍ରଧାନ ଶିକ୍ଷକଙ୍କୁ ନିଯୁକ୍ତି ଦିଆ ଯାଇନାହିଁ। ସେଠାରେ ସ୍କୁଲର ବରିଷ୍ଠ ଶିକ୍ଷକଙ୍କୁ ପ୍ରଧାନ ଶିକ୍ଷକ ଦାୟିତ୍ୱରେ ରହିବା ପାଇଁ ଚିଠିରେ ଉଲ୍ଲେଖ ଅଛି। ବରିଷ୍ଠ ଶିକ୍ଷକ ଶିବ ସୁବେଦାର ପ୍ରଧାନ ଶିକ୍ଷକ ଭାବେ ଦାୟିତ୍ୱ ନେଇଛନ୍ତି।
ପ୍ରକାଶ ଯେ, ସାନଭରଣ୍ଡି ଉଚ୍ଚ ପ୍ରାଥମିକ ବିଦ୍ୟାଳୟରେ ଛାତ୍ରୀଛାତ୍ରଙ୍କୁ ରୋଷେଇ ଖର୍ଚ୍ଚ ପ୍ରଦାନରେ ପ୍ରଧାନ ଶିକ୍ଷୟିତ୍ରୀ ଗୀତାଞ୍ଜଳି ଦାସ ଚଞ୍ଚକତା କରିଥିବା ଗ୍ରାମବାସୀ ଉମରକୋଟ ବିଇଓଙ୍କ ନିକଟରେ ଅଭିଯୋଗ କରିଥିଲେ। ଏହା ଉପରେ ତଦନ୍ତ ମଧ୍ୟ ହେଇଥିଲା। ମଙ୍ଗଳବାର ଗ୍ରାମରେ ମିଟିଂ କରି ପିଲାଙ୍କୁ ବିଦ୍ୟାଳୟ ନ ଛାଡିବାକୁ ଅଭିଭାବକମାନେ ନିଷ୍ପତ୍ତି ନେଇଥିଲେ। ଏହାର ଫଳସ୍ବରୂପ ବିଦ୍ୟାଳୟରେ ଅଧ୍ୟୟନରତ ପ୍ରଥମରୁ ଅଷ୍ଟମ ଶ୍ରେଣୀର ୩୬୩ ଜଣ ଛାତ୍ରୀଛାତ୍ର ବୁଧବାର ସ୍କୁଲ ବର୍ଜନ କରିଥିଲେ। ପ୍ରଧାନ ଶିକ୍ଷୟିତ୍ରୀଙ୍କ ବଦଳି ନ ହେବା ଯାଏ ପିଲାଙ୍କୁ ବିଦ୍ୟାଳୟକୁ ପଠାଇବେ ନାହିଁ ବୋଲି ଗ୍ରାମବାସୀ ଜିଦ୍ ଧରିଥିଲେ। ପ୍ରଧାନ ଶିକ୍ଷୟିତ୍ରୀଙ୍କ ବଦଳି ପରେ ଗୁରୁବାର ୧୦୧ ଛାତ୍ରୀଛାତ୍ର ସ୍କୁଲ ଆସିଥିଲେ। ଗୁରୁବାର ବିଦ୍ୟାଳୟର ସ୍ଥିତି ଅନୁଧ୍ୟାନ ପାଇଁ ସିଆର୍ସିସି ପୂର୍ଣ୍ଣ ଆଚାରୀ ଯାଇଥିଲେ। ଗୁରୁବାର ବିଦ୍ୟାଳୟର ଏସ୍ଏମ୍ସି କମିଟି ସଦସ୍ୟ, ସଭାପତି ଏବଂ ଗ୍ରାମବାସୀ ସ୍କୁଲ ଯାଇଥିଲେ। ଶୁକ୍ରବାର ସମସ୍ତ ପିଲାଙ୍କୁ ବିଦ୍ୟାଳୟକୁ ପଠାଇବେ ବୋଲି ଅଭିଭାବକମାନେ କହିଛନ୍ତି।
