ଲକ୍ଷ୍ନୌ,୨୨।୯: ଉତ୍ତର ପ୍ରଦେଶ ସମ୍ଭାଲର ଧନରିପତ୍ତି ବିଦ୍ୟାଳୟରେ ପ୍ରଥମ ଶ୍ରେଣୀର ଜଣେ ଛାତ୍ରୀ ୧୮ ଘଣ୍ଟା କାଳ ଶ୍ରେଣୀଗୃହରେ ବନ୍ଦ ରହିଥିବା ଘଟଣା ସାମ୍ନାକୁ ଆସିଛି। ମଙ୍ଗଳବାର ସ୍କୁଲ ଛୁଟି ହେବା ପରେ ଛାତ୍ରୀ ଜଣକ ଘରକୁ ଫେରି ନ ଥିଲେ। ଛାତ୍ରୀଙ୍କୁ ଖୋଜିବାପାଇଁ ତାଙ୍କ ଆଈ ସ୍କୁଲରେ ଯାଇ ପହଞ୍ଚି ଥିଲେ ହେଁ ନାତୁଣୀଙ୍କୁ ପାଇ ନ ଥିଲେ। ଘରନିକଟରେ ଥିବା ଜଙ୍ଗଲ ଓ ପଡ଼ୋଶୀଙ୍କ ଘର ବୁଲି ଖୋଜାଖୋଜି କରିଥିଲେ ପରିବାର ଲୋକେ। କିନ୍ତୁ ୭ ବର୍ଷୀୟା ନାବାଳିକାଙ୍କ ବିଷୟରେ କୌଣସି ସୂଚନା ମିଳି ନ ଥିଲା। ବୁଧବାର ସକାଳ ୮ଟାବେଳେ ସ୍କୁଲ ଖୋଲିବା ପରେ ଜଣାପଡ଼ିଥିଲା ଯେ, ଛାତ୍ରୀ ଜଣକ ସାରା ରାତି ଶ୍ରେଣୀଗୃହରେ ବନ୍ଦ ଥିଲେ। ସ୍କୁଲ କର୍ତ୍ତୃପକ୍ଷଙ୍କ ଅବହେଳା କାରଣରୁ ଏପରି ହୋଇଥିବାରୁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ବ୍ଲକ୍ ଏଜୁକେଶନ୍ ଅଫିସର କହିଛନ୍ତି।