କୁଆଁରମୁଣ୍ଡା,୨୬।୭(ଡି.ଏନ୍.ଏ.): ସୁନ୍ଦରଗଡ଼ ଜିଲା କୁଆଁରମୁଣ୍ଡାସ୍ଥିତ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟରେ ଛାତ୍ର ଅଶାନ୍ତି ଜୋର ଧରିଛି । ମଙ୍ଗଳବାର ସକାଳୁ ଛାତ୍ରୀଛାତ୍ରମାନେ ଶ୍ରେଣୀ ଗୃହ ବର୍ଜନ କରି ବିଦ୍ୟାଳୟ ସମ୍ମୁଖରେ ପ୍ରିନ୍ସିପାଲଙ୍କ ମନୋମୁଖୀ କାର୍ଯ୍ୟକଳାପକୁ ବିରୋଧ କରିଛନ୍ତି। ଏପରିକି ଛାତ୍ରୀଛାତ୍ରଙ୍କୁ ଦୁବ୍ୟବହାର କରାଯାଉଥିବା ଅଭିଯୋଗ କରି ଛାତ୍ରୀଛାତ୍ରମାନେ ସ୍କୁଲ ପଡିଆରେ ଧାରଣାରେ ବସିଛନ୍ତି। ଏପରି କି ପ୍ରିନ୍ସିପାଲଙ୍କୁ ତୁରନ୍ତ ବହିଷ୍କାର କରିବାକୁ ଛାତ୍ରୀଛାତ୍ରମାନେ ଦାବି କରିଛନ୍ତି। ହେଲେ ଦୀର୍ଘ ସମୟ ଧରି ଖରାରେ ପିଲାମାନେ ଧାରଣାରେ ବସିଥିବା ବେଳେ ଡିଡବ୍ଲ୍ୟୁଓ ଘଟଣାସ୍ଥଳରେ ପହଞ୍ଚି ନ ଥିବା ବେଳେ କୁଆଁରମୁଣ୍ଡା ବ୍ଲକ ଡବ୍ଲ୍ୟୁଇଓ ଅଭିଜିତ୍ ପ୍ରଧାନ ଏବଂ କୁଆଁରମୁଣ୍ଡା ତହସିଲଦାର ଘଟଣାସ୍ଥଳରେ ପହଞ୍ଚି ଛାତ୍ରୀଛାତ୍ରଙ୍କୁ ବୁଝାଶୁଝା କରିଥିଲେ। ହେଲେ ଛାତ୍ରୀଛାତ୍ରମାନେ ନିଜ ଜିଦ୍ରେ ଅଟଳ ରହିଛନ୍ତି । କିଛି କାରଣ ନ ଥାଇ ପ୍ରିନ୍ସିପାଲ ଛାତ୍ରୀଛାତ୍ରମାନଙ୍କୁ ଗାଳିଗୁଲଜ କରୁଥିବା ନେଇ ଯୁକ୍ତ ୨ର କେତେକ ଛାତ୍ରୀଛାତ୍ର ଅଭିଯୋଗ କରିଛନ୍ତି । ଏପରିକି ପ୍ରିନ୍ସିପାଲ କେତେକ ଛାତ୍ରଙ୍କୁ ଗୋଇଠାରେ ମାଡ଼ ମାରୁଥିବା ଏକ ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି । ଏନେଇ ଭାରପ୍ରାପ୍ତ ପ୍ରିନ୍ସିପାଲ ଜ୍ଞାନରଞ୍ଜନ ତ୍ରିପାଠୀଙ୍କୁ ପଚାରିବାରୁ ଘଟଣାକୁ ସେ ଖଣ୍ଡନ କରିଛନ୍ତି । ଅନ୍ୟପକ୍ଷେ ୩ଦିନ ହେଲା ପ୍ରିନ୍ସିପାଲ ପୁରୀ ଯାଇଥିବା ବେଳେ ମଙ୍ଗଳବାର ବିଦ୍ୟାଳୟକୁ ଫେରିବା ବାଟରେ ଦୁର୍ଘଟଣାର ଶିକାର ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଅନ୍ୟପକ୍ଷେ ପାନପୋଷ ଉପଜିଲାପାଳ ଦୌଲତଚନ୍ଦ୍ର ଚନ୍ଦ୍ରକାର ଏବଂ କୁଆଁରମୁଣ୍ଡା ଜିଲା ପରିଷଦ ସଭ୍ୟ ରାଜେନ୍ଦ୍ର କୁଜୁରୁ , ସରପଞ୍ଚ ରାଜେଶ ହାଁସଦା ପ୍ରମୁଖ ପହଞ୍ଚି ପିଲାଙ୍କୁ ବୁଝାଶୁଝା କରି କ୍ଲାସ ରୁମ୍କୁ ନେଇଥିବା ଜଣାପଡିଛି।
