ଦାରିଙ୍ଗବାଡି, ୮।୨(ଅରୁଣ ସାହୁ ): କନ୍ଧମାଳ ଜିଲା ଦାରିଙ୍ଗବାଡି ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ପୁଣି ଆଉ ଏକ ଅଘଟଣ ଘଟିଛି । ଜଣେ ନବମ ଶ୍ରେଣୀ ଛାତ୍ର ଶୁକ୍ରବାର ସଂନ୍ଧ୍ୟାରୁ ନିଖୋଜ ହୋଇଯାଇଥିବା ନେଇ ଅଭିଯୋଗ ହୋଇଛି । ଫଳରେ ବିଦ୍ୟାଳୟର ତ୍ରୁଟିପୂର୍ଣ୍ଣ ବ୍ୟବସ୍ଥା ଓ ଜିଲା ଅଧିକାରୀଙ୍କ କୌଣସି ନିଘା ନଥିବା ନେଇ ଏବେ ଚର୍ଚ୍ଚା ହେଉଛି ।
ଶୁକ୍ରବାର ଛାତ୍ର ନିଖୋଜ ପରେ ବିଭିନ୍ନ ସ୍ଥାନରେ ଖୋଜାଖୋଜି ପରେ ବିଦ୍ୟାଳୟ କର୍ତ୍ତ୍ୟୁପକ୍ଷ ଶନିବାର ଦାରିଙ୍ଗବାଡି ଥାନାର ଦ୍ୱାରସ୍ଥ ହୋଇଥିବା ଜଣାପଡିଛି । ନିଖୋଜ ଛାତ୍ରଙ୍କ ନାମ କିଶାନ ବେହେରା(୧୪ )ବୋଲି ପୋଲିସ ସୂତ୍ର ରୁ ଜଣାପଡିଛି । ପୋଲିସ ଅଭିଯୋଗ ପାଇବା ପରେ ଘଟଣାର ତଦନ୍ତ କରୁଥିବା ଆଇଆଇସି ସଂଗ୍ରାମ କେଶରୀ ଜେନା କହିଛନ୍ତି । ତେବେ ଛାତ୍ର ଜଣଙ୍କ ଛାତ୍ରାବାସରେ ରହୁଥିବା ବେଳେ ତାଙ୍କ ଘର ଫୁଲବାଣୀ ସଦର ଥାନା ସୁଦୃକୁମ୍ପା ଅଞ୍ଚଳର ଅର୍ଜୁନ ବେହେରାଙ୍କ ପୁଅ ବୋଲି ଜଣାପଡିଛି । ବିଦ୍ୟାଳୟ କର୍ତ୍ତୃପକ୍ଷ ଖୋଜାଖୋଜି କରି ତାଙ୍କ ପରିବାର ଲୋକଙ୍କୁ ମଧ୍ୟ ପଚରାଉଚରା କରିଥିଲେ ତେବେ ନିଖୋଜ ଛାତ୍ର ତାଙ୍କ ଘରକୁ ଯାଇନଥିବା କୁହାଯାଇଛି । ଛାତ୍ର ଜଣଙ୍କ କିଭଳି ଛାତ୍ରାବାସ ଛାଡି କୁଆଡେ ଚାଲିଗଲେ ବା କ’ଣ ତାଙ୍କ ସହ ଅଘଟଣ ଘଟିଛି ଛାତ୍ର ଜଣଙ୍କ ଏବେ କୋଉଠି ତାକୁ ନେଇ ଏବେ ସମସ୍ତେ ଚିନ୍ତାରେ ।
ସେପଟେ ବିଦ୍ୟାଳୟରେ ସୁପରଟେଣ୍ଟେଣ୍ଡ ଙ୍କ ସମେତ ସିସିଏ (କୁକ କମ୍ ଆଟେଣ୍ଡାଣ୍ଟ )ପୋଷ୍ଟିଂ କରାଯାଇଥିଲେ ମଧ୍ୟ ଦାୟିତ୍ୱ ହୀନତା ଯୋଗୁଁ ଏବେ ଛାତ୍ରାବାସରେ ଓ ଉକ୍ତ ବିଦ୍ୟାଳୟରେ ବରମ୍ବାର ଅଘଟଣ ଘଟୁଛି । ଗତ ମାସରେ ଜଣେ ନବମ ଶ୍ରେଣୀ ଛାତ୍ର କାନ୍ଥ କଣା କରି ନିଶା ପାଇଁ ବାହାରକୁ ଯାଇ ନିଶାସକ୍ତ ଅବସ୍ଥାରେ ଛାତ୍ରାବାସ କୁ ଫେରିଥିବାରୁ ତାଙ୍କୁ ବିଦ୍ୟାଳୟ କର୍ତ୍ତୃପକ୍ଷ ଛାତ୍ରାବାସରୁ ବହିଷ୍କାର କରିଦେଇଥିଲେ । ଏହି ଘଟଣାରେ ଆଜି ପର୍ଯ୍ୟନ୍ତ ଜିଲାପ୍ରଶାସନ କୌଣସି ତଦନ୍ତ କରି ନଥିବା ବେଳେ ସରସ୍ବତୀ ପୂଜା ଦିନ ଉକ୍ତ ବିଦ୍ୟାଳୟରେ ମଧ୍ୟାହ୍ନ ଭୋଜନ ରୋଷେଇ କରାଯାଇନଥିବାରୁ ଶତାଧିକ ଛାତ୍ରୀଛାତ୍ର ଭୋକରେ ଘରକୁ ଫେରିଥିଲେ । ଏହାରି ଭିତରେ ପୁଣି ନବମ ଶ୍ରେଣୀ ଛାତ୍ର ନିଖୋଜ ଘଟଣାରେ ବିଦ୍ୟାଳୟ କର୍ତ୍ତୃପକ୍ଷଙ୍କ ପାରିବା ପଣିଆକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି ।
ଏନେଇ ବିଭାଗର ଜିଲା ମଙ୍ଗଳ ଅଧିକାରୀ ରବିନାରାୟଣ ମିଶ୍ରଙ୍କ ପ୍ରତିକ୍ରିୟା ନିଆଯିବାରୁ ସେ ଏହାକୁ ସ୍ୱିକାର କରିବା ସହ ଯେଉଁ ଛାତ୍ର ଏବେ ନିଖୋଜ ରହିଛନ୍ତି ସେ ପୁର୍ବରୁ ମଧ୍ୟ ହଷ୍ଟେଲ ଛାଡି ପଳାଇଥିବା ନଜିର ରହିଛି । ଏବେ ଆମେ ଉକ୍ତ ଛାତ୍ରଙ୍କୁ ଖୋଜୁଛୁ ଶୀଘ୍ର ସେ ଧରାପଡ଼ିବେ ଓ ତାଙ୍କ ପରିବାର ଲୋକ ସହ ଯୋଗାଯୋଗ ରେ ରହିଛୁ ବୋଲି କହିଛନ୍ତି । ସେହିପରି ବିଦ୍ୟାଳୟର ଅବ୍ୟବସ୍ଥା ସମ୍ପର୍କରେ ସୁଧାର ଆଣିବାକୁ ସେ ବିଦ୍ୟାଳୟର ପ୍ରଧାନ ଶିକ୍ଷକ ଉମାଶଙ୍କର ସାମନ୍ତରାୟ ଙ୍କୁ ନିର୍ଦ୍ଦେଶ ଦେବି ବୋଲି କହିଛନ୍ତି । ବିଦ୍ୟାଳୟର ଅବ୍ୟବସ୍ଥା ଓ ଛାତ୍ର ନିଖୋଜ ପରେ ଅଭିଭାବକ ମହଲରେ ଚିନ୍ତା ବଢିବାରେ ଲାଗିଛି ।
