ଦାରିଙ୍ଗବାଡି, ୧୬।୪ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ଡବେରୀ ଅଞ୍ଚଳରେ ନିଶାମୁକ୍ତ ଅଞ୍ଚଳ ପାଇଁ ଜୋରଦାର ପଦକ୍ଷେପ ନେଲେ ଅଞ୍ଚଳବାସୀ। ଶତାଧିକ ମହିଳା ଓ ପୁରୁଷ ଏକାଠି ହୋଇ ଚୋରାମଦ କାରବାର କରୁଥିବା ଲୋକଙ୍କ ନିକଟରେ ପହଞ୍ଚି ଖୋଲା ସ୍ଥାନରେ ଲୁଚାଇ ରଖିଥିବା ମହୁଲ ପୋଚ ଓ ଦେଶୀ ମଦକୁ ନଷ୍ଟ କରିଛନ୍ତି। ଶତାଧିକ ଲିଟର ମହୁଲ ପୋଚ ସହ ମଦ ରନ୍ଧା ସାମଗ୍ରୀକୁ ମଧ୍ୟ ଭାଙ୍ଗି ଚୁରମାର କରିବା ସହ ନିଆଁ ଲଗାଇ ସେଗୁଡିକୁ ପୋଡିଦେଇଥିଲେ ।
ପ୍ରକାଶ ଯେ, ପୂର୍ବରୁ ଅଞ୍ଚଳରେ ଚୋରାମଦ କାରବାର ବନ୍ଦ କରିବାକୁ ଗ୍ରାମରେ ବୈଠକ ବସିଥିଲା। ଚଳିତ ୫ ତାରିଖଠାରୁ ଆଉ ଏହି କାରବାର କରିବୁ ନାହିଁ ବୋଲି ଚୋରାମଦ କାରବାର କରୁଥିବା ବ୍ୟବସାୟୀମାନେ ଲୋକଙ୍କୁ ପ୍ରତିଶୃତି ଦେଇଥିଲେ। ୬ରେ ଗ୍ରାମ୍ୟ କମିଟି, ବିର୍ସାମୁଣ୍ଡା ଯୁବକ ସଂଘ ଏବଂ ଏସଏଚଜି ମହିଳାମାନେ ଗାଁରେ ବୈଠକ କରି ନିଶାମୁକ୍ତ କରିବାକୁ ନିଷ୍ପତି ନେବା ସହ ଏହି କାରବାରରେ ଲିପ୍ତ ଥିବା ବ୍ୟବସାୟୀଙ୍କୁ ଏହି ବ୍ୟବସାୟ କଲେ ୨୦ ହଜାର ଜରିମାନା କରିବାକୁ କମିଟି ଗୁଡିକ ନିଷ୍ପତି ନେଇଥିଲେ। ସଭା ଓ ଶୋଭାଯାତ୍ରା କରି ଥାନା ରେ ପହଞ୍ଚି ନିଶାମୁକ୍ତ କରିବାକୁ ସହଯୋଗ କରିବାକୁ ଆଇଆଇସି ସଂଗ୍ରାମ କେଶରୀ ଜେନାଙ୍କୁ ଲିଖିତ ଦାବି ପତ୍ର ପ୍ରଦାନ କରିଥିଲେ। କିନ୍ତୁ ଏବେ ମଧ୍ୟ ଏହି କାରବାର ଜାରି ରହିଥିବାରୁ ଡବେରୀ ଅଞ୍ଚଳରେ ତୀବ୍ର ଅସନ୍ତୋଷ ଦେଖାଯାଇଛି। ଚୋରା ବ୍ୟବସାୟୀମାନେ ଏହି ବ୍ୟବସାୟ ବନ୍ଦ ନ କଲେ ଆଗାମୀ ଦିନରେ ଆନ୍ଦୋଳନକୁ ତୀବ୍ରତର କରାଯିବାକୁ ଅଞ୍ଚଳବାସୀ ଚେତାବନୀ ଦେଇଛନ୍ତି। ଏହି କାରବାର ବୃଦ୍ଧି ଯୋଗୁ ଅନେକ ଯୁବଗୋଷ୍ଠୀ, ଗରିବ ସାମାରେଖା ତଳେ ରହିଥିବା ପରିବାର ସର୍ବସ୍ବ ହରାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।