କେନ୍ଦୁଝର,୧୪।୫(ସ୍ବ.ପ୍ର.): ପରିବାରରେ ସନ୍ତାନମାନଙ୍କ ଭବିଷ୍ୟତ ଗଠନରେ ମାତାପିତାଙ୍କ ଭୂମିକା ଗୁରୁତ୍ୱପୂର୍ଣ୍ଣ। କିନ୍ତୁ ସନ୍ତାନର ଲାଳନପାଳନ ସହ ଘର, ପରିବାର ଚଳାଇବାରେ ମା’ଙ୍କ ଗୁରୁତ୍ୱ ଅଧିକ। ନିଜ ପିଲା ଓ ପରିବାର ପାଇଁ ସବୁ କିଛି ତ୍ୟାଗ କରିବାକୁ ଆଗେଇ ଆସେ ମା’। ଛୋଟରୁ ବଡ ଯାଏ ପିଲାଙ୍କୁ ସମ୍ଭାଳିବା ମା’ଙ୍କ ପାଇଁ ଚ୍ୟାଲେଞ୍ଜ ହୋଇଥାଏ। ଏଣୁ କୁହାଯାଏ ମା’ଙ୍କ ବଳିଦାନ ସବୁବେଳେ ଅପୂରଣୀୟ। ଏହାର ମୂଲ୍ୟକୁ ସନ୍ତାନମାନେ ଜୀବନବ୍ୟାପୀ ଉଦ୍ୟମ କରି ମଧ୍ୟ ପରିଶୋଧ କରିପାରନ୍ତି ନାହିଁ। କେନ୍ଦୁଝର ସହରରେ ଏଭଳି ଜଣେ ମହିଳା ଅଛନ୍ତି ଯେ କି, ସ୍ବାମୀଙ୍କୁ ହରାଇବା ପରେ ମଧ୍ୟ ପିଲାମାନଙ୍କ ଲାଳନପାଳନ ସହ ମଣିଷ କରିବାରେ ପଛଘୁଞ୍ଚା ଦେଇନାହାନ୍ତି। ସେ ହେଉଛନ୍ତି ସୁଶୀଳା ମିଶ୍ର।
ସୁଶୀଳାଙ୍କ ସ୍ବାମୀ ପ୍ରଭାସ କୁମାର ମିଶ୍ର ବନାଞ୍ଚଳ ଅଧିକାରୀ ଭାବେ କାମ କରୁଥିଲେ। ୨୦୦୭ରେ ଦେବଗଡ଼ରୁ ଢେଙ୍କାନାଳ ଆସୁଥିବା ବେଳେ ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଥିଲା। ସେତେବେଳେ ବଡ଼ ପୁଅ ସୌମ୍ୟ କୁମାର ଯୁକ୍ତ ୨ରେ ଅଧ୍ୟୟନ କରି ଇଞ୍ଜିନିୟରିଂ ପାଠ ପାଇଁ ପ୍ରସ୍ତୁତି ହେଉଥିଲେ। ସାନ ପୁଅ ଦେବପ୍ରିୟ କୁମାର ସ୍ଥାନୀୟ ବିଦ୍ୟାଳୟରେ ୭ମ ଶ୍ରେଣୀରେ ପଢୁଥିଲେ। ବାପାଙ୍କ ଦେହାନ୍ତ ପରେ ଦୁଇ ପିଲା ବେସାହାରା ହୋଇଯାଇଥିଲେ ହେଁ ମା’ ହିଁ ଥିଲେ ସବୁକିଛି ବୋଲି ମାତୃ ଦିବସ ଅବସରରେ ଦୁଇ ପୁଅ କହିଛନ୍ତି।
ଓଡ଼ିଆ ସମାଜରେ ହଠାତ୍ ଜଣେ ମହିଳା ବାହାରକୁ ଯାଇ ଚାକିରି କରିବା ସମ୍ଭବପର ନ ଥିଲା। ଏଣୁ ସ୍ବାମୀଙ୍କ ପେନ୍ସନ ବାବଦକୁ ମିଳିଥିବା ମାସିକ ୭ ହଜାର ଟଙ୍କାରେ ଘର ପରିବାର ଏବଂ ପିଲାଙ୍କ ପାଠ ପଢ଼ାକୁ ଜାରି ରଖିବା ପାଇଁ ଉଦ୍ୟମ କରିଥିଲେ। ସେଥିରୁ ବଡପୁଅ ପାଠ ପଢ଼ା (କୋଚିଂ) ପାଇଁ ୫ ହଜାର ଟଙ୍କା ଦେବାକୁ ପଡୁଥିଲା। ଅବଶିଷ୍ଟ ୨ହଜାର ଟଙ୍କାରୁ ଦେଢ଼ ହଜାର ଟଙ୍କା ଘର ଭଡ଼ା, ବାକି ପଇସାରେ ଘର ଚଳୁଥିଲା। ତେବେ ମାମୁଘର ପକ୍ଷରୁ କିଛି ସହାୟତା ମିଳୁଥିଲା। ପରବର୍ତ୍ତୀ ସମୟରେ ବାପାଙ୍କ ବକେୟା ଟଙ୍କା ଆଣି ମା’ ସୁଶୀଳା ବଡ଼ ପୁଅଙ୍କ ଇଞ୍ଜିନିୟରିଂ ପାଠରେ ଖର୍ଚ୍ଚ କରିଥିଲେ। ତୁରନ୍ତ ଘରର ସ୍ଥିତି ସୁଧାରିବାକୁ ବଡପୁଅ ଚାକିରି କରିଥିଲେ। ଏବେ ସେ ଆମେରିକାରେ ସଫ୍ଟଓ୍ବେୟାର ଡେଭ୍ଲପର ଭାବରେ କାମ କରୁଛନ୍ତି। ବଡପୁଅର ପାଠପଢା ପରେ ଦେବପ୍ରିୟଙ୍କୁ ଇଞ୍ଜିନିୟରିଂ ପଢିବାରେ ମା’ ସହାୟତା କରିଥିଲେ। ଇଞ୍ଜିନିୟରିଂ ପାଠ ସାରି ସେ ଏମ୍ବିଏ ପଢ଼ିଥିଲେ। ଏବେ ରିଲାଏନ୍ସ ପେଟ୍ରୋଲିୟମରେ କାମ କରୁଛନ୍ତି ବୋଲି ଦେବପ୍ରିୟ କହିଛନ୍ତି।
ଦେବପ୍ରିୟ କୁହନ୍ତି, ମା’ ନିଜର ସୁଖକୁ ଛାଡ଼ି ଆମ ଦୁଇ ପୁଅଙ୍କ ଭବିଷ୍ୟତ ଗଢ଼ିବା ସହ ପ୍ରତିକୂଳ ପରିସ୍ଥିତିରେ ଦେଖାଇଥିବା ସାହସ ସତରେ ପ୍ରଶଂସାଯୋଗ୍ୟ। ଏବେ ମାଆ କିପରି ଖୁସି ଓ ଶାନ୍ତିରେ ରହିବେ ସେ କଥା ଚିନ୍ତା କରୁଛୁ ଏବଂ ତାଙ୍କ ସବୁ ଇଚ୍ଛା ପୂରଣ କରିବାକୁ ଆମେ ଚେଷ୍ଟା କରୁଛୁ ବୋଲି କହିଥିଲେ। ପିଲାମାନେ କିପରି ପାଠ ପଢ଼ିବେ ସେଥି ପାଇଁ ଚିନ୍ତିତ ଥିଲି। ସେମାନଙ୍କୁ ନିଜ ଗୋଡ଼ରେ ଛିଡ଼ା କରାଇବା ପାଇଁ ପ୍ରଚେଷ୍ଟା କରିଛି, ଯାହାର ଫଳ ଏବେ ମୁଁ ପାଇଛି ବୋଲି ସୁଶୀଳା କହିଛନ୍ତି।
