ସତ୍ୟ ଖବର ପରିବେଷଣର ସ୍ବାଧୀନତା ମିଳୁ
ବର୍ତ୍ତମାନ ସମୟରେ ସ୍ବାଧୀନତା ଶବ୍ଦର ପରିଭାଷା ବଦଳି ଯାଇଛି। କିଛି କ୍ଷେତ୍ରରେ ଆମେ ମତାମତକୁ ବଦଳାଇ ପାରିବା, ମାତ୍ର ସତ୍ୟକୁ କେବେବି ବଦଳାଇ ପାରିବା ନାହିଁ। କେତେକ ସମୟରେ ପରିବେଷଣ ହେଉଥିବା ଖବରରେ ସତ୍ୟାସତ୍ୟ ରହୁନାହିଁ। ଫଳରେ ଗଣମାଧ୍ୟମ ତାହାର ମୂଲ୍ୟବୋଧ ହରାଉଛି। ତେଣୁ ଏ ସବୁ ଦିଗକୁ ଧ୍ୟାନ ଦେଇ ସାମ୍ବାଦିକମାନଙ୍କୁ ସତ୍ୟ ଖବର ପରିବେଷଣର ସ୍ବାଧୀନତା ଦିଆଯିବା ଦରକାର।
– ଡ. ନଳିନୀ ପାତ୍ର, ଏଚ୍ଓଡି, ଜର୍ନାଲିଜମ୍ ଆଣ୍ଡ୍ ମାସ୍ କମ୍ୟୁନିକେଶନ୍, ବିଜେବି ମହାବିଦ୍ୟାଳୟ
ଦାୟିତ୍ୱପୂର୍ଣ୍ଣ, ନୈତିକତା ରହିବା ଆବଶ୍ୟକ
ତୃଣମୂଳସ୍ତରରେ କାମ କରୁଥିବା ରିପୋର୍ଟର ବା ସାମ୍ବାଦିକଙ୍କ ଠାରୁ ଆରମ୍ଭ କରି ମାଲିକଙ୍କ ପର୍ଯ୍ୟନ୍ତ ସମସ୍ତଙ୍କ ପାଖରେ ଦାୟିତ୍ୱପୂର୍ଣ୍ଣ, ନୈତିକତା ଆଦି ଗୁଣ ରହିବା ଜରୁରୀ। ଲୋକଙ୍କ ବାସ୍ତବ ସମସ୍ୟାକୁ ସର୍ବ ସମ୍ମୁଖକୁ ଆସିବା ଦରକାର। ଏଥିସହ ବିନା ଭୟରେ ସତ୍ୟ ଖବର ପରିବେଷଣ କରିବା ଆବଶ୍ୟକ। ତେବେ ହିଁ ପ୍ରେସ୍ ସ୍ବାଧୀନତା ଦିବସର ପ୍ରକୃତ ମୂଲ୍ୟ ମିଳି ପାରିବ।
– ଡ. ସନ୍ତୋଷ କୁମାର ବିଶ୍ୱାଳ, ଆସୋସିଏଟ୍ ପ୍ରଫେସର, ଜର୍ନାଲିଜମ୍ ଆଣ୍ଡ ମାସ୍ କମ୍ୟୁନିକେଶନ୍
ଏମାନଙ୍କୁ ପ୍ରେରଣା ଦରକାର
ବର୍ତ୍ତମାନ ଓଡ଼ିଶାରେ ସାମ୍ବାଦିକମାନେ ଅନେକ ଚାପ ଓ ବିପଦରେ କାମ କରୁଛନ୍ତି, ରାଜନୈତିକ ହସ୍ତକ୍ଷେପ, ଆର୍ଥିକ ଅସୁରକ୍ଷା ଓ ସାମାଜିକ ଆକ୍ରମଣ ସେମାନଙ୍କ ସ୍ବାଧୀନତାକୁ ହରଣ କରୁଛି। ଏହି ଦିବସରେ ଆମେ ସାମ୍ବାଦିକମାନଙ୍କୁ ନିର୍ଭୀକ ହେବାକୁ, ସତ୍ୟର ସୁରକ୍ଷା କରିବାକୁ ଓ ଗଣତନ୍ତ୍ରର ପ୍ରହରୀ ହେବାକୁ ପ୍ରେରଣା ଦେବା ଜରୁରୀ। ଓଡ଼ିଶାରେ ଗଣମାଧ୍ୟମର ମର୍ଯ୍ୟାଦା ଫେରାଇ ଆଣିବାକୁ ସରକାର, ସମାଜ ଓ ସାମ୍ବାଦିକମାନେ ଏକାଠି ହୋଇ ସ୍ବଚ୍ଛ, ନୈତିକ ଓ ମୁକ୍ତ ସାମ୍ବାଦିକତାର ସ୍ବପ୍ନ ସାକାର କରିବା ଆବଶ୍ୟକ।
– ସୁରଜ କୁମାର ବେହେରା, ଜର୍ନାଲିଜମ୍ ଛାତ୍ର
ଗଣମାଧ୍ୟମର ସୁରକ୍ଷା ଜରୁରୀ
ବିଶ୍ୱରେ ବୈପ୍ଲବିକ ପରିବର୍ତ୍ତନ ଆଣିବାରେ ଗଣମାଧ୍ୟମର ଭୂମିକା ଅତୁଳନୀୟ। କିନ୍ତୁ ପରିବର୍ତ୍ତନର ସୁଅରେ ଆଜି କେଉଁଠି ନା କେଉଁଠି ଗଣମାଧ୍ୟମ ବାଟବଣା ହେଉଛି। ପୁଣି ‘ଗଣମାଧ୍ୟମ’ ଏବେ ଖବର ପରିବେଷଣ କରି ହିଂସାର ଶିକାର ହେଉଛି। ତେଣୁ ଗଣମାଧ୍ୟମର ସୁରକ୍ଷା ଏବେ ଜରୁରୀ ହୋଇପଡ଼ିଛି।
– ଶୁଭଶ୍ରୀ ପରିଡ଼ା, ଜର୍ନାଲିଜମ୍ ଛାତ୍ରୀ
ଲୋକଙ୍କ ସ୍ବର ହୋଇଛି ଗଣମାଧ୍ୟମ
ଗଣମାଧ୍ୟମ ଜନସାଧାରଣଙ୍କ ସ୍ବାର୍ଥ ପ୍ରସଙ୍ଗରେ ଉଲ୍ଲେଖ କରିବା ସହ କ୍ଷମତାରେ ଥିବା ଲୋକଙ୍କୁ ଉତ୍ତରଦାୟୀ କରିବାକୁ ଏବଂ ଗଣତାନ୍ତ୍ରିକ ପ୍ରକ୍ରିୟାରେ ସଂପୂର୍ଣ୍ଣ ଅଂଶଗ୍ରହଣ କରିବାକୁ ପ୍ରୋତ୍ସାହିତ କରିଥାଏ। ଗଣମାଧ୍ୟମ ସବୁବେଳେ ଲୋକଙ୍କ ସ୍ବର ହୋଇ ସମାଜର ତୃଣମୂଳସ୍ତରରୁ ସମସ୍ୟାକୁ ସମାଧାନ କରିବା ପାଇଁ ଅହରହ ପ୍ରୟାସ କରୁଛି।
– ଦେବାଶିଷ ସାହୁ, ଜର୍ନାଲିଜମ୍ ଛାତ୍ର
