ଦାରିଙ୍ଗବାଡ଼ି,୨୨ା୧୨(ଅରୁଣ ସାହୁ): ଓଡ଼ିଶାର କଶ୍ମୀର ଭାବେ ପରିଚିତ କନ୍ଧମାଳ ଜିଲା ଦାରିଙ୍ଗବାଡ଼ି ଆଉ କିଛି ଦିନ ପରେ ପାଳିବ ଶୀତ ମହୋତ୍ସବ। ଏଥିପାଇଁ ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି। ବୈଠକରେ ବାରମ୍ବାର ଦାରିଙ୍ଗବାଡ଼ିର ସମସ୍ତ ରାସ୍ତାଘାଟରେ ଲାଗିଥିବା ସୋଲାର ଷ୍ଟ୍ରିଟ୍ ଲାଇଟ୍ ଅଚଳ ହୋଇପଡ଼ିଛି। ତାକୁ ତୁରନ୍ତ ମରାମତି କରାଯିବାକୁ ଠିକାସଂସ୍ଥାକୁ ନିର୍ଦ୍ଦେଶ ଦିଆଯାଇଥିଲା। ଠିକାସଂସ୍ଥା ମଧ୍ୟ ୩ ଦିନ ମଧ୍ୟରେ ମରାମତି କାର୍ଯ୍ୟ ଆରମ୍ଭ କରିବି ବୋଲି ପ୍ରତିଶ୍ରୁତି ଦେଇଥିଲା। ଇତି ମଧ୍ୟରେ ୧ ମାସ ବିତିଲା କିନ୍ତୁ ପ୍ରଶାସନକୁ କଥା ଦେଇ କଥା ରଖି ନ ଥିବା ଅଭିଯୋଗ ହେଉଛି। ଦାରିଙ୍ଗବାଡ଼ି ଅଞ୍ଚଳବାସୀ ସମେତ ଦାରିଙ୍ଗବାଡ଼ି ବୁଲିବାକୁ ଆସୁଥିବା ପର୍ଯ୍ୟଟକ ସନ୍ଧ୍ୟା ହେଲେ ଦାରିଙ୍ଗବାଡ଼ି ଅଞ୍ଚଳରେ ବୁଲିବା ସୁରକ୍ଷିତ ମଣୁ ନାହାନ୍ତି। ଏହାକୁ ନେଇ ଜନ ଅସନ୍ତୋଷ ବୃଦ୍ଧି ପାଉଛି।
ସୋମବାର ବଡ଼ଦିନ ପାଳନ ପାଇଁ ଶାନ୍ତି କମିଟି ବୈଠକ ଅନୁଷ୍ଠିତ ହେବାକୁ ରହିଛି। ଏହି ବୈଠକରେ ଏହି ଷ୍ଟ୍ରିଟ୍ ଲାଇଟ୍ ଯାହାକି ଲୋକଙ୍କୁ ଅଶାନ୍ତି କରାଉଛି। ସେ ପ୍ରସଙ୍ଗ ମୁଖ୍ୟ ପ୍ରସଙ୍ଗ ରହିବ ବୋଲି ଦାରିଙ୍ଗବାଡ଼ିର ତିଆଡ଼ି ନାୟକ କହିଛନ୍ତି।
ସୂଚନାଯୋଗ୍ୟ, ୫୯ ନଂ ଜାତୀୟ ରାଜପଥକୁ ଆରକେଡି ଠିକାସଂସ୍ଥା ସମ୍ପ୍ରସାରଣ କରିଥିଲା। ଏହି ସମୟରେ ରାଜପଥ କଡ଼ରେ ପ୍ରତି ୩୦ମିଟର ଦୂରତାରେ ସୋଲାର ପ୍ୟାନେଲ, ବେଟେରୀ ଥାଇ ଷ୍ଟ୍ରିଟ୍ ଆଲୁଅ ବ୍ୟବସ୍ଥା କରିଥିଲା କିନ୍ତୁ ଅଳ୍ପ କିଛି ଦିନ ମଧ୍ୟରେ ପ୍ରାୟ ସମସ୍ତ ଷ୍ଟ୍ରିଟ୍ ଆଲୁଅରୁ ଚୋରି ସହ ଭଙ୍ଗାରୁଜା ହୋଇରହିଛି। ତେବେ ଏହାର ରକ୍ଷଣାବେକ୍ଷଣ ଦାୟିତ୍ୱ ଉକ୍ତ ଠିକାସଂସ୍ଥାର ରହିଥିବା ବେଳେ ସଂସ୍ଥା ଏହା କରୁ ନ ଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଏନେଇ ସ୍ଥାନୀୟ ଲୋକ ଜିଲାପାଳ ବେଦଭୂଷଣଙ୍କ ସମେତ ବାଲିଗୁଡ଼ା ଉପଜିଲାପାଳ ପ୍ରଣୀତା ଦାସ, ବିଡିଓ ପ୍ରୀତିରଞ୍ଜନ ରଥ, ତହସିଲଦାର ଧୀରୋଜ ପାତ୍ରଙ୍କ ଦୃଷ୍ଟି ଆକର୍ଷଣ କରିଥିଲେ। ପ୍ରଶାସନ ମଧ୍ୟ ଠିକାସଂସ୍ଥାର ପ୍ରକଳ୍ପ ପରିଚାଳକଙ୍କୁ ଡକାଇ ତୁରନ୍ତ ମରାମତି କରିବାକୁ ନିର୍ଦ୍ଦେଶ ଦେଇଥିଲେ ହେଲେ ଆଜି ପର୍ଯ୍ୟନ୍ତ ଠିକାସଂସ୍ଥା ନିରବ ବସିଥିବା ପୁଣି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଉକ୍ତ ବ୍ଲକର କିରିକୁଟି ପଞ୍ଚାୟତ ସମେତ ସିମନବାଡ଼ି, ଶ୍ରାନିକେତା, ଦାରିଙ୍ଗବାଡ଼ି ଏବଂ ସିଆଙ୍ଗବାଲି ପଞ୍ଚାୟତ ଦେଇ ଯାଇଥିବା ରାଜପଥ କଡ଼ରେ ଏବେ ୩ ଶହରୁ ଊର୍ଦ୍ଧ୍ୱ ଷ୍ଟ୍ରିଟ୍ ଆଲୁଅ ଅଚଳ ହୋଇପଡ଼ିଛି। ଏନେଇ ଆରକେଡିର ପ୍ରକଳ୍ପ ପରିଚାଳକ ଶିଶିର ସ୍ବାଇଁଙ୍କୁ ଯୋଗାଯୋଗ କରାଯିବାରୁ ସେ କହିଛନ୍ତି ପ୍ରାୟ ଚୋରି ହୋଇଯାଇଛି। ତେଣୁ ଷ୍ଟ୍ରିଟ୍ଆଲୁଅକୁ ସ୍ବାଭାବିକ କରିବା ପାଇଁ ଆବଶ୍ୟକ ସରଞ୍ଜାମ ଯୋଗାଡ଼ ଚାଲିଛି ଦିନେ କି ଦୁଇ ଦିନ ମଧ୍ୟରେ ମରାମତି କାର୍ଯ୍ୟ କରାଯିବ ବୋଲି ସେ କହିଛନ୍ତି।
