କୋରାପୁଟ,୧୯ା୧(ସ୍ବ.ପ୍ର.): କୋରାପୁଟ ଜିଲାର ପଟ୍ଟାଙ୍ଗି ବ୍ଲକର କୋଟିଆ ପଞ୍ଚାୟତ ଅଞ୍ଚଳରେ ଥଣ୍ଡା ଜଳବାୟୁ ଓ ଉତ୍ତମ ପରିବେଶ ଯୋଗୁ ଷ୍ଟ୍ରବେରି ଚାଷ ବେଶ୍ ଭଲ ହେଉଛି। ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ ଗତ ୨ ବର୍ଷ ହେଲା ଉକ୍ତ ଅଞ୍ଚଳରେ ଷ୍ଟ୍ରବେରି ଚାଷ ଆରମ୍ଭ କରିଛି। ଆଇଟିଡିଏ ଏହାର ଦାୟିତ୍ୱ ନେଇଛି। ଚଳିତ ବର୍ଷ ଏହି ଅଞ୍ଚଳରେ ସ୍ଥାନୀୟ ମହିଳା ସ୍ବୟଂ ସହାୟିକା ଗୋଷ୍ଠୀଙ୍କ ଦ୍ୱାରା ପ୍ରାୟ ୨୦ ଏକର ଜମିରେ ଜୈବିକ ପ୍ରଣାଳୀରେ ଷ୍ଟ୍ରବେରି ଚାଷ କରାଯାଉଥିବା ଜିଲାପାଳ ଅବଦାଲ ଏମ୍. ଅଖତାର କହିଛନ୍ତି। କୋଟିଆର ଜାନିଗୁଡ଼ା ଗ୍ରାମରେ ୩ ଏକର ଜମି, ଫାଟୁସିନେରି ଗ୍ରାମରେ ୯ ଏକର ଜମି ଓ ନୂଆଗଁା ପଞ୍ଚାୟତର ଗାଲିଗାବଦର ଗ୍ରାମରେ ୮ ଏକର ଜମିରେ ଏହି ଚାଷ କରାଯାଉଛି । ଜୈବିକ ପ୍ରଣାଳୀରେ କରାଯାଉଥିବା ଏହି କୋଟିଆ ଷ୍ଟ୍ରେବରିର ଦାମ କେଜି ପ୍ରତି ୫ ଶହ ଟଙ୍କା ରଖାଯାଇଛି। ପ୍ରତି ୨ ଶହ ଗ୍ରାମକୁ ନେଇ ଏକ ପ୍ୟାକେଟ କରାଯାଇଛି ା ଏହାର ମୂଲ୍ୟ ଶହେ ଟଙ୍କା ରଖାଯାଇଛି। ଫାଟୁସିନେରି ଗ୍ରାମରେ ୯ ଏକର ଜମିରେ ଏହି ଚାଷ ଗତ ମାସକ ତଳେ ଆରମ୍ଭ ହୋଇଥିବାବେଳେ ଜାନିଗୁଡା ଗ୍ରାମରେ ୩ ଏକର ଜମିରେ ହେଇଥିବା ଷ୍ଟ୍ରବେରି ଚାଷରୁ ବର୍ତ୍ତମାନ ଷ୍ଟ୍ରବେରି ଅମଳ ଆରମ୍ଭ ହୋଇଛି। ଗାଲିଗବଦର ଗ୍ରାମରେ ଆସନ୍ତା ସପ୍ତାହକ ମଧ୍ୟରେ ଅମଳ ହେବ ବୋଲି ଆଇଟିଡିଏର ଟେକନିକାଲ ଅଧିକାରୀ କାଶୀ ପ୍ରସାଦ ନାୟକ କହିଛନ୍ତି। ସେହିପରି ଏହି ଷ୍ଟ୍ରବେରି ଚାଷ ଓ ଏହାର ବିକ୍ରି ଦାୟିତ୍ୱ କୃଷି ପରାମର୍ଶଦାତା ଶିବ ବେହେରା ଓ ଯାନ୍ତ୍ରିକ ପରାମର୍ଶଦାତା ସତ୍ୟ ମହାନ୍ତି ନେଇଛନ୍ତି। ଜୈବିକ ପ୍ରଣାଳୀରେ କରାଯାଉଥିବା ଏହି ଷ୍ଟ୍ରବେରିର ଚାହିଦା ଜିଲା, ଜିଲା ବାହାରେ ଏବଂ ପଡୋଶୀ ଆନ୍ଧ୍ରରେ ରହିଛି।
