ସମ୍ପ୍ରତି ୱେଲ୍ସ କାଉଣ୍ଟିର ଏକ ଅଜବ ଏବଂ ରହସ୍ୟମୟ ଘଟଣା ସ୍ଥାନୀୟ ଲୋକଙ୍କୁ ବିସ୍ମିତ କରିଦେଇଛି। ଦକ୍ଷିଣ ୱେଲ୍ସର ଗ୍ଲାମୋର୍ଗାନ ଉପତ୍ୟକାର ଓଗମୋର୍-ବାଇ-ସି ବିଚ୍ରେ ଶହ ଶହ ପୁରୁଣା ଭିକ୍ଟୋରିଆନ ଯୁଗର ଲୁହା କଣ୍ଟାରେ ନିର୍ମିତ ଚମଡ଼ା ଜୋତା ଦେଖିବାକୁ ମିଳିଥିଲା। ଏହି ଜୋତା କଳା ଏବଂ ସ୍ପଷ୍ଟ ଭାବରେ ପୁରୁଣା ଥିଲା। ବିଚ ଏକାଡେମୀ ସଂସ୍ଥାର ତିନି ଜଣ ସ୍ବେଚ୍ଛାସେବୀ ବେଳାଭୂମି ସଫା କରୁଥିବାବେଳେ ଏହି ଆବିଷ୍କାର ହୋଇଥିଲା।
ବିଚ ଏକାଡେମୀ ସହିତ ଜଡିତ ୫୬ ବର୍ଷୀୟା ଏମା ଲାମ୍ପୋର୍ଟ କହିଛନ୍ତି, ମିଳିଥିବା ଅଧିକାଂଶ ଜୋତା ପୁରୁଷଙ୍କ ଥିଲା। ଏଥିରେ କିଛି ବହୁତ ଛୋଟ ପିଲାଙ୍କର ମଧ୍ୟ ଥିଲା। ପିଲାମାନଙ୍କ ଜୋତା ବିଶେଷ ଭାବରେ ଛୋଟ ଏବଂ ଚମଡ଼ାରେ ତିଆରି ଥିଲା, ଯାହା ଫଳରେ ସେଗୁଡ଼ିକ ପ୍ରାଚୀନ କାଳର ଛୋଟ ଝିଅମାନଙ୍କର ବୋଲି ମନେ ହେଉଥିଲା। ଏହି ଜୋତାଗୁଡ଼ିକ ଦେଖି ତାଙ୍କୁ ଏକ ଅଜବ ଅନୁଭବ ହୋଇଥିଲା। ଏମିତି ପ୍ରାୟ ୨୦୦ରୁ ଅଧିକ ଜୋତା ମିଳିଛି।
ଏମା ଲାମ୍ପୋର୍ଟ ବିଶ୍ୱାସ କରନ୍ତି ଯେ, ଏହି ଜୋତାଗୁଡ଼ିକ ପ୍ରାୟ ୧୫୦ ବର୍ଷ ପୂର୍ବେ ବୁଡ଼ିଯାଇଥିବା ଏକ ଇଟାଲୀୟ ଜାହାଜର ହୋଇପାରେ। ସମୟ ସହିତ, ଏହି ଜୋତାଗୁଡ଼ିକ ନଦୀ ଗର୍ଭ ଏବଂ ସମୁଦ୍ର ପତନରେ ପୋତି ହୋଇଯାଇଥାଇପାରେ। ସମୁଦ୍ର ସ୍ରୋତ ଏବଂ ପ୍ରାକୃତିକ ପରିବର୍ତ୍ତନ ଯୋଗୁ ଏଗୁଡ଼ିକ ଏବେ ଧୀରେ ଧୀରେ ଉପରମୁଣ୍ଡରେ ଭାସମାନ ହେଉଛି।
ସ୍ଥାନୀୟ ଲୋକମାନେ ଏବଂ ସ୍ବେଚ୍ଛାସେବୀମାନେ ବର୍ତ୍ତମାନ ଏହି ରହସ୍ୟକୁ ଉନ୍ମୋଚନ କରିବାକୁ ଚେଷ୍ଟା କରୁଛନ୍ତି ଏବଂ ଆଶା କରୁଛନ୍ତି ଯେ, ଭବିଷ୍ୟତରେ ଜୋତାର କାହାଣୀର ଅଧିକ ସୁରାକ ମିଳିବ।
Dharitri – Odisha’s No.1 Odia Daily
