ଜାପାନର ରାଜଧାନୀ ଟୋକିଓରେ ରହୁଥିବା ଜଣେ ୬୧ ବର୍ଷର ବୃଦ୍ଧ କୌଣସି ସୁନାରୁପା ଅଳଙ୍କାର ନୁହେଁ, ଏମିତି ଜିନିଷ ଚୋରି କରୁଥିଲେ ଜାଣିଲେ ଆଶ୍ଚର୍ଯ୍ୟ ହେବେ। ତଥାପି ଏପରି ଏକ ମଜାଳିଆ ଘଟଣା ନଜରକୁ ଆସିଛି। ଅଭିଯୁକ୍ତଙ୍କ ନାମ ଆକିୟୋ ହତୋଡ଼ି। ସହରରେ ଲଗାତାର ସାଇକେଲ ସିଟ୍ ଚୋରି ହେଲା। ଫଳରେ ପୋଲିସ ପାଇଁ ଚିନ୍ତା ବଢ଼ିଗଲା। ଆକିୟୋ ପ୍ରଥମଥର ଅଗଷ୍ଟ ମାସରେ ଏକ ସାଇକେଲ ସିଟ୍ ଚୋରି କଲେ। ଯେଉଁ ବ୍ୟକ୍ତିଙ୍କର ସାଇକେଲ ସିଟ୍ ଚୋରି ହୋଇଥିଲା ସେ ସନ୍ଦେହରେ ଆକିୟୋଙ୍କ ନାମରେ ମାମଲା ରୁଜୁ କରିଥିଲେ। ପୋଲିସ ମଧ୍ୟ ସିସିଟିଭି ଫୁଟେଜ୍ରୁ ଆକିୟୋଙ୍କୁ ଚିହ୍ନି ପାରିଥିଲା। ପୋଲିସ ତାଙ୍କୁ ଗିରଫ କରିବାରୁ ଘରେ ଏତେସଂଖ୍ୟକ ସାଇକେଲ ସିଟ୍ ସେ ଚୋରି କରି ରଖିଥିବା ଜାଣିବାକୁ ପାଇଥିଲା। ଏତେ ସଂଖ୍ୟକ ସାଇକେଲ ସିଟ୍ ଚୋରି କରିବା ପଛରେ ଏକ କାରଣ ବି ରହିଛି।
ପୋଲିସକୁ ଦେଇଥିବା ବୟାନରେ ହତୋଡ଼ି କହିଛନ୍ତି, ୨୦୧୮ରେ ତାଙ୍କ ସାଇକେଲର ସିଟ୍ କେହି ଚୋରାଇ ନେଇଥିଲା। ଏହା ଫଳରେ ତାଙ୍କୁ ଅସୁବିଧାର ସାମ୍ନା କରିବାକୁ ପଡ଼ିଥିଲା। ତେଣୁ ସେ ଏହାର ପ୍ରତିଶୋଧ ନେବାକୁ ସେହିଦିନଠାରୁ ସାଇକେଲ ସିଟ୍ ସବୁ ଚୋରି କରି ଆଣୁଥିଲେ। ତାଙ୍କୁ ଯେଉଁ ସମସ୍ୟାରେ କେହି ପକାଇଛି ସେ ଅନ୍ୟକୁ ମଧ୍ୟ ଏପରି ସମସ୍ୟାରେ ପକାଇବେ ବୋଲି ନିଷ୍ପତ୍ତି ନେଲେ। ଫଳରେ ଗୋଟିଏ ପରେ ଗୋଟିଏ ସାଇକେଲ ସିଟ୍ ଚୋରି କରିବାରେ ଲାଗିଲେ। ଯେଉଁଥିପାଇଁ ଧରାପଡ଼ି ସେ ଏବେ ଜେଲ୍ ଯାଇଛନ୍ତି।
