ଅନେକ ସମୟରେ ଦେଖାଯାଏ ପିଲାଦିନର କିଛି ତିକ୍ତ ଅନୁଭୂତି ପିଲାଙ୍କ କୋମଳ ମନରେ ଘର କରି ରହିଯାଏ। ଏମିତିକି ସାରା ଜୀବନ ତାହା ମନରୁ ଲିଭିପାରେନା। ଆଉ ମଣିଷର ଜୀବନଧାରାକୁ ବଦଳାଇ ଦିଏ। ସେହିଭଳି ଏକ ଘଟଣା ଦେଖିବାକୁ ମିଳିଛି ଇଂଲଣ୍ଡର ବ୍ରାଇଟନ୍ରେ। ଏଠାକାର ୨୬ ବର୍ଷୀୟ ବ୍ଲାଦ ବନ୍ କିଚ୍ଙ୍କ ପିଲାଦିନର ତିକ୍ତ ଅନୁଭୂତି ତାଙ୍କୁ ଏକ ଭିନ୍ନ ମଣିଷ ରୂପେ ଗଢି ତୋଳିଛି। ପିଲାଦିନେ ବ୍ଲାଦ ଦେଖିବାକୁ ଏତେଟା ସୁନ୍ଦର ନ ଥିଲେ। ସେଥିପାଇଁ ସମସ୍ତେ ତାଙ୍କୁ ଚିଡାଉଥିଲେ। କିଏ ତାଙ୍କୁ ରାକ୍ଷସ, ଦାନବ ତ କିଏ ସୈତାନ କହି ଚିଡାଉଥିଲେ। ସବୁଦିନର ଏଇ ଘଟଣା ତାଙ୍କ ମନରେ ଏମିତି ଘର କରିଗଲା ଯେ, ବଡ ହେବାପରେ ସେ ସତକୁ ସତ ରାକ୍ଷସ ହେବାକୁ ଚାହିଁଲେ ତଥା ରାକ୍ଷସ ପରି ଦେଖାଯିବା ପାଇଁ ନିଷ୍ପତ୍ତି ନେଲେ। ଆଉ ଏବେ ସେ ମୁଣ୍ଡରେ ସିଙ୍ଗ ନ ଲଗାଇ ଘରୁ ବାହାରନ୍ତି ନାହିଁ। ତା’ସହିତ ବଡ ବଡ ନଖ, ବଡ ବଡ ଦାନ୍ତ ଓ ଜଟା ଥିବା ଲମ୍ବା କେଶ ତାଙ୍କର ପରିଚୟ ପାଲଟିଗଲାଣି। ରାକ୍ଷସ ହେବା ପାଇଁ ସେ ହେଭି ମେକ୍ଅପ୍ର ସାହାରା ବି ନିଅନ୍ତି। ଏଥିପାଇଁ ତାଙ୍କୁ ୩-୪ ଘଣ୍ଟା ସମୟ ଲାଗିଥାଏ। ଏବେ ବ୍ଲାଦଙ୍କୁ ନିଜର ରାକ୍ଷସ ରୂପ ଏତେ ଭଲ ଲାଗୁଛି ଯେ, ସବୁ ସମୟରେ ସେ ଭୟଙ୍କର ରୂପରେ ରହିବାକୁ ପସନ୍ଦ କରୁଛନ୍ତି। ତାଙ୍କର ଏମିତି ରୂପ ଦେଖି ଲୋକେ ହଠାତ୍ ଡରିଯାଆନ୍ତି। କିଛି ଲୋକ ତାଙ୍କୁ ତାଚ୍ଛଲ୍ୟ ବି କରିଥାନ୍ତି। ହେଲେ ବ୍ଲାଦ୍ ଏସବୁକୁ ନିଜ ଜୀବନର ଅଙ୍ଗଭାବେ ଗ୍ରହଣ କରି ନେଇଛନ୍ତି।
