ପୁରୀ ଅଫିସ,୧୩।୧୦: କରୋନା ପାଇଁ ଶ୍ରୀମନ୍ଦିରକୁ ଭକ୍ତଙ୍କ ପ୍ରବେଶ ବନ୍ଦ ରହିଛି। ମାତ୍ର ରାଜ୍ୟର ବିଭିନ୍ନ ଧାର୍ମିିକସ୍ଥଳୀ ଖୋଲିବା ନେଇ ପ୍ରକ୍ରିୟା ଆରମ୍ଭ ହୋଇଛି। ସର୍ବସାଧାରଣଙ୍କ ଦର୍ଶନ ନିମନ୍ତେ ଶ୍ରୀମନ୍ଦିର ଖୋଲିବା ସଂକ୍ରାନ୍ତରେ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ମୁଖ୍ୟ ପ୍ରଶାସକ ଡ. କ୍ରିଷନ କୁମାର ବିଭିନ୍ନ ସେବାୟତ ନିଯୋଗ ସହ ଆଲୋଚନା ଚଳାଇଛନ୍ତି। ଗତ ୯ତାରିଖରେ ପ୍ରଥମ ବୈଠକ ସରିଥିବାବେଳେ ସୋମବାର ଦ୍ୱିତୀୟ ଭର୍ଚୁଆଲ ମିଟିଂ ଅନୁଷ୍ଠିତ ହୋଇଛି। ଶ୍ରୀମନ୍ଦିର ଛତିଶା ନିଯୋଗ ନାୟକ ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର କାର୍ତ୍ତିକ ମାସ ପ୍ରାରମ୍ଭରୁ ପର୍ଯ୍ୟାୟକ୍ରମେ ଦର୍ଶନ ବ୍ୟବସ୍ଥା ଆରମ୍ଭ କରିବାକୁ ପ୍ରସ୍ତାବ ଦେଇଛନ୍ତି। ମାତ୍ର ଅନ୍ୟମାନେ ସାମ୍ପ୍ରତିକ ସ୍ଥିତିରେ ଶ୍ରୀମନ୍ଦିର ନ ଖୋଲିବା ପାଇଁ ମତ ରଖିଛନ୍ତି। ଜୀବନ ଆଗ, ଜୀବିକା ପଛ। ଭକ୍ତଙ୍କୁ ମନ୍ଦିର ପ୍ରବେଶ ଅନୁମତି ମିଳିଲେ ଯଦି କରୋନା ସଂକ୍ରମଣ ବୃଦ୍ଧି ପାଏ ତେବେ ମହାପ୍ରଭୁଙ୍କ ନୀତିକାନ୍ତି ପ୍ରଭାବିତ ହେବ ବୋଲି ସେମାନେ କହିଛନ୍ତି।
ବୈଠକରେ ବିଭିନ୍ନ ସେବାୟତ ନିଯୋଗ (ପୁଷ୍ପାଳକ, ମହାଜନ, ଗରାବଡୁ, ବିମାନବଡୁ, ବଡ଼ୁ ସୁଆର) କର୍ମକର୍ତ୍ତାଙ୍କ ସହ ଛତିଶା ନିଯୋଗ ନାୟକ, ଭିତରଛ ମହାପାତ୍ର, ତଳୁଚ୍ଛ ମହାପାତ୍ର, ପତିମହାପାତ୍ର, ଦେଉଳକରଣ, ତଢ଼ାଉକରଣ ଏବଂ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମତ ରଖିଥିଲେ। କେବଳ ଛତିଶା ନିଯୋଗ ନାୟକ କାର୍ତ୍ତିକ ମାସରୁ କୋଭିଡ୍ ଗାଇଡ଼ଲାଇନ ମାନି ଦର୍ଶନ ବ୍ୟବସ୍ଥା ଆରମ୍ଭ ଲାଗି ପ୍ରସ୍ତାବ ଦେଇଥିଲେ। ପ୍ରଥମେ ସେବାୟତ ପରିବାରର ମହିଳା, ତା’ ପରେ ପୁରୀ ବାସିନ୍ଦା ଏବଂ ପରେ ବାହାର ଭକ୍ତଙ୍କୁ ଦର୍ଶନ ସୁଯୋଗ ଦେବାକୁ ସେ କହିଥିଲେ। କିନ୍ତୁ ଅନ୍ୟମାନେ ସାମ୍ପ୍ରତିକ ସ୍ଥିତିରେ ଶ୍ରୀମନ୍ଦିର ଖୋଲିବାକୁ ମନା କରିଥିଲେ। କାର୍ତ୍ତିକ ମାସ ତଥା ନାଗାର୍ଜୁନ ବେଶ ଶେଷ ପର୍ଯ୍ୟନ୍ତ ମନ୍ଦିର ବନ୍ଦ ରଖାଯାଉ। ଏହାପରେ କରୋନା ସ୍ଥିତି ଦେଖି ଛତିଶା ନିଯୋଗ ଏବଂ ପରିଚାଳନା କମିଟି ବୈଠକରେ ଚୂଡ଼ାନ୍ତ ନିଷ୍ପତ୍ତି ନିଆଯାଉ ବୋଲି ସେମାନେ କହିଥିଲେ। ସ୍ବତନ୍ତ୍ର ଅନୁଦାନ ବୃଦ୍ଧି ସହ ଚତୁର୍ଥ ପର୍ଯ୍ୟାୟ ଆର୍ଥିକ ସହାୟତା ପ୍ରଦାନ ବ୍ୟବସ୍ଥା ପାଇଁ ମୁଖ୍ୟ ପ୍ରଶାସକଙ୍କୁ ସେବାୟତମାନେ ଜଣାଇଛନ୍ତି। ମଙ୍ଗଳବାରଠାରୁ ଅନ୍ୟ ସେବାୟତ ନିଯୋଗ ସହ ଆହୁରି ୪ଦିନ ଧରି ବୈଠକ ଚାଲିବ। ସମସ୍ତଙ୍କ ମତାମତ ସଂଗ୍ରହ ପରେ ପରିଚାଳନା କମିଟିରେ ଏହାକୁ ଉପସ୍ଥାପନ କରାଯାଇ ଚୂଡ଼ାନ୍ତ ନିଷ୍ପତ୍ତି ନିଆଯିବ।
