ସମ୍ବଲପୁର, ୧୪।୮ (ଶୁଭାଶିଷ ପାଢ଼ୀ): ରାଜସ୍ବ ଆଦାୟ କରିବା ପାଇଁ ସରକାରୀ ସ୍ତରରେ ପଥରଖାଦାନଗୁଡିକ ଲିଜ୍ ସୂତ୍ରରେ ଦିଆଯାଉଛି। ହେଲେ ଲିଜ୍ ଦେବା ପରେ ପଥରଖାଦାନ ପାର୍ଶ୍ୱରେ ଥିବା ରୟତି ଜମିଗୁଡିକ କିଭଳି ଭାବେ ନଷ୍ଟ ହୋଇଯାଉଛି ତାହାକୁ ନ ଦେଖିଲେ ବିଶ୍ୱାସ କରିହେବନାହିଁ। ଲିଜ୍ ଦେବା ପରେ ରାଜସ୍ବ ବିଭାଗ, ଖଣି ବିଭାଗ ଓ ଜିଲାପ୍ରଶାସନ, ପ୍ରଦୂଷଣ ବିଭାଗ ଚୁପ ବସି ଯାଉଛନ୍ତି। ତେଣୁ କରି ନିରୀହ ଚାଷୀମାନଙ୍କ ଫସଲ ନଷ୍ଟ ହୋଇଯାଉଛି। ଚାଷ ଅନୁପଯୋଗୀ ମଧ୍ୟ ଜମି ହେଉଛି। ଏଭଳି ଅଭିଯୋଗ ଆଣିଛନ୍ତି ଯୁଯୁମୁରା ତହସିଲ ଜାମଟାଲ ଗ୍ରାମର ସୁଶାନ୍ତ ତପନ। ରବିବାର ଯୁଯୁମୁରା ଥାନାରେ ସେ ଅଭିଯୋଗ କରିଛନ୍ତି। ଅଭିଯୋଗକ୍ରମେ ହାତିବାରୀ ମୌଜାରେ ଖାତା ନମ୍ବର ୧୬୨/୪୪୮ରେ ୧ ଏକର ୫୦ ଡିସିମିଲ, ପ୍ଲଟ ନମ୍ବର ୪୭୮ରେ ଏକ ୧ ଏକର ୭୦ ଡିସିମିଲ ଜମି ରହିଛି। ଏହି ଜମି ଅଣଜଳସେଚିତ ଅଟେ। ବର୍ଷା ସମୟରେ ଧାନ ଫସଲ ହେବା ସହ ଅନ୍ୟ ସମୟରେ ଶୋରିଷ, ରାଶି, ମୁଗ ଭଳି ଡାଲି ଓ ତେଲ ଜାତୀୟ ଫସଲ ହେଉଥିଲା। ବିଳମ୍ବରେ ବର୍ଷା ହୋଇଥିଲା ହେଲେ ମଧ୍ୟ ଧାନ ବୁଣିଥିଲେ ା ପଥର ଖାଦାରେ ନିୟମିତ ବ୍ଲାଷ୍ଟିଙ୍ଗ ହେବାରୁ ହୋଇଥିବା ଧାନ ଗଛ ନଷ୍ଟ ହୋଇଯାଉଛି। ପଥର ଖାଦାନର ବଡବଡ ପଥର ଖଣ୍ଡ ଚାଷ ଜମିରେ ଆସି ପଡୁଛି। ଏଥିପ୍ରତି ଅଭିଯୋଗ କରିବା ପରେ ମଧ୍ୟ ପଥର ଖାଦାନ କର୍ମଚାରୀମାନେ ଶୁଣୁ ନାହାନ୍ତି। ପଥର ଖାଦାନ ନିଲାମ କରିବା ପୂର୍ବରୁ ନିକଟରେ କାହାର ଜମି ରହିଛି ା ତାଙ୍କ ଠାରୁ ମଧ୍ୟ ଅନୁମତି ନେବା ଆବଶ୍ୟକ ରହିଛି। କାରଣ ଥରେ ନିଲାମ ନେବା ପରେ ଖାଦାନ ମାଲିକମାନେ ସରକାରଙ୍କ ନିୟମାବଳୀ ଓ ସର୍ତ୍ତାବଳିକୁ ପାଳନ କରୁନାହାନ୍ତି। ଫଳରେ ଚତୁପାର୍ଶ୍ୱରେ ଥିବା ଚାଷ ଜମି ପ୍ରଭାବିତ ହେଉଛି। ପ୍ରଦୂଷଣ ବିଭାଗ ଓ ଖଣି ବିଭାଗ କିଭଳି ଭାବେ ଅନୁମତି ପ୍ରଦାନ କରୁଛନ୍ତି। ରାଜସ୍ବ ଆଦାୟ କରିବା ପାଇଁ ରୟତି ଜମି ନଷ୍ଟ ନ ହେବ, ଚାଷୀଙ୍କ ହୀତ ପ୍ରତି ଦୃଷ୍ଟି ଦେବାକୁ ଅନୁରୋଧ କରିଥିଲେ। ଅନ୍ୟପଟେ ପଥର ଖାଦାନରେ ନିୟମ ଠାରୁ ଅଧିକ ପଥର ଉତ୍ତୋଳନ କରାଯାଉଛି। ଅନୁମତି ଯେତିକି ମିଳିଛି ତାହା ଠାରୁ ଅଧିକ ଖନନ ହୋଇଛି। ଉଚ୍ଚସ୍ତରୀୟ ତଦନ୍ତ କରାଯାଉ ବୋଲି ଚାଷୀ ଦାବି କରିଥିଲେ। ଏହି ପଥର ଖାଦାନ ବନ୍ଦ କରିବା ପାଇଁ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଉ ବୋଲି ଚାଷୀ ସୁଶାନ୍ତ ତପନ ଅନୁରୋଧ କରିଥିଲେ।
