ଭୁବନେଶ୍ୱର,୨୦।୬(ସତ୍ୟଜିତ୍ ରାଉତ): ଅବସରପ୍ରାପ୍ତ ବ୍ୟାଙ୍କ୍ ଜେନେରାଲ ମ୍ୟାନେଜର ରବୀନ୍ଦ୍ର ନାଥ ଦାସଙ୍କ ଘର ତାଲା ଭାଙ୍ଗି ୧.୧୫ ଲକ୍ଷ ଟଙ୍କା ସମେତ ଲକ୍ଷାଧିକ ଟଙ୍କାର ସୁନା ଅଳଙ୍କାର ଚୋରି ଘଟଣାରେ ଖଣ୍ଡଗିରି ଥାନା ପୋଲିସ ୨ଜଣଙ୍କୁ ଗିରଫ କରିଛି। ସେମାନେ ହେଲେ ଡୁମୁଡୁମା ରହମତ୍ ନଗରର ମୁଖ୍ୟ ଅଭିଯୁକ୍ତ ସେଖ୍ ଓରେଞ୍ଜେବ୍ (୨୨) ଓ ପଶ୍ଚିମବଙ୍ଗ ପୂର୍ବ ମେଦିନପୁର ଅଞ୍ଚଳର ସେଖ୍ ସଦାମ୍ (୨୪)। ଉଭୟଙ୍କଠାରୁ ଚୋରି ୨୨୫ ଗ୍ରାମର ସୁନା ଅଳଙ୍କାର, ୧୫୦ ଗ୍ରାମର ରୁପା ଅଳଙ୍କାର, ନଗଦ ୯୧ ହଜାର ଟଙ୍କା, ଘରୋଇ ସାମଗ୍ରୀ ସମେତ ଚୋରିରେ ବ୍ୟବହୃତ ଶାବଳ, ରଡ୍, ଟ୍ରଲି ଆଦି ଜବତ ହୋଇଛି। ଚୋରି ପରେ ଏସବୁ ସାମଗ୍ରୀକୁ ଅଭିଯୁକ୍ତମାନେ ଟ୍ରଲିରେ ବୋହି ନେଇଥିଲେ। କିଛି ଟଙ୍କାକୁ ମୁଖ୍ୟ ଅଭିଯୁକ୍ତ ଖର୍ଚ୍ଚ କରି ଦେଇଥିଲେ। ବଳକା ଟଙ୍କା, ସୁନା ଅଳଙ୍କାର ଓ ଅନ୍ୟାନ୍ୟ ସାମଗ୍ରୀକୁ ସେ ତାଙ୍କ ଘର ସାମ୍ନା ଏକ ପରିତ୍ୟକ୍ତ ସ୍ଥାନରେ ପୋତି ଦେଇଥିଲେ। ପୋଲିସ ଜାଣିବା ପରେ ମାଟି ଖୋଳି ସେସବୁକୁ ଜବତ କରିଥିଲା। ତେବେ ପୋଲିସ ନଜରରୁ ବର୍ତ୍ତିବାକୁ ସେ ପ୍ରବଳ ନିଶା ସେବନ କରି ନିଶା ନିବାରଣ କେନ୍ଦ୍ରକୁ ପଳାଉଥିଲେ। ଏହା ଜାଣିବା ପରେ ପୋଲିସ ବିଭିନ୍ନ ନିଶା ନିବାରଣ କେନ୍ଦ୍ରଗୁଡ଼ିକୁ ଯାଞ୍ଚ କରି ଶେଷରେ କୋଳଥିଆସ୍ଥିତ ନିଶା ନିବାରଣ କେନ୍ଦ୍ରରୁ ତାଙ୍କୁ ଧରିଥିଲା। ସୋମବାର ଉଭୟଙ୍କୁ କୋର୍ଟଚାଲାଣ କରାଯିବା ପରେ ଜେଲକୁ ପଠାଇ ଦିଆଯାଇଛି। ତେବେ ସେଖ୍ ଓରେଞ୍ଜେବ୍ଙ୍କ ନାମରେ ଖାରବେଳନଗର ଥାନାରେ ଆଉ ୨ଟି ମାମଲା ଥିବା ପୋଲିସ କହିଛି।
ସୂଚନା ଅନୁଯାୟୀ, ରବୀନ୍ଦ୍ର ଜଗମୋହନନଗର ଲେନ୍-୪ସ୍ଥିତ ପ୍ଲଟ ନଂ. ୧୦୭୦/୧୨ରେ ପରିବାର ସହ ରୁହନ୍ତି। ଗତ ୧୦ ତାରିଖରେ ସେ ପରିବାର ସହ ଗୁଆହାଟୀ ଯାଇଥିଲେ। ୧୨ ତାରିଖ ରାତି ପ୍ରାୟ ୧୨ଟା ୩୦ରେ ଅଭିଯୁକ୍ତମାନେ ଏକ ଟ୍ରଲିରେ ଆସି ଶାବଳ ଓ ରଡ୍ ଦ୍ୱାରା ଘରର ତାଲା ଭାଙ୍ଗି ଚୋରି କରିଥିଲେ। ୧୩ ତାରିଖ ସକାଳେ ଘରର ଚାକରାଣୀ ରବୀନ୍ଦ୍ରଙ୍କୁ ଏ ସମ୍ପର୍କରେ ଜଣାଇଥିଲେ। ଅଭିଯୋଗପରେ ପୋଲିସ ଏକ ମାମଲା (ନଂ.୨୫୪/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ସ୍ଥାନୀୟ ସିସିଟିଭି ଫୁଟେଜ୍ରୁ ଅଭିଯୁକ୍ତଦ୍ୱୟ ଏକ ଟ୍ରଲିରେ ଆସି ଚୋରି କରିଥିବା ଜଣାପଡ଼ିବା ପରେ ସେମାନଙ୍କୁ ଚିହ୍ନଟ କରାଯାଇଥିଲା।
