କୋରୁକୋଣ୍ଡା,୧୧ା୩(ଡି.ଏନ୍.ଏ.): ଜନସାଧାରଣଙ୍କୁ ସ୍ବଚ୍ଛ ପାନୀୟ ଜଳ ଯୋଗାଇଦେବାକୁ ସରକାରଙ୍କ ପକ୍ଷରୁ ଜିଲାର ବିଭିନ୍ନ ସ୍ଥାନରେ ମେଗା ପାନୀୟ ଜଳ ପ୍ରକଳ୍ପ ସ୍ଥାପନ ପାଇଁ ଟେଣ୍ଡର ମାଧ୍ୟମରେ କିଛି ଠିକାସଂସ୍ଥାକୁ ଦାୟିତ୍ୱ ମିଳିଛି। ମାଲକାନଗିରି ଜିଲା କୋରୁକୋଣ୍ଡା ବ୍ଲକର ୧୧ଟି ପଞ୍ଚାୟତକୁ ସ୍ବଚ୍ଛ ପାନୀୟ ଜଳ ଯୋଗାଇବା ପାଇଁ ଏକ ମେଗା ପାନୀୟ ଜଳ ପ୍ରକଳ୍ପ ମାରିୱାଡା ପଞ୍ଚାୟତରେ କରିବାକୁ ନିଷ୍ପତ୍ତି ହୋଇଛି। କେଇସି-କେଆଇପିଏଲ୍ ଜଏଣ୍ଟ ଭେଞ୍ଚର ନାମକ ସଂସ୍ଥା ଏହି କାର୍ଯ୍ୟର ଠିକା ନେଇଛି। ଉକ୍ତ ସଂସ୍ଥା ଗ୍ରାମକୁ ଗ୍ରାମ ପାଣି ଯୋଗାଇବା ପାଇଁ ବହୁ ମାତ୍ରାରେ ବିଭିନ୍ନ ସାଇଜର ପାଇପ ରଖିବା ପାଇଁ କୋରୁକୋଣ୍ଡା ବ୍ଲକ ସଦର ପାଖ ଟେକଗୁଡ଼ାରେ ଏକ ଷ୍ଟକ୍ୟାର୍ଡ ସ୍ଥାପନ କରିଛି। ସେହି ସ୍ଥାନଟି ପାଇପ ଷ୍ଟକ୍ୟାର୍ଡ ପାଇଁ ଉପଯୁକ୍ତ ନୁହେଁ ବୋଲି ଅଭିଯୋଗ ହେଉଛି। କାରଣ ଉକ୍ତ ସ୍ଥାନ ପରିସରର ମଧ୍ୟଭାଗରେ ୩୩ କେଭି ବିଦ୍ୟୁତ୍ ସଂଯୋଗ ତାର ଯାଇଛି। ୟାର୍ଡ ପରିସରକୁ ପ୍ରବେଶ କରିବାକୁ ଥିବା ମୁଖ୍ୟ ରାସ୍ତାରେ ୧୧କେଭିର ସଂଯୋଗ ହୋଇଥିବା ତାର ଠିକାଦାରଙ୍କ ଷ୍ଟକ୍ୟାର୍ଡ ଜମିଠାରୁ ମାତ୍ର ୧୨ରୁ ୧୫ ଫୁଟ ଉଚ୍ଚତାରେ ରହିଛି। ସେଠାକୁ ଆସୁଥିବା ପାଇପ ବୋଝେଇ ଟ୍ରକ୍ରୁ ପାଇପ ଓହ୍ଲାଇବା ଓ ଅନ୍ୟ ଯାନକୁ ଲୋଡ୍ କରିବା ବିପଦସଙ୍କୁଳ। କିଛି ମାସ ତଳେ ପଡ଼ିଆ ବ୍ଲକରେ ଥିବା ଷ୍ଟକ୍ ୟାର୍ଡରେ ପାଇପ ଗାଡ଼ିରୁ ଓହ୍ଲାଇବା ଏବଂ ଲୋଡ୍ କରିବା ସମୟରେ ବିଦ୍ୟୁତ୍ ସଂସ୍ପର୍ଶରେ ଆସି ଉକ୍ତ ଗାଡ଼ି ଚାଳକଙ୍କ ମୃତ୍ୟୁ ହୋଇଥିଲା। କୋରୁକୋଣ୍ଡାରେ ସେପରି କିଛି ଅଘଟଣ ଘଟିବା ପୂର୍ବରୁ ଠିକାଦାର ଷ୍ଟକ୍ ୟାର୍ଡ ସ୍ଥାନ ପରିବର୍ତ୍ତନ କରିବାକୁ ଦାବି ହେଉଛି। ଏ ଦିଗରେ ବିଭାଗୀୟ ଅଧିକାରୀ ପଦକ୍ଷେପ ନେବାକୁ ମତ ପ୍ରକାଶ ପାଉଛି।
