ମାଲକାନଗିରି,୨୬ା୧: ମାଲକାନଗିରି ଜିଲା ସଦରସ୍ଥିତ ଚିଦାନନ୍ଦ ସାହି ସରକାରୀ ପ୍ରାଥମିକ ବିଦ୍ୟାଳୟ ପରିସରରେ ୭୨ତମ ଗଣତନ୍ତ୍ର ଦିବସ ପାଳନ କରାଯାଇଛି। ଏହି ଉପଲକ୍ଷେ ବିଦ୍ୟାଳୟରେ ୧୭ ବର୍ଷ ଧରି ଶିକ୍ଷାଦାନ କରିଥିବା ଶିକ୍ଷୟିତ୍ରୀ ତଥା ଦକ୍ଷିଣ ଓଡ଼ିଶାର ମଦର୍ ଟେରେସା ରୂପେ ପରିଚିତ ସୁଶିଳା ପଟ୍ଟନାୟକଙ୍କ ସ୍ମୃତିରେ ପଶ୍ଚିମ ଓଡ଼ିଶାର ମହିଳା ସ୍ବାଧୀନତା ସଂଗ୍ରାମୀ ପାର୍ବତୀ ଗିରିଙ୍କ ପ୍ରତିମୂର୍ତ୍ତି ସ୍କୁଲ ପରିସରରେ ଉନ୍ମୋଚିତ ହୋଇଛି। ସୁଶିଳା ଏହି ବିଦ୍ୟାଳୟ ସମେତ ଜିଲାର ବିଭିନ୍ନ ସ୍କୁଲରେ ଶିକ୍ଷକତା କରି ସୁନାମ ଅର୍ଜନ କରିଥିଲେ। ଜୀବିତ ଅବସ୍ଥାରେ ସେ ନିଜର ସେବା କାର୍ଯ୍ୟ ନିମନ୍ତେ ସମଗ୍ର ଦକ୍ଷିଣ ଓଡ଼ିଶାରେ ଏକ ପରିଚିତ ସୃଷ୍ଟି କରିଥିଲେ। ୨୦୨୦ ଏପ୍ରିଲ ୨୧ରେ ତାଙ୍କର ପରଲୋକ ଘଟିଥିଲା। ତାଙ୍କୁ ମନେ ପକାଇବା ପାଇଁ ସ୍କୁଲ ପରିସରରେ ପଶ୍ଚିମ ଓଡ଼ିଶାର ଦ୍ୱିତୀୟ ମଦର୍ ଟେରେସା ରୂପେ ପରିଚିତ ପାର୍ବତୀ ଗିରିଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଛି। ସାଧାରଣତନ୍ତ୍ର ଦିବସ ଅବସରରେ ଜିଲା ପରିଷଦ ଅଧ୍ୟକ୍ଷ ଦଶରଥ ପଡ଼ିଆମି ପତାକା ଉତ୍ତୋଳନ କରିବା ସହ ପ୍ରତିମୂର୍ତ୍ତି ଉନ୍ମୋଚନ କରିଥିଲେ। ଏହି ଅବସରରେ ସୁଶିଳାଙ୍କ ପରିବାରବର୍ଗ ଏବଂ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
