ଭୁବନେଶ୍ବର,୮ା୪ (ବ୍ୟୁରୋ): ମୁଖ୍ୟମନ୍ତ୍ରୀ ଓ ତାଙ୍କ ଟିମ୍ ବିଭିନ୍ନ କାର୍ଯ୍ୟର ବାହାନା ଦେଇ ଛୁଟି କଟାଇବା ପାଇଁ ଜାପାନ ଗସ୍ତ କରିବା କେବଳ ଏକ ପ୍ରହସନ। ବୁଲିବାର ଅଧିକାର ମୁଖ୍ୟମନ୍ତ୍ରୀଙ୍କ ପାଖରେ ଅଛି, କିନ୍ତୁ ରାଜ୍ୟ ରାଜକୋଷରେ ଥିବା ଲୋକଙ୍କ କଷ୍ଟାର୍ଜିତ ଟିକସ ଅର୍ଥକୁ ଖର୍ଚ୍ଚକରି ଛୁଟି କଟାଇବାକୁ ଯିବା କେତେଦୂର ଯୁକ୍ତିଯୁକ୍ତ ବୋଲି ଭାଜପା ନେତା ସତ୍ୟବ୍ରତ ପଣ୍ଡା କହିଛନ୍ତି।
ଭାଜପା ରାଜ୍ୟ କାର୍ଯ୍ୟାଳୟଠାରେ ଶୁକ୍ରବାର ଆୟୋଜିତ ଏକ ଖବରଦାତା ସମ୍ମିଳନୀରେ ସତ୍ୟବ୍ରତ କହିଛନ୍ତି, ମୁଖ୍ୟମନ୍ତ୍ରୀ ଶହ ଶହ କୋଟି ଟଙ୍କା ଖର୍ଚ୍ଚକରି ଛୁଟି କଟାଇବା ପାଇଁ ମନା ନାହିଁ। କିନ୍ତୁ ରାଜ୍ୟର ଯୁବକମାନଙ୍କୁ ମିଛ ପ୍ରତିଶ୍ରୁତି ନ ଦିଅନ୍ତୁ। ଜାପାନରୁ କିଛି ନୂଆ ଶିଳ୍ପ ଆସୁଛି ନା ପୁରୁଣା ବହିରେ ସରକାର ନୂଆ ମଲାଟ ମଡ଼ାଇଛନ୍ତି। ଇଟାଲୀ ଏବଂ ୟୁଏଇ ଗସ୍ତ ପରେ ମୁଖ୍ୟମନ୍ତ୍ରୀ ଏବଂ ସରକାରୀ ବାବୁମାନେ ଜାପାନ ଗସ୍ତ କରିଛନ୍ତି। ୫ ଘଣ୍ଟାର କାର୍ଯ୍ୟ ପାଇଁ ୭ ଦିନ ଗସ୍ତ କରିବାର ମାନେ କ’ଣ ବୋଲି ସେ ପ୍ରଶ୍ନ କରିଛନ୍ତି।
