ରାଜନଗର,୧୮ା୫(ଡି.ଏନ.ଏ.): ଆମେ ଚାହୁଁ ଥିବା ରିଟେଲରଙ୍କ ପାଖରୁ ଆମକୁ ଚାଉଳ ଦିଅ। ଅନ୍ୟତ୍ର ଆମେ ଚାଉଳ ନେବୁନି। ଆମେ ବର୍ତ୍ତମାନ ହିତାଧିକାରୀଙ୍କୁ ଦିଆଯାଉଥିବା ରିଲିଫ୍ ଓ କୋଟା ଚାଉଳ ୪ମାସର ପାଇନାହୁଁ। ଏହାକୁ ନେଇ ଶତାଧିକ ହିତାଧିକାରୀ ବ୍ଲକ କାର୍ଯ୍ୟାଳୟରେ ପହଞ୍ଚତ୍ ହୋହାଲ୍ଲା କରିବା ସହ ବିଡିଓଙ୍କ କାର୍ଯ୍ୟାଳୟ ସମ୍ମୁଖରେ ବସି ରହିଥିଲେ। ୩ ଦିନ ମଧ୍ୟରେ ପଦକ୍ଷେପ ନିଆଯିବ ବୋଲି ବିଡିଓଙ୍କ ପ୍ରତିଶ୍ରୁତି ପରେ ରାଶନ କାର୍ଡ ହିତାଧିକାରୀମାନେ ଧାରଣାରୁ ଉଠିଥିଲେ।
ଅଭିଯୋଗ ଅନୁଯାୟୀ, ରାଜନଗର ବ୍ଲକ କେରେଡାଗଡଗାଁର ରିଟେଲର ହଳଧର ସାହୁଙ୍କ ପୁଅ ତାପସ କୁମାର ସାହୁ, ଚଳିତ ପଞ୍ଚାୟତ ନିର୍ବାଚନରେ ସରପଞ୍ଚ ଭାବେ ନିର୍ବାଚିତ ହୋଇଛନ୍ତି। ପଞ୍ଚାୟତିରାଜ ନିୟମ ଅନୁଯାୟୀ ସରପଞ୍ଚଙ୍କ ପରିବାରର କେହି ରିଟେଲର ରହି ପାରିବେ ନାହିଁ। ସେଥିଲାଗି ଚଳିତ ଏପ୍ରିଲରେ କରାଯାଇଥିବା ରିଟେଲରମାନଙ୍କ ଲାଇସେନ୍ସ ରିନୁଆଲରେ ହଳଧର ସାହୁଙ୍କ ଲାଇସେନ୍ସ ରିନୁଆଲ କରାଯାଇ ନାହିଁ। ବାଲିସାହି ପାଟଣା ପଞ୍ଚାୟତ କାର୍ଯ୍ୟାଳୟରୁ ହିତାଧିକାରୀମାନେ ଚାଉଳ, ଗହମ ନେବା ପାଇଁ କୁହାଯାଇଛି। ମାତ୍ର ହଳଧର ସାହୁଙ୍କଠାରୁ ରାଶନ ସାମଗ୍ରୀ ନେଉଥିବା ହିତାଧିକାରୀମାନେ ବାଲିସାହିପାଟଣା ପଞ୍ଚାୟତ କାର୍ଯ୍ୟାଳୟରୁ ରାଶନ ସାମଗ୍ରୀ ନେବେ ନାହିଁ ବୋଲି ବିଡିଓଙ୍କୁ ଜଣାଇବା ସହ ମଙ୍ଗଳବାର ବ୍ଲକ କାର୍ଯ୍ୟାଳୟ ସମ୍ମୁଖରେ ହୋହାଲ୍ଲା କରିଥିଲେ। କେରେଡାଗଡ ସରପଞ୍ଚ ତାପସ କୁମାର ସାହୁ, ବାଲିସାହି ପାଟଣା ସରପଞ୍ଚ କୈଳାସଚନ୍ଦ୍ର ପରିଡା, ସମିତିସଭ୍ୟ ପ୍ରଶାନ୍ତ କୁମାର ରାଉତ ପ୍ରମୁଖ ବିଡିଓଙ୍କ ସହ ଏ ସମ୍ପର୍କରେ ହିତାଧିକାରୀମାନଙ୍କୁ ନେଇ ଆଲୋଚନା କରିଥିଲେ। ୩ଦିନ ମଧ୍ୟରେଏହି ସମସ୍ୟାର ସମାଧାନ କରାଯିବ ବୋଲି ବିଡିଓ ରବିନ୍ଦ୍ର କୁମାର ପ୍ରଧାନ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
