ଭଣ୍ଡାରିପୋଖରୀ, ୨୦ା୮(ଦେବେନ୍ଦ୍ର ଆନ୍ଦିଆ)- କରୋନା ଛଡ଼ାଇ ନେଇଛି ଜୀବନ ଜୀବିକା। କାଲି ଯିଏ ମଞ୍ଚରେ ହସାଇ ଦର୍ଶକଙ୍କୁ ବେଦମ କରୁଥିଲେ, ସେ ଆଜି ରାଜପଥ ପାର୍ଶ୍ୱରେ ଚା’ ପାନ ବିକ୍ରି କରି ପରିବାର ଚଳାଉଛନ୍ତି। ଏମିତି ଜଣେ ପ୍ରତିଷ୍ଠିତ ଯାତ୍ରା ହାସ୍ୟଭିନେତା ହେଉଛନ୍ତି ପ୍ରଭାକର ସାହୁ(୫୨)। ପରିବାର କହିଲେ ପତି, ପତ୍ନୀ, ଦୁଇଝିଅ, ଗୋଟିଏ ପୁଅ। ବଡ଼ ଝିଅ ବିଭା ଦେଇଛନ୍ତି। ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଦକ୍ଷିଣବାଡ଼ ଗ୍ରାମରେ ତାଙ୍କ ଘର। କରୋନା ପାଇଁ ଯାତ୍ରା ବନ୍ଦ ରହିଥିବାରୁ ମାର୍ଚ୍ଚ ମାସରୁ ଘରେ ବସିଛନ୍ତି। ଯାହା ପଇସା ଥିଲା ଘର ଖଣ୍ଡିଏ କରି ଦେଇଛନ୍ତି। ଆଉ ରୋଜଗାର ନାହିଁ। କେତେଦିନ ବସିବି, କେମିତି ଚଳିବି ଭାବି ଭଣ୍ଡାରିପୋଖରୀ ୧୬ ନଂ. ଜାତୀୟ ରାଜପଥ ପାର୍ଶ୍ୱ ପାଳଦାବାଙ୍କଠାରେ ଗହ୍ମା ପୂର୍ଣ୍ଣିମାଠାରୁ ଏକ ଚା’ ପାନ ଦୋକାନ ଖୋଲିଛନ୍ତି। ସେଥିରୁ ଯାହା ରୋଜଗାର ହେଉଛି ପରିବାର ଚଳୁଛି। କେତେ ରୋଜଗାର ପଚାରିବାରୁ ପ୍ରତ୍ୟେକ ଦିନ ୧୦୦ ରୁ ୧୫୦ ଟଙ୍କା ରୋଜଗାର ହେଉଛି। ସେଥିରେ ଆମ ପରିବାର ଚଳୁଛି। କ’ଣ କରିବା ଏ କରୋନା ସବୁ ଛଡ଼ାଇନେଲା ବୋଲି କୋହଭରା କଣ୍ଠରେ କହିଥିଲେ।
ପ୍ରଭାକର ୧୯୭୫ରେ ଯାତ୍ରା ଜଗତରେ ଯୋଗ ଦେଇଥିଲେ। ଷଷ୍ଠ ଶ୍ରେଣୀ ଯାଏ ପଢ଼ିଛନ୍ତି। ସେତେବେଳେ ଘରର ଆର୍ଥିକ ଅବସ୍ଥା ଭଲ ନ ଥିବାରୁ ଯାତ୍ରା ପାର୍ଟିରେ ଯୋଗ ଦେଇଥିଲେ। ପ୍ରଥମେ ଶିଶୁ କଳାକାର, ଡୁଏଟ୍, ଭାଓଲୀନ ଓ ଅର୍ଗାନ୍ ବଜାଇଲେ। ହାସ୍ୟ ଅଭିନେତା ଭାବେ ୧୨ ବର୍ଷ ହେଲା ବେଶ ପରିଚିତ। ସ୍ବପ୍ନ ମହଲ ଯାତ୍ରା ପାର୍ଟିରେ ବର୍ଷେ ହେଲା ଅଭିନୟ କରୁଥିଲେ। କରୋନା ପାଇଁ ପାର୍ଟି ଛାଡ଼ିଲେ। ପାର୍ଟି ଚାଲିଲେ ରାଜଧାନୀ ଅପେରା ଯିବା ପାଇଁ କଥା ହୋଇଛନ୍ତି।
ଦୁଃଖର କଥା ଜମିବାଡ଼ି କହିଲେ ଆଠଗୁଣ୍ଠ। ଯାତ୍ରାରୁ ଯାହା ରୋଜଗାର କରିଥିଲି ଘର ଦୁଇ ବଖରା କରିଦେଲି। ବ୍ଲକ ଯାଇ ନେହୁରା ହେଲି ରାଶନକାର୍ଡ଼ ଖଣ୍ଡେ କରିଦିଅ, କିନ୍ତୁ କେହି ଶୁଣିଲେନି। କହିଲେ ତୁମର କୋଠାଘର ତମେ ପାଇବ ନାହିଁ। କ’ଣ କରିବି ନିରୁପାୟ ହୋଇ ଚା, ପାନ ଦୋକାନ କରି ବସିଛି। ପୁଣି ଯାତ୍ରା ଚାଲିଲେ ରଙ୍ଗମଞ୍ଚକୁ ଚାଲଯିବି ବୋଲି କହିଛନ୍ତି। ସରକାର ତାଙ୍କ ଭଳି କଳାକାରମାନଙ୍କୁ ସହାୟତା ଯୋଗାଇ ଦେବାକୁ ସେ ନିବେଦନ କରିଛନ୍ତି।
