ଗୋପ,୨୨।୫(ଡି.ଏନ୍.ଏ.): ପୁରାତନ ଫୁଲୁବାଙ୍କ ମଠ ଏବେ ଜରାଜୀର୍ଣ୍ଣ ଓ ଅବହେଳିତ ଅବସ୍ଥାରେ ପଡ଼ି ରହିଛି। ଦୀର୍ଘ ୨୪ ବର୍ଷ ଧରି ମହାପ୍ରଭୁ ଶ୍ରୀଜଗନ୍ନାଥ ଗୋଟିଏ ଭଙ୍ଗାଘରେ ପୂଜା ପାଉଥିବାବେଳେ କେହି ଏଥିପ୍ରତି ଗୁରୁତ୍ୱ ନ ଦେବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏହି ମଠର ମହନ୍ତ ଭାଗୀରଥି ଦାସ ଗଁା ଗଁାରେ ମାଗିଯାଚି ପ୍ରଭୁଙ୍କ ନୀତି କରୁଥିବାବେଳେ ବ୍ଲକ ପ୍ରଶାସନ ପକ୍ଷରୁ ଭାଙ୍ଗି ପଡ଼ିଥିବା ନଳକୂପକୁ ମଧ୍ୟ ମରାମତି କରୁନାହିଁ। ରାଜ୍ୟ ସରକାର ବିଭିନ୍ନ ମଠ ମନ୍ଦିରର ପୁନଃ ଉଦ୍ଧାର କରୁଥିବାବେଳେ କାହିଁକି ଏହି ପୁରାତନ ମଠ ପ୍ରତି ଗୁରୁତ୍ୱ ଦିଆଯାଉନାହିଁ ତା’ ମଧ୍ୟ ସାଧାରଣରେ ଅସନ୍ତୋଷ ଦେଖାଦେଇଛି।
କୁହାଯାଏ ସତ୍ୟଯୁଗରେ ଶ୍ରୀଜଗନ୍ନାଥ ଓ ପ୍ରଭୁ ରାମଚନ୍ଦ୍ର ଏହି ସ୍ଥାନରେ ରହିଥିଲେ। ଜଙ୍ଗଲ ମଧ୍ୟରେ ଥିବା ମଠରେ ରହି ଗୋରୁଙ୍କୁ ଜଙ୍ଗଲରେ ଥିବା ହିଂସ୍ର ଜୀବଙ୍କଠାରୁ ସୁରକ୍ଷା ଦେଉଥିଲେ। ସେ ସମୟରେ ମଠକୁ ଆସୁଥିବା ସାଧୁସନ୍ଥ ଓ ସନ୍ନ୍ୟାସୀଙ୍କୁ କେବଳ ଗୋରୁଙ୍କ କ୍ଷୀର ପ୍ରସାଦ ଭାବେ ଦିଆଯାଉଥିଲା ବୋଲି ଜନଶ୍ରୁତି ରହିଛି। କ୍ରମଶଃ ଏହି ପୁରାତନ ମଠର ସଂସ୍କୃତି ପରମ୍ପରା ରୀତିନୀତି ବନ୍ଦ ହୋଇଗଲାଣି। ଏହି ମନ୍ଦିର ୧୯୯୯ ମସିହା ପ୍ରଳୟଙ୍କରୀ ମହାବାତ୍ୟାରେ ଭାଙ୍ଗିରୁଜି ଯିବାରୁ ମଠ ପକ୍ଷରୁ ଏକ ଆଜବେଷ୍ଟସ ଘରେ ମହାପ୍ରଭୁ ଜଗନ୍ନାଥ ପ୍ରତିମୂର୍ତ୍ତିକୁ ପୂଜା କରାଯାଉଛି। ଏହି ମଠର ପୁନଃ ଉଦ୍ଧାର କରିବାକୁ ସ୍ଥାନୀୟ ବାସିନ୍ଦା ଅଜିତ୍ ରାଉତରାୟ, ପ୍ରକାଶଚନ୍ଦ୍ର ପ୍ରଧାନ, ପ୍ରମୋଦ ନିଶଙ୍ଗ, ମାଧବାନନ୍ଦ ଦାଶ ପ୍ରମୁଖ ଦାବି କରିଛନ୍ତି। ଅପରପକ୍ଷେ ପ୍ରତ୍ୟେକ ଦିନ ଏହି ମଠକୁ ରୋଷେଇ କରିବାକୁ ଆସୁଥିବା ଶ୍ରଦ୍ଧାଳୁ ପାନୀୟ ଜଳ ଓ ବିଦ୍ୟୁତ୍ ନ ଥିବାରୁ ବହୁ ଅସୁବିଧା ଭୋଗୁଛନ୍ତି। ଏବେ ସ୍ଥାନୀୟ ଅଞ୍ଚଳର କେତେକ ଯୁବକ ମଠ ମନ୍ଦିରର ରକ୍ଷଣାବେକ୍ଷଣ ନିମନ୍ତେ ମାଗିଯାଚି ମରାମତି କରୁଥିବାବେଳେ ବାରମ୍ବାର ସ୍ଥାନୀୟ ବିଧାୟକ, ଜିଲା ପ୍ରଶାସନ ଓ ବ୍ଲକ ପ୍ରଶାସନ ଏଥିପ୍ରତି ଗୁରୁତ୍ୱ ଦେଉ ନ ଥିବା ଅଭିଯୋଗ ହେଉଛି। ଯଦି ଏହି ପୁରାତନ ଫୁଲୁବାଙ୍କ ମଠ ପ୍ରତି ଗୁରୁତ୍ୱ ଦିଆ ନ ଯାଏ, ତା’ ହେଲେ ଆଗାମୀ ଦିନରେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବେ ବାଲି କହିଛନ୍ତି। ଏ ସମ୍ପର୍କରେ ବିଡ଼ିଓ ଦୀପ୍ତିରାଣୀ ଦାସଙ୍କୁ ପଚାରିବାରେ ଅଚଳ ନଳକୂପ ଉପରେ ଖୁବ୍ଶୀଘ୍ର ଗୁରୁତ୍ୱ ଦେବା ସହ ଅନ୍ୟାନ୍ୟ ଅଭିଯୋଗ ଉପରେ ଜିଲା ପ୍ରଶାସନକୁ ଚିଠି ଲେଖିବେ ବୋଲି କହିଥିଲେ।
