କୋଚ୍‌ଙ୍କ୍‌ ୨ ଲକ୍ଷ ଟଙ୍କାର ପାଉଣା ସୀମାକୁ ହଟାଇଲା କ୍ରୀଡ଼ା ମନ୍ତ୍ରଣାଳୟ
5:06 pmJuly 4, 2020July 4, 2020 / 55

ନୂଆଦିଲ୍ଲୀ,୪।୭(ପି.ଟି.): ଭାରତୀୟ କୋଚ୍‌ଙ୍କ ଲାଗି ଥିବା ୨ ଲକ୍ଷ ଟଙ୍କାର ଦରମା ସୀମାକୁ କେନ୍ଦ୍ର କ୍ରୀଡ଼ାମନ୍ତ୍ରଣାଳୟ ହଟାଇଛି। ଶନିବାର ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି ବୋଲି କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ କହିଛନ୍ତି। ଏହା ଦ୍ୱାରା ତାରକା ଆଥଲେଟ୍‌ଙ୍କୁ ପ୍ରଶିକ୍ଷଣ ଦେଉଥିବା କୋଚ୍‌ମାନେ ଆହୁରି ଭଲ କାମ କରିବାକୁ ଉତ୍ସାହିତ ହେବ। ଏଥି ସହିତ ପୂର୍ବତନ ଖେଳାଳିମାନେ ହାଇ ପରଫର୍ମାନ୍ସ କୋଚ୍‌ ହେବା ପାଇ ମନ ବଳାଇବେ।
ଏହାପୂର୍ବରୁ ଶୁକ୍ରବାର ମନ୍ତ୍ରଣାଳୟ ସବୁ ବିଦେଶୀ କୋଚ୍‌ମାନଙ୍କର ଚୁକ୍ତିକୁ ଆସନ୍ତାବର୍ଷ ସେପ୍ଟେମ୍ବର ୩୦ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏଥିସହିତ ୪ ବର୍ଷୀୟ ଅଲିମ୍ପିକ୍‌ ସାଇକଲକୁ ଦୃଷ୍ଟିରେ ରଖି ଉଭୟ ଭାରତୀୟ ଓ ବିଦେଶୀ କୋଚ୍‌ ଆଗାମୀ ୪ ବର୍ଷ ପାଇଁ ଦାୟିତ୍ୱ ଦେବାକୁ ମଧ୍ୟ ନିଷ୍ପତ୍ତି ନିଆଯାଇଛି। ଭାରତୀୟ କୋଚ୍‌ମାନେ କଠିନ ପରିଶ୍ରମ କରିବା ସହ ଭଲ ପ୍ରଦର୍ଶନ କରୁଛନ୍ତି ଓ ସେମାନଙ୍କୁ ପୁରସ୍କୃତ କରିବାର ଆବଶ୍ୟକତା ରହିଛି ବୋଲି ରିଜିଜୁ କହିଛନ୍ତି। ଆଥଲେଟ୍‌ମାନଙ୍କୁ ପ୍ରଶିକ୍ଷଣ ଦେବା ପାଇଁ ଦେଶରେ ଥିବା ଶ୍ରେଷ୍ଠ କୋଚିଂ ପ୍ରତିଭାକୁ ଆକର୍ଷଣ କରିବାକୁ ସରକାର ଚାହୁଁଛନ୍ତି। ପୂର୍ବରୁ ଥିବା ୨ ଲକ୍ଷ ଟଙ୍କାର ପାଉଣା ସୀମା ଏଥିରେ ଅନ୍ତରାୟ ସୃଷ୍ଟି କରିବା ଆମେ ଚାହୁଁନାହୁଁ ବୋଲି ସେ ସ୍ପଷ୍ଟ କରିଛନ୍ତି। ପୂର୍ବତନ ତାରକା ଆଥଲେଟମାନଙ୍କୁ ଆକର୍ଷିତ କରିବାକୁ ଓ ଦେଶରେ କ୍ରୀଡ଼ାର ବିକାଶ ପାଇଁ ବର୍ଦ୍ଧିତ ପାଉଣା ଓ ଦୀର୍ଘ ଦିନର ଚୁକ୍ତି ନେଇ ପ୍ରସ୍ତାବ ଦିଆଯିବ। ଅଲିମ୍ପିକ ସମେତ ଶ୍ରେଷ୍ଠ ଅନ୍ତର୍ଜାତୀୟ ପ୍ରତିଯୋଗିତାକୁ ଦୃଷ୍ଟିରେ ରଖି ଆଥଲେଟଙ୍କ ପ୍ରଶିକ୍ଷଣ ପାଇଁ ଏହି ସବୁ ନିଷ୍ପତ୍ତି ନିଆଯିବ।
ପୂର୍ବରୁ କାର୍ଯ୍ୟକରୁଥିବା କୋଚ୍‌ଙ୍କୁ ଅଧିକ ପାଉଣା ଦେବା ସହ ୪ ବର୍ଷୀୟା ଚୁକ୍ତିରେ ସ୍ବାକ୍ଷର କରିବା ଲାଗି ଅନୁମତି ଦିଆଯିବ। ପୂର୍ବତନ ଆଥଲେଟମାନଙ୍କ ପ୍ରଦର୍ଶନ ଓ କୋଚ୍‌ ହିସାବରେ ତାଙ୍କ ପ୍ରଦର୍ଶନକୁ ଦୃଷ୍ଟିରେ ରଖି ପାଉଣା ସମ୍ପର୍କରେ ନିଷ୍ପତ୍ତି ନିଆଯିବ। ସବୁ ନୂଆ ଓ ଏବେକାର କୋଚ୍‌ ଜାତୀୟ ପ୍ରଶିକ୍ଷଣ ଶିବିର ଓ ସାଇ ନ୍ୟାଶନାଲ ସେଣ୍ଟର ଅଫ୍‌ ଏକ୍ସିଲେନ୍ସ (ଏନ୍‌ସିଓଇଏସ୍‌)ରେ ପ୍ରଶିକ୍ଷଣ ଦେବେ। ଏହି କୋଚ୍‌ମାନଙ୍କୁ କ୍ରୀଡ଼ା ମନ୍ତ୍ରଣାଳୟ ଓ ଜାତୀୟ ସ୍ପୋଟର୍‌ସ ଫେଡେରେଶନ ମିଳିତ ଭାବେ ଚୟନ କରିବେ ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି। ମନ୍ତ୍ରଣାଳୟର ଏହି ନିଷ୍ପତ୍ତିକୁ ଦେଶର ମୁଖ୍ୟ ବ୍ୟାଡ୍‌ମିଣ୍ଟନ କୋଚ୍‌ ପୁଲେଲା ଗୋପୀଚାନ୍ଦ ସ୍ବାଗତ କରିଛନ୍ତି। ଏ ନେଇ ପୂର୍ବରୁ ଦାବି କରାଯାଉଥିଲା। ଏହା ନିଶ୍ଚିତ ଭାବେ ଖୁସିର କଥା। ଏହା ଦ୍ୱାରା ଦେଶରେ କ୍ରୀଡ଼ା ଉନ୍ନତି ହେବ ବୋଲି ସେ କହିଛନ୍ତି। ଏଥିସହିତ ୨୦୨୮ ଅଲିମ୍ପିକ୍ସକୁ ଦୃଷ୍ଟିରେ କ୍ରୀଡ଼ା ପ୍ରତିଭା ଚିହ୍ନଟ ଓ ବିକାଶ ପାଇଁ କାର୍ଯ୍ୟ କରାଯିବ ବୋଲି ମନ୍ତ୍ରଣାଳୟ କହିଛି।