ଓ୍ବାଶିଂଟନ,୧୬ା୭(ପି.ଟି.): ହଂକଂରେ ଚାଇନା ନୂଆ ଆଇନ ଲାଗୁ କରିବା ପରେ ଏବେ ଆମେରିକା ଏହି ସହରର ସ୍ବତନ୍ତ୍ର ମାନ୍ୟତାକୁ ଶେଷ କରିଦେଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମଙ୍ଗଳବାର ହଂକଂ ସ୍ବାୟତ୍ତତା ଆଇନରେ ସ୍ବାକ୍ଷର କରିଛନ୍ତି। ଏହାସହ ହଂକଂକୁ ଆମେରିକାଠାରୁ ଅଗ୍ରାଧିକାର ଭିତ୍ତିରେ ମିଳୁଥିବା ସୁବିଧାଗୁଡ଼ିକୁ ଶେଷ କରିବା ପାଇଁ ଏକ ଏକ୍ଜିକ୍ୟୁଟିଭ୍ ଅର୍ଡର ଉପରେ ମଧ୍ୟ ସେ ମୋହର ମାରିଛନ୍ତି। ଫଳରେ ସାରା ବିଶ୍ୱର ବ୍ୟାଙ୍କଗୁଡ଼ିକ ବ୍ୟବସାୟ ପାଇଁ ଚାଇନା ଓ ଆମେରିକା ମଧ୍ୟରୁ କୌଣସି ଗୋଟିଏ ଦେଶକୁ ବାଛିବାକୁ ବାଧ୍ୟହୋଇଯିବେ। ହଂକଂ ପୋଲିସ ଓ ଚାଇନା ଅଧିକାରୀମାନଙ୍କ ଏବଂ ସେମାନଙ୍କ ସହ ଜଡ଼ିତ ବ୍ୟାଙ୍କଗୁଡ଼ିକ ଉପରେ ସ୍ବାୟତ୍ତତା ପ୍ରତି ବିପଦ ଥିବା ଦର୍ଶାଇ କଟକଣା ଲାଗୁ କରାଯାଇପାରିବ।
ହ୍ବାଇଟ୍ ହାଉସ୍ରେ ଏକ ପ୍ରେସ୍ କନ୍ଫରେନ୍ସକୁ ସମ୍ବୋଧିତ କରି ରାଷ୍ଟ୍ରପତି ଟ୍ରମ୍ପ୍ ହଂକଂବାସୀଙ୍କ ବିରୋଧରେ ଚାଇନାର ଦମନମୂଳକ କାର୍ଯ୍ୟାନୁଷ୍ଠାନ ପାଇଁ ବେଜିଂକୁ ଦାୟୀ କରିଛନ୍ତି। ଟ୍ରମ୍ପ୍ କହିଛନ୍ତି, ସେ ଏକ ଆଇନ ଓ କାର୍ଯ୍ୟନିର୍ବାହୀ ଆଦେଶରେ ସ୍ବାକ୍ଷର କରିଛନ୍ତି। ହଂକଂ ଅଟୋନମି ଆକ୍ଟ ସର୍ବସମ୍ମତି କ୍ରମେ କଂଗ୍ରେସ ଦ୍ୱାରା ଗୃହୀତ ହୋଇଛି। ଏହି ଆଇନ ତାଙ୍କ ପ୍ରଶାସନ ପାଇଁ ଏକ ନୂଆ ଅସ୍ତ୍ର ସଦୃଶ। ଏହାଦ୍ୱାରା ହଂକଂର ସ୍ବାଧୀନତାକୁ ଶେଷ କରିଦେବାରେ ସମ୍ପୃକ୍ତ ଥିବା ସଂସ୍ଥା ଓ ବ୍ୟକ୍ତିମାନଙ୍କୁ ଉତ୍ତରଦାୟୀ କରାଯାଇପାରିବ। ହଂକଂରେ ଯାହା ଘଟିଛି ଆମେ ସମସ୍ତେ ଦେଖିଛୁ। ତାହା ଆଦୌ ଭଲ ନୁହେଁ। ହଂକଂବାସୀଙ୍କ ସ୍ବାଧୀନତା ଓ ଅଧିକାରଗୁଡ଼ିକୁ ଛଡ଼ାଇ ନିଆଯାଇଛି। ଏଥିଯୋଗୁ ହଂକଂ ମୁକ୍ତ ବଜାର ସହିତ ପ୍ରତିଦ୍ୱନ୍ଦ୍ୱିତା କରିପାରିବ ନାହିଁ। ବହୁସଂଖ୍ୟକ ଲୋକ ହଂକଂ ଛାଡ଼ି ଚାଲିଯିବେ ବୋଲି ଆଶଙ୍କା ସୃଷ୍ଟି ହେଲାଣି। ଏଣିକି ହଂକଂ ସହିତ ଚାଇନା ଭଳି ବ୍ୟବହାର କରାଯିବ। ଏହାକୁ କୌଣସି ବିଶେଷାଧିକାର ମିଳିବ ନାହିଁ କି ହଂକଂକୁ କୌଣସି ସମ୍ବେଦନଶୀଳ ଜ୍ଞାନକୌଶଳ ରପ୍ତାନି କରାଯିବ ନାହିଁ। ଚାଇନା ଉପରେ ଲଗାଯାଇଥିବା କଟକଣା ଯୋଗୁ ଆମେରିକାର ଲାଭ ହୋଇଛି। ଚାଇନାରେ ୬୭ ବର୍ଷ ମଧ୍ୟରେ ପ୍ରଥମଥର ପାଇଁ ଏତେ ଖରାପ ଆର୍ଥିକ ସ୍ଥିତି ସୃଷ୍ଟି ହୋଇଛି। ଏହି ଅବସରରେ ଟ୍ରମ୍ପ୍ ଚାଇନା ବିରୋଧରେ ନିଜକୁ ସବୁଠୁ କଠୋର ରାଷ୍ଟ୍ରପତି ଭାବେ ଅଭିହିତ କରିଛନ୍ତି।
ପ୍ରକାଶ ଯେ, ୧୯୯୭ରେ ଆମେରିକା ଓ ହଂକଂ ମଧ୍ୟରେ ଏକ ଚୁକ୍ତି ସ୍ବାକ୍ଷର ହୋଇଥିଲା। ଏହି ଚୁକ୍ତି ଅନୁସାରେ ଆମେରିକା ସେବେଠାରୁ ହଂକଂକୁ ସ୍ବତନ୍ତ୍ର ବାଣିଜ୍ୟ ପାଇଁ ମାନ୍ୟତା ପ୍ରଦାନ କରିଆସୁଥିଲା। ଇତିମଧ୍ୟରେ ଚାଇନା ହଂକଂ ସୁରକ୍ଷା ଆଇନକୁ ମଞ୍ଜୁରୀ ଦେବା ପରେ ବେଜିଂ ବିରୋଧରେ ଆନ୍ଦୋଳନ ତେଜିବାରେ ଲାଗିଛି। ଉକ୍ତ ବିବାଦୀୟ ଆଇନ ବିରୋଧରେ ଗଣତନ୍ତ୍ର ସପକ୍ଷବାଦୀ ଦଳଗୁଡ଼ିକ ପକ୍ଷରୁ କରାଯାଇଥିବା ମତଦାନ ବେଳେ ୬ ଲକ୍ଷରୁ ଊର୍ଦ୍ଧ୍ୱ ଲୋକ ଭୋଟ ଦେଇଥିଲେ। ଚାଇନା ଏହି ମତଦାନକୁ ବେଆଇନ ଘୋଷଣା କରିଛି।
