ସମ୍ବଲପୁର,୪ା୧୦(ବ୍ୟୁରୋ): ସମ୍ବଲପୁର ଜିଲା ବୁର୍ଲାସ୍ଥିତ ଭିସୁଟ୍ ଉନ୍ନତୀକରଣ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କିଛିଦିନ ପୂର୍ବରୁ ୨ହଜାର କୋଟି ଟଙ୍କାର ସ୍ବତନ୍ତ୍ର ପ୍ୟାକେଜ ଘୋଷଣା କରିଛନ୍ତି। ଅନୁରୂପ ଭାବେ ଭିମ୍ସାର ପାଇଁ ଖୁବ୍ଶୀଘ୍ର ସ୍ବତନ୍ତ୍ର ପ୍ୟାକେଜ ଘୋଷଣା କରିବେ। ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି। ସୋମବାର ସମ୍ବଲପୁରର ଏକ ଘରୋଇ ଡେଣ୍ଟାଲ କ୍ଲିନିକ ଉଦ୍ଘାଟନୀ ଉତ୍ସବରେ ଯୋଗଦେଇ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାଶ ଏହା କହିଛନ୍ତି। ହେଲେ ମନ୍ତ୍ରୀଙ୍କ ଘୋଷଣାର ବାସ୍ତବତାକୁ ନେଇ ସାଧାରଣରେ ସନ୍ଦେହ ପ୍ରକାଶ ପାଇଛି।
ମନ୍ତ୍ରୀ ଦାଶ ଆହୁରି କହିଥିଲେ, ପଶ୍ଚିମ ଓଡ଼ିଶାବାସୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ସ୍ବତନ୍ତ୍ର ଦୃଷ୍ଟି ରହିଛି। ବଲାଙ୍ଗୀର, କଳାହାଣ୍ଡି, ସୁନ୍ଦରଗଡ଼ ଭଳି ଜିଲାରେ ଏବେ ମେଡିକାଲ କଲେଜ ହୋଇଛି। ଝାରସୁଗୁଡ଼ା ଜିଲାରେ ମଧ୍ୟ ଏକ ମେଡିକାଲ କଲେଜ ଖୋଲିବାକୁ ପ୍ରକ୍ରିୟା ଆରମ୍ଭ ହୋଇଛି। ଗୁରୁ ରବିଶଙ୍କର ଏ ନେଇ ଆବେଦନ କରିଛନ୍ତି। ଏହାସହ ବରଗଡ଼ ଓ ଝାରସୁଗୁଡ଼ା ଜିଲାରେ କ୍ୟାନ୍ସର ହସ୍ପିଟାଲ ମଧ୍ୟ ଖୁବ୍ଶୀଘ୍ର ଆରମ୍ଭ ହୋଇଯିବ। ପଶ୍ଚିମ ଓଡ଼ିଶାବାସୀଙ୍କୁ ସ୍ବାସ୍ଥ୍ୟସେବା ପାଇବାରେ ଆଉ ସମସ୍ୟା ହେବନାହିଁ। ଭିମ୍ସାରକୁ ସୁପର ସ୍ପେସାଲିଟି ଭାବେ ଘୋଷଣା କରି ଏହାର ଭିତ୍ତିଭୂମିର ବିକାଶ କରାଯାଉଛି। ଆଗାମୀ ଦିନରେ ଭିମ୍ସାରରେ ସମସ୍ତ ପ୍ରକାର ସୁବିଧା ଉପଲବ୍ଧ ହେବ। ଏହାର ସର୍ବାଙ୍ଗୀନ ଉନ୍ନତି ପାଇଁ ମୁଖ୍ୟମନ୍ତ୍ରୀ ଏକ ସ୍ବତନ୍ତ୍ର ପ୍ୟାକେଜ ଘୋଷଣା କରିବେ ବୋଲି ମନ୍ତ୍ରୀ କହିଥିଲେ। ତେବେ ସ୍ବାସ୍ଥ୍ୟମନ୍ତ୍ରୀଙ୍କ ଘୋଷଣାର କେତେ ବାସ୍ତବତା ରହିଛି ତାହାକୁ ଅପେକ୍ଷା କରାଯାଉଛି। କାରଣ ଭିମ୍ସାରକୁ ଏତେବର୍ଷ ବିତିଯାଇଥିଲେ ମଧ୍ୟ ଏବେ ସମସ୍ୟା ଘେରରେ ଛନ୍ଦି ହୋଇରହିଛ। ସାମାନ୍ୟ ମୃତଦେହ ବ୍ୟବଚ୍ଛେଦ ପାଇଁ ଅତ୍ୟାଧୁନିକ ବ୍ୟବସ୍ଥା ନାହିଁ। ଛେଣି ଓ ହାତୁଡିରେ ମୃତ ଶରୀର କଟାଯାଇ ବ୍ୟବଚ୍ଛେଦ କରାଯାଉଛି। ସୁପର ସ୍ପେସାଲିଟି ଘୋଷଣାକୁ ପ୍ରାୟ ୮ବର୍ଷ ବିତିଯାଇଥିଲେ ମଧ୍ୟ କାର୍ଯ୍ୟକ୍ଷମ ହୋଇପାରି ନାହିଁ। ସେହିପରି କ୍ୟାନ୍ସର ବିଭାଗକୁ ଅପଗ୍ରେଡେଶନ କରାଯାଇ ପାରି ନାହିଁ। ଏତେବଡ଼ ମେଡିକାଲ କଲେଜ ହୋଇଥିବା ସତ୍ତ୍ବେ ଆଇସିୟୁରେ ସିଟ୍ ସଂଖ୍ୟା ବୃଦ୍ଧି ହୋଇପାରି ନାହିଁ। ଅନେକ ଗୁରୁତର ରୋଗୀଙ୍କ ଜୀବନ ହାନି ହେଉଛି। ଟ୍ରମା କେୟାର ସେଣ୍ଟର ବିଭିନ୍ନ ସମସ୍ୟା ଯୋଗୁ ଠିକ ଭାବେ ପରିଚାଳନା ହୋଇପାରୁନାହିଁ। ଏପରି କି ବହୁ ଦିନରୁ ଭିମ୍ସାରରେ ଓପିଡି ଟିକେଟ ଅନ୍ଲାଇନରେ ସୁବିଧା ହେବ ବୋଲି ଘୋଷଣା କରାଯାଇଥିଲା। ତାହା ମଧ୍ୟ କାର୍ଯ୍ୟକାରୀ ହୋଇ ନାହିଁ। ତେଣୁ ସ୍ବାସ୍ଥ୍ୟମନ୍ତ୍ରୀ ଦାଶ କରିଥିବା ଘୋଷଣାର କେତେ ବାସ୍ତବତା ରହିଛି ତାହା ସମୟ ଆସିଲେ ଜଣାପଡ଼ିବ ବୋଲି ସାଧାରଣରେ ଆଲୋଚନା ହେଉଛି। ସୂଚନାଯୋଗ୍ୟ ଭିମ୍ସାରରେ ପଶ୍ଚିମ ଓଡ଼ିଶା ସମେତ ଛତିଶଗଡ଼, ଝାଡ଼ଖଣ୍ଡ ଭଳି ରାଜ୍ୟର ଲୋକେ ସ୍ବାସ୍ଥ୍ୟସେବା ପାଇଁ ନିର୍ଭର କରନ୍ତି।
