ନୂଆଦିଲ୍ଲୀ,୩୦।୮: ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ଯୁଦ୍ଧ ମଧ୍ୟରେ ନିଯୁକ୍ତି ପ୍ରସଙ୍ଗ ଆଲୋଚନାର କେନ୍ଦ୍ରବିନ୍ଦୁ ପାଲଟିଛି। ଆମେରିକା ସରକାର ଭାରତ ଉପରେ ୫୦ ପ୍ରତିଶତ ଟାରିଫ୍ ଲାଗୁ କରିଛନ୍ତି, ଯାହା ରପ୍ତାନି କ୍ଷେତ୍ର ପ୍ରଭାବିତ ହେବା ସ୍ବାଭାବିକ। କୁହାଯାଉଛି ଯେ ଏହା ନିଯୁକ୍ତିକୁ ମଧ୍ୟ ପ୍ରଭାବିତ କରିବ। ଏବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାର ସମାଧାନ ଖୋଜି ବାହାର କରିଛନ୍ତି। ପ୍ରଧାନମନ୍ତ୍ରୀ ମୋଦି ଦୁଇ ଦିନିଆ ଜାପାନ ଗସ୍ତରେ ଅଛନ୍ତି। ଏହି ସମୟ ମଧ୍ୟରେ ଭାରତ ଏବଂ ଜାପାନ ମଧ୍ୟରେ ନିଯୁକ୍ତି ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ଚୁକ୍ତି ହୋଇଛି। ଏହି ଚୁକ୍ତି ଅନୁଯାୟୀ, ଜାପାନ ଆଗାମୀ ୫ ବର୍ଷ ମଧ୍ୟରେ ୫୦,୦୦୦ କୁଶଳୀ ଏବଂ ଅର୍ଦ୍ଧ-କୁଶଳୀ କର୍ମଚାରୀଙ୍କୁ ନିଯୁକ୍ତି ପ୍ରଦାନ କରିବ। ଏହି ସମୟ ମଧ୍ୟରେ ୫ ଲକ୍ଷ ଲୋକଙ୍କ ବିନିମୟର ଲକ୍ଷ୍ୟ ରଖାଯାଇଛି। ଏହା ଭାରତୀୟ ପ୍ରତିଭା ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ।
ଭାରତ ଏବଂ ଜାପାନ ଶୁକ୍ରବାର ମାନବ ସମ୍ବଳ ସହଯୋଗ ଉପରେ ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟ ଯୋଜନା ଚୂଡ଼ାନ୍ତ କରିଛନ୍ତି। ଯାହା ଅଧୀନରେ ଆଗାମୀ ପାଞ୍ଚ ବର୍ଷ ମଧ୍ୟରେ ଉଭୟ ଦେଶ ମଧ୍ୟରେ ୫ ଲକ୍ଷ ଲୋକଙ୍କୁ ବିନିମୟ କରାଯିବ। ଏଥିରେ ୫୦,୦୦୦ କୁଶଳୀ ଏବଂ ଅର୍ଦ୍ଧ-କୁଶଳୀ ଭାରତୀୟ ବୃତ୍ତିଗତଙ୍କୁ ଜାପାନ ପଠାଯିବ। ବୈଦେଶିକ ମନ୍ତ୍ରଣାଳୟ (MEA) ଏହି ସୂଚନା ଦେଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜାପାନ ଗସ୍ତ ସମ୍ପର୍କରେ ଆୟୋଜିତ ପ୍ରେସ ବ୍ରିଫିଂରେ ବୈଦେଶିକ ସଚିବ ବିକ୍ରମ ମିଶ୍ର କହିଛନ୍ତି ଯେ, ଉଭୟ ଦେଶ ସ୍ବୀକାର କରିଛନ୍ତି ଯେ ଭାରତରେ ବହୁ ସଂଖ୍ୟକ ଦକ୍ଷ ଏବଂ ଅର୍ଦ୍ଧ-ଦକ୍ଷ ମାନବଶକ୍ତି ଉପଲବ୍ଧ, ଯେତେବେଳେ ଜାପାନର ଅର୍ଥନୀତିରେ କିଛି ନିର୍ଦ୍ଦିିଷ୍ଟ କ୍ଷେତ୍ରରେ ଶ୍ରମିକଙ୍କ ଅଭାବ ରହିଛି। ଏହାକୁ ଧ୍ୟାନରେ ରଖି ଏହି ଚୁକ୍ତିନାମା କରାଯାଇଛି।
