ନୂଆଦିଲ୍ଲୀ,୨୯।୧: ୨୦୨୩ ଦିନିକିଆ ବିଶ୍ୱକପ୍ ଭାରତରେ ଖେଳାଯିବ। ୧୦ ବର୍ଷ ପରେ ଆଇସିସି ଟ୍ରଫି ଜିତିବା ଉପରେ ଭାରତୀୟ ଟିମ୍ର ନଜର ରହିଛି। ଏହାକୁ ନେଇ ପୂର୍ବତନ ଅଧିନାୟକ ଏବଂ ପୂର୍ବତନ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ଦଳକୁ ଗୁରୁମନ୍ତ୍ର ଦେଇଛନ୍ତି।
ଗାଙ୍ଗୁଲି କହିଛନ୍ତି, ଭାରତୀୟ ଟିମ୍ କଦାପି ଦୁର୍ବଳ ନୁହେଁ। କାରଣ ଆମ ପାଖରେ ବହୁତ ପ୍ରତିଭା ଅଛନ୍ତି। ଅଧାରୁ ଅଧିକ ଖେଳାଳିଙ୍କୁ ଦଳରେ ଖେଳିବାର ସୁଯୋଗ ପାଆନ୍ତି ନାହିଁ। ରାହୁଲ ଦ୍ରାବିଡ, ରୋହିତ ଶର୍ମା ଏବଂ ଚୟନକର୍ତ୍ତାମାନେ ବିଶ୍ୱକପ୍ ପର୍ଯ୍ୟନ୍ତ ଏହି ଦଳ ସହ ଖେଳିବା ଜାରି ରଖନ୍ତୁ ବୋଲି ଚାହୁଁଥିବା ଗାଙ୍ଗୁଲି କହିଛନ୍ତି।
ଏହାଛଡ଼ା ଯେତେବେଳେ ଟିମ୍ ଇଣ୍ଡିଆ ବିଶ୍ୱକପ୍କୁ ଯାଏ, ସେତେବେଳେ ସେମାନେ କୌଣସି ପ୍ରକାର ବୋଝ ରଖିବା ଉଚିତ ନୁହେଁ। ଟ୍ରଫି ଜିତନ୍ତୁ ଅବା ନଜିତନ୍ତୁ, ଭୟଭୀତ ନ ହୋଇ କ୍ରିକେଟ ଖେଳିବା ଉଚିତ। ଯେଉଁ ଟିମ୍ ପାଖରେ ଶୁଭମନ ଗିଲ, ରୋହିତ ଶର୍ମା, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଜସପ୍ରିତ ବୁମ୍ରା, ମହମ୍ମଦ ଶାମି ଏବଂ ରବିନ୍ଦ୍ର ଜାଡେଜା ଭଳି ଖେଳାଳି ଅଛନ୍ତି, ସେ କେବେ ବି ଦୁର୍ବଳ ନୁହେଁ ବୋଲି ଗାଙ୍ଗୁଲି ମଧ୍ୟ କହିଛନ୍ତି।
କହିରଖୁଛୁ, ଟିମ୍ ଇଣ୍ଡିଆ ବିଶ୍ୱକପ୍ର ପ୍ରସ୍ତୁତି ଆରମ୍ଭ କରିଛି। ପ୍ରଥମେ ଶ୍ରୀଲଙ୍କା ଏବଂ ପରେ ନ୍ୟୁଜିଲାଣ୍ଡ ବିପକ୍ଷରେ ଦିନିକିଆ ସିରିଜରେ ଟିମ୍ ଇଣ୍ଡିଆ କବ୍ଜା କରିଛି। ଅଧିନାୟକ ରୋହିତ ଶର୍ମା ନେତୃତ୍ୱାଧୀନ ଭାରତୀୟ ଟିମ୍ ଲଗାତାର ଭାବେ ଆଗକୁ ବଢ଼ୁଛି।
