ଭୁବନେଶ୍ୱର,୧୪।୭(ବ୍ୟୁରୋ): କରୋନା ମହାମାରୀ ପାଇଁ ଦୀର୍ଘଦିନ ଧରି ବନ୍ଦ ଥିବା ଓଡ଼ିଆ ଫିଲ୍ମ ଏବଂ ଧାରାବାହିକର ଶୁଟିଂ ପାଇଁ ରାଜ୍ୟ ସ୍ବତନ୍ତ୍ର ରିଲିଫ କମିଶନର(ଏସ୍ଆର୍ସି) ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର(ଏସ୍ଓପି) ଜାରି କରିଛନ୍ତି। ଉଭୟ ଇନ୍ଡୋର ଓ ଆଉଟ୍ଡୋର୍ ଶୁଟିଂ ସହ ଓଟିଟି ପ୍ଲାଟଫର୍ମକୁ ମଧ୍ୟ ଏହି ଏସ୍ଓପି ଅନୁକରଣ କରିବାକୁ ନିର୍ଦ୍ଦେଶ ଦିଆଯାଇଛି। ତେବେ ସଂକ୍ରମଣ ବଢୁଥିବାରୁ ଶୁଟିଂ ସେଟ୍ରେ ସମସ୍ତ ପ୍ରକାର କୋଭିଡ୍ ନିୟମ ଓ ସୁରକ୍ଷା ବ୍ୟବସ୍ଥା ଗ୍ରହଣ କରିବାକୁ କୁହାଯାଇଛି। ଏନେଇ ଯୁଗ୍ମ ରିଲିଫ କମିଶନର ପ୍ରଭାତ ରଞ୍ଜନ ମହାପାତ୍ର ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ ଏମ୍ଡିଙ୍କୁ ଚିଠି ଲେଖି ଅବଗତ କରାଇଛନ୍ତି।
ପ୍ରଡକ୍ସନ ସଂସ୍ଥାଗୁଡ଼ିକ କଳାକାର, କର୍ମଚାରୀ ଓ ଅନ୍ୟ ଷ୍ଟେକ୍ ହୋଲ୍ଡରମାନଙ୍କୁ କରୋନା ସଂକ୍ରାନ୍ତରେ ସଚେତନ କରିବା ସହ ପ୍ରାକ୍ ସଚେତନମୂଳକ ପଦକ୍ଷେପ ଗ୍ରହଣ କରିବାକୁ କୁହାଯାଇଛି। ୬୫ବର୍ଷରୁ ଅଧିକ ବୟସ୍କ କଳାକାର କିମ୍ବା କ୍ରିଉ ସଦସ୍ୟ ଓ ଦର୍ଶକ ଶୁଟିଂ ସେଟ୍ ଯିବେନାହିଁ। ଶୁଟିଂରେ ସାମିଲ ଥିବା କେହି କୋଭିଡ୍-୧୯ ପଜିଟିଭ୍ ଚିହ୍ନଟ ହେଲେ ତୁରନ୍ତ ତାଙ୍କୁ ଚିକିତ୍ସା ପାଇଁ ପଠାଯିବ। ପ୍ରତିଦିନ ଶୁଟିଂକୁ ଯିବା ପୂର୍ବରୁ ସମସ୍ତଙ୍କର ତାପମାତ୍ରା ଯାଞ୍ଚ କରାଯିବା ସହ ଅନ୍ୟ ଲକ୍ଷଣ ସମ୍ପର୍କରେ ପଚରାଯିବ। ଯଥାସମ୍ଭବ ବିନା ଏସି କୋଠରୀ ଏବଂ ଟେଣ୍ଟ ବ୍ୟବହାର କରାଯିବା ସହ ୫ଜଣରୁ ଊର୍ଦ୍ଧ୍ୱ ଲୋକଙ୍କୁ ଭିତରକୁ ନ ଛାଡ଼ିବାକୁ ପରାମର୍ଶ ଦିଆଯାଇଛି। ଏଥିସହ ମୁଖ୍ୟ କଳାକାରଙ୍କୁ ଛାଡ଼ି ମାତ୍ର ୩୦ ପ୍ରତିଶତ କ୍ରିଉ ସଦସ୍ୟଙ୍କୁ ସଂସ୍ଥାଗୁଡ଼ିକ ସେଟ୍ରେ ରଖିପାରିବେ। ସମସ୍ତେ ମାସ୍କ ପିନ୍ଧିବା ଓ ସାମାଜିକ ଦୂରତ୍ୱ ରକ୍ଷା କରିବା ବାଧ୍ୟତାମୂଳକ ହେବ। ଅନୁମତି ପାଇଥିବା କଳାକାର ଏବଂ କ୍ରିଉ ସଦସ୍ୟମାନେ ଶୁଟିଂ ସେଟ୍କୁ ଯିବାବେଳେ ନିଜ ପରିଚୟ ପତ୍ର ଦେଖାଇବେ। ସମସ୍ତେ ଆରୋଗ୍ୟ ସେତୁ ଆପ୍ ଡାଉନ୍ଲୋଡ୍ କରିବେ। ବ୍ୟବହୃତ ସମସ୍ତ ଉପକରଣକୁ ନିୟମିତ ବ୍ୟବଧାନରେ ସାନିଟାଇଜ୍ କରାଯିବ। ବନ୍ଦ କ୍ୟାମ୍ପସ୍ ନଚେତ୍ ଷ୍ଟୁଡିଓ ଭିତରେ କେବଳ ଶୁଟିଂକୁ ଅନୁମତି ମିଳିବ।
ସେହିଭଳି ଯଥାସମ୍ଭବ ଫେସ୍ଟାଇମ୍, ଜୁମ୍ ଏବଂ ସ୍କାଇପି ମାଧ୍ୟମରେ କାଷ୍ଟିଂ କରିବାକୁ କୁହାଯାଇଛି। ସେହିଭଳି ବ୍ରଶ ମାଧ୍ୟମରେ ମେକଅପ୍ କରାଯିବ। ମେକ୍ଅପ୍ ଆର୍ଟିଷ୍ଟ ଥରେ ମେକ୍ଅପ୍ କରିବାପରେ ହାତକୁ ଭଲଭାବେ ସାନିଟାଇଜ୍ କରି ଅନ୍ୟଜଣଙ୍କୁ ମେକ୍ଅପ୍ କରିବେ। ସମସ୍ତଙ୍କ ପାଇଁ ଭିନ୍ନ ଭିନ୍ନ ମେକ୍ଅପ୍ କିଟ୍ ରଖାଯିବା ସହ ମେକ୍ଅପ୍ ଆର୍ଟିଷ୍ଟ ପିପିଇ କିଟ୍ କିମ୍ବା ଫେସ୍ ସିଲ୍ଡ ପିନ୍ଧିବା ବାଧ୍ୟତାମୂଳକ। ସେହିଭଳି କଷ୍ଟ୍ୟୁମ୍ ପରିଧାନ ବେଳେ ମଧ୍ୟ ଏସ୍ଓପିକୁ କଡ଼ାକଡ଼ି ଭାବେ ଅନୁକରଣ କରିବାକୁ କୁହାଯାଇଛି। ଆଉଟ୍ଡୋର୍ ଶୁଟିଂ ଏବଂ ରାଜ୍ୟ ବାହାରେ ଶୁଟିଂ କରିବାକୁ ଯଥାସମ୍ଭବ ବାରଣ କରିବାକୁ କୁହାଯାଇଛି। ବାହାରକୁ ଶୁଟିଂ କରିବାକୁ ଗଲେ ରାଜ୍ୟ ସରକାରଙ୍କ ଅନୁମତି ନେବା ବାଧ୍ୟତାମୂଳକ। କ୍ରିଉ ସଦସ୍ୟଙ୍କ ପାଇଁ ଶୁଟିଂସ୍ଥଳୀରେ ରହିବାର ବ୍ୟବସ୍ଥା କରାଯିବ ବୋଲି ଏସ୍ଓପିରେ ଦର୍ଶାଯାଇଛି।