ଲକ୍ଷ୍ନୌ,୨୩।୧୧: ୨୦୨୨ରେ ହେବାକୁ ଥିବା ଉତ୍ତର ପ୍ରଦେଶ ବିଧାନସଭା ନିର୍ବାଚନ ପାଇଁ ବିରୋଧୀ ସମାଜବାଦୀ ପାର୍ଟି (ଏସ୍ପି) ଏବଂ ରାଷ୍ଟ୍ରୀୟ ଲୋକ ଦଳ (ଆର୍ଏଲ୍ଡି) ମଧ୍ୟରେ ମେଣ୍ଟ କରିବାକୁ ସହମତି ହୋଇଛି। ଆର୍ଏଲ୍ଡି ଅଧ୍ୟକ୍ଷ ଜୟନ୍ତ ଚୌଧରୀ ମଙ୍ଗଳବାର ଏହି ସୂଚନା ଦେଇଛନ୍ତି। ଜୟନ୍ତ ଲକ୍ଷ୍ନୌରେ ଏସ୍ପି ଅଧ୍ୟକ୍ଷ ଅଖିଳେଶ ଯାଦବଙ୍କୁ ଭେଟି ଆଲୋଚନା କରିବା ପରେ ଉଭୟଙ୍କ ଫଟୋ ଟୁଇଟର୍ରେ ଶେୟାର କରି ‘ବଢ଼ତେ କଦମ୍’ ବୋଲି କ୍ୟାପଶନ୍ ଲେଖିଛନ୍ତି। ଦୁଇ ଦଳ ଏକାଠି ନିର୍ବାଚନ ଲଢ଼ିବା ଉପରେ ଆନୁଷ୍ଠାନିକ ଘୋଷଣା ଖୁବ ଶୀଘ୍ର କରାଯିବ। ଭାଜପା ସହ କୌଣସି ବୁଝାମଣା ନେଇ ପ୍ରଶ୍ନ ଉଠୁନାହିଁ ବୋଲି ସେ କହିଛନ୍ତି। ସେହିପରି ଅଖିଳେଶ ମଧ୍ୟ ଆସନ ବୁଝାମଣା ଉପରେ ଆଲୋଚନା ଚୂଡ଼ାନ୍ତ ପର୍ଯ୍ୟାୟରେ ରହିଥିବା ସୂଚନା ଦେଇଛନ୍ତି। ପ୍ରକାଶ ଯେ, ୨୦୧୭ ଲୋକ ସଭା ଉପନିର୍ବାଚନ ବେଳେ ମଧ୍ୟ ଏସ୍ପି-ଆର୍ଏଲ୍ଡି ମେଣ୍ଟ ହୋଇଥିଲା।
