ନୂଆଦିଲ୍ଲୀ, ୭।୮: ସିଜେପି (CJP) ପ୍ରତିବାଦ ସମୟରେ ଅନଶନ କରିଥିବା ସୋନମ ୱାଙ୍ଗଚୁକ ଏକ ବଡ଼ ଖୁଲାସା କରିଛନ୍ତି। ଏହି ଖୁଲାସା ସହ ସେ ରାହୁଲ ଗାନ୍ଧୀଙ୍କ ଉପରେ ଅଭିଯୋଗ ମଧ୍ୟ ଆଣିଛନ୍ତି। ସାମାଜିକ କର୍ମୀ ସୋନମଙ୍କ କହିବା ଅନୁସାରେ, ସେ ଚାହୁଁଥିଲେ ଯେ କକରୋଚ ଜନତା ପାର୍ଟିର ପ୍ରଦର୍ଶନ ସମୟରେ ରାହୁଲ ଗାନ୍ଧୀ ତାଙ୍କ ଅନଶନ ଭଙ୍ଗ କରାନ୍ତୁ। କିନ୍ତୁ ରାହୁଲ ଗାନ୍ଧୀ ତାଙ୍କୁ ଅଣଦେଖା କରିଥିଲେ। ସୋନମ ୱାଙ୍ଗଚୁକ ଅଭିଯୋଗ କରିଛନ୍ତି ଯେ, ରାହୁଲ ତାଙ୍କ ଅନଶନ ଶେଷ କରାଇବାର ଯୋଜନା ପ୍ରତି କୌଣସି ଧ୍ୟାନ ଦେଇନଥିଲେ। ସେ କହିଛନ୍ତି ଯେ, ତାଙ୍କ ପତ୍ନୀ ଗୀତାଞ୍ଜଳି ଚେଷ୍ଟା କରିଥିଲେ ଯେ ରାହୁଲ ଗାନ୍ଧୀ ଜନ୍ତର ମନ୍ତରରେ ତାଙ୍କର ୨୬ ଦିନର ଅନଶନ ଜୁସ୍ ପିଆଇ ଶେଷ କରାନ୍ତୁ, କିନ୍ତୁ ସେଥିପାଇଁ କୌଣସି ସକାରାତ୍ମକ ପ୍ରତିକ୍ରିୟା ମିଳିନଥିଲା। ଏହା ପରେ ସେ କଂଗ୍ରେସ ନେତା ଏବଂ ଅନ୍ୟ ରାଜନୈତିକ ଦଳଗୁଡ଼ିକ ପ୍ରତି ନିରାଶ ହୋଇଥିବା କହିଛନ୍ତି।
ସୋନମ ୱାଙ୍ଗଚୁକ କହିଛନ୍ତି, , ଆମେ ଚାହୁଁଥିଲୁ ଯେ ରାହୁଲ ଗାନ୍ଧୀଙ୍କ ହାତରେ ଆମର ଉପବାସ ଭଙ୍ଗ ହେଉ। ମୋ ପତ୍ନୀ ଗୀତାଞ୍ଜଳି ଏହି ଚେଷ୍ଟାରେ ଲାଗିଥିଲେ। ସେ ଚେଷ୍ଟା କରୁଥିଲେ ଯେ ରାହୁଲ ଜୀ ମୋର ଉପବାସ ଭଙ୍ଗ କରାଇପାରିବେ କି ନାହିଁ। ସେ ବହୁତ ଚେଷ୍ଟା କରିଥିଲେ, କିନ୍ତୁ କୌଣସି ସକାରାତ୍ମକ ଉତ୍ତର ମିଳିନଥିଲା।
ସୋନମ ୱାଙ୍ଗଚୁକ କେନ୍ଦ୍ରମନ୍ତ୍ରୀ ଜେ. ପି. ନଡ୍ଡା ଏବଂ ଜିତେନ୍ଦ୍ର ସିଂହଙ୍କ ଉପରେ ମଧ୍ୟ ପ୍ରତିଶ୍ରୁତି ଭଙ୍ଗ କରିଥିବାର ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ, ଏହି ଦୁଇ ନେତା ତାଙ୍କୁ ଆଶ୍ୱାସନା ଦେଇଥିଲେ ଯେ, ସେ ସୁପ ପିଉଥିବା ବେଳର ଫଟୋ ସେ ପର୍ଯ୍ୟନ୍ତ ସାର୍ବଜନୀନ କରାଯିବ ନାହିଁ, ଯେପର୍ଯ୍ୟନ୍ତ ସେ ବିରୋଧୀ ଦଳର ନେତା ଏବଂ ଛାତ୍ର ପ୍ରତିନିଧିମାନଙ୍କ ଉପସ୍ଥିତିରେ ନିଜେ ଅନଶନ ଶେଷ କରୁଥିବାର ଘୋଷଣା ନ କରନ୍ତି।
କିନ୍ତୁ ପରେ ସେହି ଫଟୋଗୁଡ଼ିକୁ ପ୍ରକାଶ କରାଯାଇଥିଲା। ସୋନମ ୱାଙ୍ଗଚୁକ କହିଛନ୍ତି, ସେମାନେ ପ୍ରତିଶ୍ରୁତି ଦେଇଥିଲେ ଯେ ଫଟୋ ପ୍ରକାଶ କରିବେ ନାହିଁ, କିନ୍ତୁ ସେମାନେ ନିଜ ପ୍ରତିଶ୍ରୁତି ଭଙ୍ଗ କରିଦେଲେ। ଏବେ ଏହି ନେତାମାନଙ୍କ ଉପରେ ମୋର ଆଉ କୌଣସି ଭରସା ନାହିଁ।
Odisha’s No.1 Odia Daily
