ନୂଆଦିଲ୍ଲୀ,୧୭।୭: NEET ପେପର ଲିକ୍ ଏବଂ ପରୀକ୍ଷା ପ୍ରଣାଳୀରେ ହୋଇଥିବା କଥିତ ଅନିୟମିତତା ପ୍ରତିବାଦରେ ସାମାଜିକ କର୍ମୀ ସୋନମ ୱାଙ୍ଗଚୁକଙ୍କ ଅନଶନ ଶୁକ୍ରବାର ୨୦ତମ ଦିନରେ ପ୍ରବେଶ କରିଛି। କଂଗ୍ରେସ ନେତା ପଓ୍ବନ ଖେଡ଼ା କର୍ମୀ ସୋନମ ୱାଙ୍ଗଚୁକଙ୍କୁ ଭେଟିଛନ୍ତି। କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରି ସୋନମ ୱାଙ୍ଗଚୁକ ଜୁନ ୨୮ ତାରିଖରୁ ଭୋକ ହଡ଼ତାଳ କରୁଛନ୍ତି। ସେହିପରି, ଆଜି କଂଗ୍ରେସ ନେତା ପଓ୍ବନ ଖେଡ଼ା କର୍ମୀ ସୋନମ ୱାଙ୍ଗଚୁକଙ୍କୁ ସାକ୍ଷାତ କରିଛନ୍ତି। ଡାକ୍ତରଙ୍କ ଅନୁଯାୟୀ, ତାଙ୍କ ଓଜନ ୯ କିଲୋରୁ ଅଧିକ କମିଗଲାଣି ଏବଂ ତାଙ୍କର ରକ୍ତଚାପ (ବ୍ଲଡ ପ୍ରେସର) ମଧ୍ୟ କ୍ରମାଗତ ଭାବେ ହ୍ରାସ ପାଉଛି। ଡାକ୍ତର ଜଣାଇଛନ୍ତି ଯେ, ଦୀର୍ଘ ସମୟ ଧରି ଖାଦ୍ୟ ଗ୍ରହଣ ନକରିବା ଯୋଗୁ ତାଙ୍କ ଶରୀରରେ ଅତ୍ୟଧିକ ଦୁର୍ବଳତା ପ୍ରକାଶ ପାଇଛି।
ଡାକ୍ତରଙ୍କ ସୂଚନା ଅନୁଯାୟୀ, ଆଜି ସୋନମ ୱାଙ୍ଗଚୁକଙ୍କ ଓଜନ ୫୬.୫୫ କିଲୋଗ୍ରାମ ରେକର୍ଡ କରାଯାଇଛି, ଯାହା ଗତ ୨ ଘଣ୍ଟା ମଧ୍ୟରେ ୩୫୦ ଗ୍ରାମ ହ୍ରାସ ପାଇଛି। ସେହିପରି, ତାଙ୍କର ବ୍ଲଡ ପ୍ରେସର ୧୦୮/୬୮, ବ୍ଲଡ ସୁଗାର ୭୦ mg/dL ଏବଂ ହାର୍ଟ ରେଟ ପ୍ରତି ମିନିଟ୍ରେ ୭୨ ରହିଛି। ଡାକ୍ତରମାନେ ପ୍ରକାଶ କରିଛନ୍ତି ଯେ ଶରୀରରେ ସାମାନ୍ୟ ଜଳାଭାବ (ଡିହାଇଡ୍ରେଶନ) ରହିଛି। ଡାକ୍ତରଙ୍କ କହିବା ଅନୁସାରେ, ଦୀର୍ଘ ସମୟ ଧରି ଖାଦ୍ୟ ନମିଳିବା କାରଣରୁ ପ୍ରଥମେ ଶରୀରର ଚର୍ବି କମିଥିଲା, ତା’ପରେ ମାଂସପେଶୀ ଶୁଖିବାକୁ ଲାଗିଲା। ଏବେ ତୃତୀୟ ପର୍ଯ୍ୟାୟରେ ଶରୀରର ଅଙ୍ଗଗୁଡ଼ିକ ଉପରେ ଏହାର ପ୍ରଭାବ ପଡ଼ିବାର ଆଶଙ୍କା ରହିଛି।
ସେପଟେ, ଭୋକ ହଡ଼ତାଳରେ ବସିଥିବା ସୋନମ ୱାଙ୍ଗଚୁକ କହିଛନ୍ତି, ’ମୁଁ ଯେକୌଣସି ପରିସ୍ଥିତିରେ ବି ଜୁଲାଇ ୨୦ ତାରିଖ ପର୍ଯ୍ୟନ୍ତ ଜୀବିତ ରହିବି, ଯେମିତି ଆପଣ ସମସ୍ତଙ୍କ ସହ ସଂସଦ ପର୍ଯ୍ୟନ୍ତ ପଦଯାତ୍ରା କରିପାରିବି। ଯଦି ଜୁଲାଇ ୨୦ରେ ଆମର ମାର୍ଚ୍ଚ ସଫଳ ନହୁଏ, ତେବେ ମୁଁ ଭୂତ ହୋଇ ଫେରିବି।’
ପ୍ରକାଶ ଥାଉ କି, ସୋନମ ୱାଙ୍ଗଚୁକ ଦିଲ୍ଲୀର ଯନ୍ତର-ମନ୍ତରଠାରେ ଭୋକ ହଡ଼ତାଳ କରୁଛନ୍ତି। ଏଠାରେ ତାଙ୍କ ଅନଶନର ଆଜି ୨୦ତମ ଦିନ। ସେ କକ୍ରୋଚ ଜନତା ପାର୍ଟିର ସଂସ୍ଥାପକଙ୍କ ସମର୍ଥନରେ ଅନଶନରେ ବସିଛନ୍ତି। ପାର୍ଟି ସଂସ୍ଥାପକ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରୁଛନ୍ତି। ମେ’ ମାସରେ ହୋଇଥିବା ପରୀକ୍ଷାର ପେପର ଲିକ ଘଟଣା ଯୋଗୁ ଲକ୍ଷ ଲକ୍ଷ ଛାତ୍ରୀଛାତ୍ର ପ୍ରଭାବିତ ହୋଇଛନ୍ତି ବୋଲି ସେ ଅଭିଯୋଗ କରିଛନ୍ତି।
