ପଣଜୀ,୨୭ ।୮: ଭାରତୀୟ ଜନତା ପାର୍ଟି(ଭାଜପା) ନେତ୍ରୀ ତଥା ଟିକ୍ଟକ୍ ଷ୍ଟାର ସୋନାଲି ଫୋଗାଟ ମୃତ୍ୟୁ ମାମଲାରେ ତାଙ୍କର ଭାଇଙ୍କ ଅଭିଯୋଗ କ୍ରମେ ପୋଲିସ ସୋନାଲିଙ୍କ ପିଏ ସୁଧିର ସାଙ୍ଗୱାନ ଓ ଅନ୍ୟ ଜଣେ ସହଯୋଗୀ ସୁଖବିନ୍ଦରଙ୍କୁ ଗିରଫ କରିଛି । ଏହି ମାମଲାରେ ହୋଟେଲ ମାଲିକ ସମେତ ଜଣେ ଡ୍ରଗ୍ସ ପେଡଲରଙ୍କୁ ବି ଗିରଫ କରାଯାଇଛି । ଏପର୍ଯ୍ୟନ୍ତ ନିଆଯାଇଥିବା କାର୍ଯ୍ୟାନୁଷ୍ଠାନକୁ ନେଇ ସୋନାଲଙ୍କ ପରିବାର ସନ୍ତୁଷ୍ଟ ଥିବା ଗଣ ମାଧ୍ୟମକୁ କହିଛନ୍ତି ।
ସୋନାଲିଙ୍କ ଜଣେ ସମ୍ପର୍କିୟ କହିଛନ୍ତି କେବଳ ସମ୍ପତ୍ତି ପାଇଁ ସୋନାଲିଙ୍କୁ ହତ୍ୟା କରାଯାଇଛି । ସୋନାଲିଙ୍କ ପିଏ ସମ୍ପତ୍ତି ହାତେଇବାକୁ ଯାଇ ତାଙ୍କୁ ହତ୍ୟା କରିଥିବା ସେ କହିଛନ୍ତି । ପ୍ରଥମେ ପିଏ ସୁଧିର ସୋନାଲିଙ୍କ ନିକଟକୁ ଡ୍ରାଇଭର ଭାବେ ଆସିଥିବା ବେଳେ ଏତେ ବିଶ୍ୱାସ ଜନ୍ମାଇଥିଲେ ଯେ ପରେ ସେ ସୋନାଲିଙ୍କ ପିଏ ହୋଇ ଯାଇଥିଲେ । ହେଲେ ସେ ସମ୍ପୂର୍ଣ୍ଣ ଭାବେ ପ୍ଲାନିଂରେ ଆସିଥିଲେ ବୋଲି ସୋନାଲିଙ୍କ ସମ୍ପର୍କିୟ କହିଛନ୍ତି । ସେ ସୋନାଲିଙ୍କୁ ତାଙ୍କ ଘରେ ମାରି ପାରିବାର କୌଣସି ସୁବିଧା ପାଇ ନ ଥିଲେ ତେଣୁ ସେ ଗୋଆ ନେଇ ସେଠାରେ ତାଙ୍କୁ ହତ୍ୟା କରିଥିବା କହିଛନ୍ତି ସେହି ସମ୍ପର୍କୀୟ । ଏବେ ସୋନାଲିଙ୍କ ଝିଅର ଜୀବନ ପ୍ରତି ବିପଦ ରହିଛି ବୋଲି ତାଙ୍କ ସମ୍ପର୍କିୟ କହୁଛନ୍ତି ।
