କଟକ/ଜଗତ୍ସିଂହପୁର,୮ା୧୦(କାର୍ତ୍ତିକ ସାହୁ/ପ୍ରମୋଦ କୁମାର ନାୟକ)ତିର୍ତ୍ତୋଲର ବିଜେଡି ବିଧାୟକ ବିଜୟ ଶଙ୍କର ଦାସଙ୍କ ବିବାହ ଆବେଦନକୁ ବିରୋଧ କରିଛନ୍ତି ତାଙ୍କ ପ୍ରେମିକା ସୋମାଲିକା ଦାସ। ସୋମାଲିକା ଶନିବାର କଟକସ୍ଥିତ ସବ୍ରେଜିଷ୍ଟ୍ରାର ଅଫିସରେ ବିଜୟ ଶଙ୍କରଙ୍କ ବିବାହ ଆବେଦନ ବିରୋଧରେ ଅଭିଯୋଗ କରିଛନ୍ତି। ସୋମାଲିକାଙ୍କ ପରିବର୍ତ୍ତେ ବିଜୟ ଶଙ୍କର ଅନ୍ୟ ଜଣେ ମହିଳାଙ୍କୁ ବିବାହ ପାଇଁ ଆବେଦନ କରିବା ଜଣାପଡ଼ିବା ପରେ ସେ ଏହି ଅଭିଯୋଗ କରିଥିବା କହିଛନ୍ତି।
ଗଣମାଧ୍ୟମକୁ କହିଛନ୍ତି, ବିଜୟ ମୋତେ ବିବାହର ପ୍ରତିଶ୍ରୁତି ଦେଇଥିଲେ। ଉଭୟ ପରିବାର ମଧ୍ୟରେ ଏନେଇ କଥା ହୋଇଥିଲା। ୧୭ା୫ା୨୦୨୨ରେ ଜଗତ୍ସିଂହପୁର ସ୍ବତନ୍ତ୍ର ବିବାହ ଅଧିକାରୀ (ଡିଏସ୍ଆର୍)ଙ୍କ ପାଖରେ ବିବାହ ପାଇଁ ଆବେଦନ କରାଯାଇଥିଲା। ଆବେଦନର ୩୦ଦିନ ଭିତରେ କାହାରି କିଛି ଆପତ୍ତି ଅଭିଯୋଗ ନ ଥିଲେ ୩୧ ଦିନରୁ ୯୦ ଦିନ ମଧ୍ୟରେ ଯେକୌଣସି ସମୟରେ ଉଭୟ ବିବାହ କରିପାରିବେ ବୋଲି କୁହାଯାଇଥିଲା। ଆବେଦନର ୩୧ତମ ଦିନ ସୋମାଲିକା ତାଙ୍କ ସମ୍ପର୍କୀୟଙ୍କ ସହ ଡିଏସ୍ଆର୍ଙ୍କ କାର୍ଯ୍ୟାଳୟରେ ବିବାହ ପାଇଁ ପହଞ୍ଚତ୍ଥିଲେ। ସକାଳୁ ଅପରାହ୍ନ ୩ଟା ପର୍ଯ୍ୟନ୍ତ ବିଜୟଶଙ୍କରଙ୍କୁ ସୋମାଲିକା ଅପେକ୍ଷା କରି ନିରାଶ ହୋଇଥିଲେ। ବିଜୟଶଙ୍କର ତାଙ୍କୁ ପ୍ରତାରଣା କରିଥିବା ଜାଣିବା ପରେ ଜଗତ୍ସିଂହପୁର ଥାନାରେ ସୋମାଲିକା ଅଭିଯୋଗ କରିଥିଲେ। ହେଲେ ସେ ଶାସକ ଦଳର ବିଧାୟକ ହୋଇଥିବାରୁ ପୋଲିସ କୌଣସି ପଦକ୍ଷେପ ନେଲା ନାହିଁ। ଫଳରେ ସୋମାଲିକା ବିଧାୟକଙ୍କ ନାଁରେ କୋର୍ଟରେ ମାମଲା ଦାୟର କରିବା ପରେ ତାହା ଏବେ ବିଚାରାଧୀନ ରହିଛି। ଏପରିସ୍ଥଳେ ଅନ୍ୟ ଜଣେ ମହିଳାଙ୍କୁ ବିବାହ କରିବାକୁ ବିଧାୟକ ବିଜୟଶଙ୍କର କଟକ ସବ୍ରେଜିଷ୍ଟ୍ରାର ଅଫିସରେ ଆବେଦନ କରିଛନ୍ତି। ମୋତେ ନ୍ୟାୟ ଦରକାର। ସେ କ’ଣ ମୋ ଜୀବନକୁ ନଷ୍ଟ କରି ଅନ୍ୟ ଜଣଙ୍କ ସହ ତାଙ୍କ ସଂସାର ବସାଇବେ ବୋଲି ସୋମାଲିକା କହିଛନ୍ତି। ଏଥିସହିତ ସୋମାଲିକା ଜଗତ୍ସିଂହପୁର ଥାନାର ମଧ୍ୟ ଦ୍ୱାରସ୍ଥ ହୋଇଛନ୍ତି। ତାଙ୍କୁ ନ୍ୟାୟ ନ ମିଳିବା ପର୍ଯ୍ୟନ୍ତ ବିଜୟଶଙ୍କର ଅନ୍ୟ କାହାକୁ ବିବାହ କରିପାରିବେ ନାହିଁ ସୋମାଲିକା କହିଛନ୍ତି।
ଅନୁସାରେ, ତିର୍ତ୍ତୋଲ ବିଜେଡି ବିଧାୟକ ବିଜୟ ଶଙ୍କର ଦାସ କଟକ ଅରୁଣୋଦୟ ମାର୍କେଟ ଅଞ୍ଚଳର ନିଜର ଜଣେ ସହପାଠିନୀଙ୍କୁ ବିବାହ କରିବା ନିମନ୍ତେ ଗତ ସେପ୍ଟେମ୍ବର ୨୧ ତାରିଖରେ କଟକସ୍ଥିତ ରେଜିଷ୍ଟ୍ରାର ଅଫ୍ ମ୍ୟାରେଜଙ୍କ କାର୍ଯ୍ୟାଳୟରେ ଆବେଦନ କରିଛନ୍ତି। ଆବେଦନ ତାରିଖଠୁ ଏକମାସର ନୋଟିସ ଅବଧି ଶେଷ ପରେ ବିଧାୟକ ଦାସ ତାଙ୍କୁ ବିବାହ କରିବେ। ଅନ୍ୟ ପକ୍ଷରେ ତିର୍ତ୍ତୋଲ ବିଧାୟକ ଦାସ ଗତବର୍ଷ ମେ’ ୧୭ ତାରିଖରେ ତାଙ୍କ ଦୀର୍ଘଦିନର ପ୍ରେମିକା ସୋମାଲିକା ଦାସଙ୍କୁ ବିବାହ କରିବାକୁ ଜଗତ୍ସିଂହପୁର ବିବାହ ପଞ୍ଜୀକରଣ ଅଧିକାରୀଙ୍କ ନିକଟରେ ଆବେଦନ କରିଥିଲେ। ହେଲେ ଏକମାସର ନୋଟିସ ଅବଧି ପରେ ସେ ବିବାହ ପାଇଁ ଉପସ୍ଥିତ ହୋଇନଥିଲେ, ଯାହାକୁ ନେଇ ସୋମାଲିକା ଜଗତ୍ସିଂହପୁର ଥାନାରେ ଯୌନ ନିର୍ଯାତନା, ବଳାତ୍କାର ମାମଲା ଦାଏର କରିଥିଲେ। ଏହାକୁ ନେଇ ରାଜନୈତିକ ହଟଚମଟ ହୋଇଥିଲା। ଏହି ମାମଲାରେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିି ନ ଥିଲା। ରାଜ୍ୟ ସରକାର ବି କୌଣସି ପଦକ୍ଷେପ ନେଇ ନ ଥିଲେ। ଫଳରେ ସୋମାଲିକା ନ୍ୟାୟ ପାଇବା ପାଇଁ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ମାମଲା ଅଦାଲତରେ ବିଚାରାଧୀନ ରହିଛି।
